U Rwanda rwatangije uburyo bwihariye bwo kubaga umurwayi adasatuwe igice kinini cy’umubiri

Yanditswe na Evariste Nsengimana
Kuya 26 Nzeri 2019 saa 03:49
Yasuwe :
0 0

Guverinoma y’u Rwanda yatangije uburyo bwihariye bwifashisha ikoranabuhanga mu kubaga umurwayi indwara z’imbere mu mubiri hatabayeho gusatura igice kinini cyawo, hagasaturwa igice gito kinyuzwamo ibikoresho byabugenewe mu kuvura igice kirwaye.

Ni uburyo abagaganga b’inzobere mu kubaga batobora agace gato k’umubiri, bakoherezamo ibikoresho byabugenewe, bakavura igice kirwaye barebera ku mashini, barangiza bagasubiranye ka gace kasatuwe ku buryo uwabazwe ashobora no gutaha mu rugo uwo bucyeye.

Bushobora kwifashishwa mu kubaga ibice bitandukanye birimo mu nda, kubaga ababyeyi, kanseri y’udusabo tw’intanga tw’abagabo n’ibindi.

Ubu buryo bwitwa ‘Minimally Invasive Surgery’ mu rurimi rw’icyongereza bwatangijwe kuri uyu wa 27 Nzeri 2019, mu nama y’iminsi ibiri ibaye ku nshuro ya Gatatu yiga ku ikoranabuhanga mu Binyabuzima.

Iyi nama yo ku rwego rwa Afurika ifite insanganyamatsiko agaruka ku ‘Kwihutisha iterambere ry’ubuvuzi bushingiye ku buhanga n’ubumenyi mu Rwanda, igamije kuzamura ubumenyi n’ubuhanga bwo kubaga umurwayi batamusatuye no guteza imbere ikoranabuhanga mu buzima.

Butangizwa muri iyi nama, abayitabiriye bakurikiranye imbonankubone hifashishijwe ikoranabuhanga, abaganga bo mu bitaro byitiriwe Umwami Faisal babaga umurwayi wari urwaye agasabo k’indurwe.

Umuyobozi w’Ishami rishinzwe iterambere ry’ibinyabuzima muri Kaminuza yigenga ya Bruxelles, Dr Jacob Souopgui, yavuze ko kugeza umushinga wo kubaga abantu badasatuwe igice kinini mu Rwanda yawusezeranyije Perezida Kagame bahuriye muri Rwanda Day iheruka, ukazashyirwa mu bikorwa ku nkunga ya Leta y’u Bubiligi.

Ati “Ni umushinga wo kubaga hifashishijwe ikorabuhanga, inzobere zikanyuza ibikoresho byabugenewe mu mwenge muto zigakuraho igice kirwaye ku buryo hatabayeho imbogamizi umurwayi ataha bukeye kuko ingaruka bigira ari nke cyane bigatuma umurwayi ahita akira vuba cyane, mu cyumweru agasubira mu kazi.”

Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr. Ndimubanzi Patrick, yavuze ko ubu buryo burimo gukorerwa ku bitaro bikuru bya Kaminuza bya Kigali(CHUK), ibya Gisirikare i Kanombe n’ibyitiriwe Umwami Faisal ariko icyufuzo ni uko bigenda bigezwa ahandi.

Ati “Turifuza ko ubu buvuzi bwo kubaga badasatuye ahantu hanini, bafungura ahantu hato hangana na Milimetero 5-12 turashaka ko bukwira hose bikazagera ku baturage benshi kuko ari bwiza ku murwayi, butuma atababara cyane, adatinda mu bitaro.”

Dr Ndimubanzi yavuze ko kugira ngo ibyo bigerweho bisaba gutoza abaganga benshi kandi ariyo gahunda u Rwanda rurimo kugira ngo umuganga w’ababukora biyongere.

Kuri ibyo bitaro bitatu ubu buryo buri kwifashishwa biteganyijwe ko abarwayi bari hagati ya 120-150 bazavurwa hifashishijwe ubu buryo.

Umuyobozi w’ibitaro bikuru bya Kaminuza bya Kigali(CHUK) Dr Hategekimana Théobald, yavuze ko uburyo bwo kubaga bwifashishwaga bwabaga buciriritse.

Ati “Iri koranabuhanga dusanzwe turikoresha ariko ku rwego ruri hasi kuko nta baganga b’inzobere bari bahari ariko gahunda dufite ni iyo kwigisha abaganga benshi.”

Dr Hategekimana yavuze ko hari abaganga 10 basanzwe ari inzobere mu kuganga barimo kongererwa ubumenyi mu kubaga hadasatuwe igice kinini cy’umubiri nabo bakazahugura abandi.

Ati “Indwara zose ntabwo zizabagwa muri ubu buryo, hari izizakenera gufungurwa byanze bikunze. Nko mu Burayi cyangwa Amerika, 60-70% by’indwara nyinshi usanga bakoresha ubu buryo, natwe twifuza kugera ikirenge mu cyabo.”

Dr Hategekimana yavuze ko icyifuzo ari uko ubu buvuzi bwatera imbere abanyamahanga bakajya baza mu Rwanda kubushakirayo.

Mu 2017 u Rwanda rwashyizwe imbaraga mu guteza imbere ubumenyi mu kubaga umurwayi utamusatuye aho ku bufatanye na Leta y’Ububiligi, hashyizweho impamyabushobozi iciriritse yo mu cyiciro cya gatatu cya kaminuza muri Kaminuza y’u Rwanda.

Kugira ngo iyi gahunda itange umusaruro, u Rwanda rubifashijwemo n’ikigo kitwa Medtronics, hashyizweho Laboratwari n’ibikoresho byo kwiga kubaga hifashishijwe iryo koranabuhanga bidakorewe ku bantu, imyitozi igakorerwa ku nyamaswa nk’ingurube.

Muri Mutarama 2019 hashyizweho imfashanyigisho izifashishwa mu kwigisha abanyeshuri no kubaga abarwayi hakoresheje ubwo buhanga mu bitaro bya Kaminuza izafasha abatoranyijwe basanzwe bakora uwo mwuga barimo abaganga mu kubaga, mu kwita ku ndwara z’imyanya myibarukiro y’abagore n’abagabo n’abandi.

Abayitabiriye bakurikiranye uko abaganga b'ibitaro by'Umwami Faisal babaga umurwaye badasatuye igice kinini cy'umubiri
Dr Ndimubanzi yavuze ko kugira iyi gahunda igere hose bisaba gutoza abaganga benshi
Iyi nama yitabiriwe n'inzobere mu by'ubuzima n'abandi barenga 250

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza