00:00:00 IGIHE NETWORK KN KINYARWANDA EN ENGLISH FR FRANCAIS

Ubuhamya bw’abaturage baherutse kuraswa n’abagizi ba nabi muri Nyungwe

Yanditswe na Prudence Kwizera
Kuya 21 June 2022 saa 07:53
Yasuwe :

Ku gicamunsi cyo ku wa Gatandatu, tariki ya 18 Kamena 2022, ahagana saa munani, abagizi ba nabi bitwaje imbunda bikekwa ko ari abo mu mutwe wa FLN baturutse hakurya y’umupaka, barashe ku modoka itwara abagenzi mu Murenge wa Kitabi mu Karere ka Nyamagabe. Yerekezaga mu Karere ka Rusizi.

Abo bagizi ba nabi bishe umushoferi n’umugenzi, banakomeretsa abandi batandatu.

Abagera kuri batanu mu bakomerekejwe n’amasasu bari kwitabwaho n’abaganga mu bitaro bya Kaminuza bya Butare, CHUB, naho undi umwe wakomeretse cyane ku mutwe ari kuvurirwa muri CHUK.

Umunyamakuru wa IGIHE yasuye abari kuvurirwa muri CHUB aho bakomeje kwitabwaho n’abaganga, bamuha ubuhamya bw’uko bagabweho igitero n’abagizi ba nabi n’uko batabawe n’inzego z’umutekano z’u Rwanda.

Uko barashweho

Nsanzamahoro Jean Marie Vianney asanzwe atuye mu Karere ka Nyarugenge mu Mujyi wa Kigali. Yabwiye IGIHE ko yateze imodoka (bus) agiye mu Karere ka Nyamasheke gutabara umuntu witabye Imana, ageze mu ishyamba rya Nyungwe yumva batangiye kuraswaho na we isasu rimufata ku kuguru.

Imodoka bari barimo yarashwe icyinjira muri Nyungwe nko mu bilometero bitanu uvuye mu Gasantere ka Kitabi.

Ati “Njye nari nicaye inyuma ya shoferi, twatunguwe no kumva amasasu, bahita barasa umushoferi imodoka ita umurongo ijya munsi y’umuhanda.”

Yavuze ko atigeze abona abantu babarashe kuko bari bihishe mu ishyamba kandi uko kubarasaho byakozwe mu kanya gato katageze ku munota umwe.

Ati “Ni akanya gato cyane kuko iyo iza kuba iminota myinshi inzego z’umutekano z’u Rwanda zari kuba zahageze.”

Yavuze ko imodoka ikimara kumanuka munsi y’umuhanda, hari abantu bamwe mu bo bari kumwe bagerageje gusimbuka ngo bahunge bihishe mu ishyamba ariko inzego z’umutekano z’u Rwanda ziba zabagezeho zirabahumuriza, zitangira kwita ku bakomeretse.

Ati “Nkanjye bahise bamfuka badushyira mu modoka batujyana kwa muganga.”

Rutayisire René asanzwe atuye i Nyamirambo mu Murenge wa Rwezamenyo mu Mujyi wa Kigali; akora akazi ko gusana umuhanda unyura mu ishyamba rya Nyungwe.

Yavuze ko yari atwaye imodoka mu bwoko bwa Toyota Double Cabin iri inyuma ya bisi ya Ritco itwaye abagenzi, atungurwa no kumva barashweho amasasu, na we rimwe rimufata ku kuguru.

Ati “Twagiye kumva twmva bari kuturasa, navuga ko barasaga nk’abajura birukanka. Nari mu modoka ndi inyuma ya Ritco, urumva twese twabaguyemo gutyo.”

Na we avuga ko atigeze abona ababarasheho. Akimara kumva bari kubarasa yakomeje gutwara imodoka ye, abona Ritco imanutse munsi y’umuhanda.

Ati “Njyewe narakomeje ngenda n’imodoka nari nitwaye, Ritco iri imbere uretse ko yataye umurongo ikomeza imanuka munsi y’umuhanda ariko njyewe narakomeje. Imodoka yanjye bayirashe amapine, isasu rimwe rimfata ku kuguru.”

Kuko imodoka ye bari bayirashe amapine yageze imbere muri metero nka 200 irahagarara bihurirana n’uko inzego z’umutekano z’u Rwanda zihageze, zisanga abo bagizi ba nabi bagiye, zitangira gutanga ubutabazi ku baturage barashwe.

Yagize ati “Inzego z’umutekano zahise zihagera zisanga bandashe baramvura bahita banzana hano kwa muganga.”

Rutayisire nk’umuntu usanzwe akorera muri Nyungwe, yemeza ko umutekano waho urinzwe, ahubwo batunguwe no kumva bari kuraswa ku manywa y’ihangu.

Ati “Byabaye nko gutungurwa kuko abashinzwe umutekano baba bahari, baba bahari sinzi ukuntu byagenze. Umutekano wa hariya urarinzwe pe, kuko tuhakoze umwaka n’igice, sinzi uko byagenze. Ariko bahise batabara ako kanya kuko baba bari aho hafi.”

Nsanzamahoro Jean Marie Vianney na we yavuze ko asanzwe anyura muri Nyungwe akabona umutekano uhari.

Ati “Twaratunguwe ariko inzego z’umutekano zacu turazizeye ko n’ahabaye ikibazo zizagikemura.”

Bashimye ubutabazi n’ubufasha bari guhabwa

Rutayisire na Nsanzamahoro bavuze ko nubwo bahuye n’ibyago byo kuraswa n’abagizi ba nabi, batabura gushimira inzego z’umutekano z’u Rwanda uburyo zatabaranye ingoga zigatuma abo bagizi ba nabi badakomeza kubarasa no kubasanga aho imodoka yaguye.

Rutayisire ati “Ubu meze neza batwitaho ku bintu byose. Ejo Guverineri [Kayitesi Alice] yaradusuye byaradushimishije bigaragara ko abayobozi bacu batwitaho. Yatubwiye ko bazatwitaho kandi batwitayeho mu buryo bwose bushoboka.”

Nsanzamahoro na we yavuze ko gusurwa na Guverineri w’Intara y’Amajyepfo, Kayitesi Alice, byamwongereye icyizere cyo gukira.

Ati “Yatubwiye ko inzego z’umutekano zituri hafi kandi igihugu kitwitayeho ko nta kibazo na kimwe tugomba kugira kandi niko bimeze urabona ko meze neza nta kibazo ndumva ndimo gukira ku buryo nshobora no gutaha.”

Bageneye ubutumwa abagizi ba nabi

Rutayisire na Nsanzamahoro banenze abagizi ba nabi bafite umugambi wo kwica abaturage, bavuga ko ibikorwa byabo ari nk’iby’abajura n’amabandi.

Rutayisire ati “Abantu nk’abo njye mbona ibintu bakora bimeze nk’ububandi, byo gutera umuturage utakurwanya wibereye mu kazi, nkanjye nari nibereye mu kazi nambaye n’umwenda w’akazi [wagenewe abakora imihanda].”

“Njyewe nababwira ko ibintu barimo nta bwenge burimo kandi ndizera ko ibyo batekereza batazabigeraho kuko turarinzwe, dufite umutekano mu gihugu, byaba byiza ibyo barimo babiretse.”

Nsanzamahoro na we yavuze ko abantu baza bashaka kwica abaturage nta kintu kizima bageraho.

Ati “Nta kintu na kimwe ariya mabandi ashobora kugeraho ashaka kwica abaturage usibye gusa gukora ibikorwa bibi nka biriya.”

Uwarashwe agahita apfa ni umushoferi wa Ritco witwa Ibrahim Issa n’undi mugenzi umwe.

Abarashwe bagakomereka ni abagabo bane, umukobwa umwe ndetse n’umugore umwe [uyu ari kuvurirwa muri CHUK kuko yakometse ku mutwe].

Polisi y’Igihugu yavuze ko abakoze ubwo bugizi bwa nabi bari gushakishwa.

Igitero cy’ubugizi bwa nabi nk’ubu bwibasira abaturage cyaherukaga kugabwa n’inyeshyamba za FLN rwagati mu ishyamba rya Nyungwe, ku mugoroba wo ku wa 15 Ukuboza 2018, imodoka zitandukanye zirimo izitwara abagenzi icyo gihe zaratwitswe, hicwa abaturage batandatu n’aho abandi benshi barakomereka bamwe bibasigira ubumuga.

Nsanzamahoro Jean Marie Vianney yavuze ko bari kwitabwaho mu Bitaro bya CHUB kandi yumva ameze neza
Rutayisire René yarashwe ukuguru yitwaye mu modoka kuko asanzwe akora akazi ko gusana umuhanda muri Nyungwe. Yari inyuma y'imodoka ya Ritco yamishweho amasasu
Rutayisire René ni umwe mu bari kwitabwaho n'abaganga mu Bitaro bya CHUB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .