U Rwanda rwakiriye mu kivunge abarenga 1400 barimo abahoze muri FDLR

Yanditswe na Evariste Nsengimana
Kuya 22 Ukuboza 2019 saa 10:34
Yasuwe :
0 0

U Rwanda rwakiriye mu kivunge abahoze ari abarwanyi b’umutwe wa FDLR n’imiryango yabo 1471, babaga mu mashyamba ya Repubulika Iharanira Demokarasi ya Congo (RDC), bahungiyeyo guhera mu 1994.

Aba baturage DRC yabashyikirije u Rwanda kuri uyu wa 21 Ukuboza 2019, banyujijwe ku mupaka wa Rusizi ya mbere, uhuza Akarere ka Rusizi mu Rwanda na Bukavu muri RDC.

Mu bantu u Rwanda rwashyikirijwe, 1400 bagizwe n’abana n’abagore naho abandi 71 b’abagabo, bari mu mutwe w’inyeshyamba wa FDLR, ugizwe na bamwe mu bagize uruhare muri Jenoside yakorewe Abatutsi.

Umuyobozi w’Akarere ka Rusizi, Kayumba Ephrem, yabwiye IGIHE ko amakuru afite ari uko hari impunzi 1471 zakiriwe.

Ati “Iby’abarwanyi ntabyo nzi, ibyo nzi ni iby’abaturage basanzwe. Hari abaturage basanzwe twakiriye ku Karere ejo, ubu bari kwitabwaho mu nkambi y’agateganyo ya Nyarushishi. Ni abaturage bagera ku 1471, barimo abagore n’abana.”

Yakomeje agira ati “Amakuru mfite ni uko ari abanyarwanda bahunze muri kiriya gihe cya 1994 igihe abantu bose bagenda igihiriri, bakaba batarigeze bataha, ejo rero bakaba baratashye mu gihugu.”

Kayumba yavuze ko abo bantu bari kwitabwaho kuko hari abananiwe, abatameze neza bakeneye ubufasha bwihariye.

Ati “Hari abatameze neza, hari n’uwahageze ahita abyara. Barahaba[mu nkambi] iminsi mike kugira ngo hamenyekane aho bakomoka noneho bagezwe iwabo.”

Umuyobozi wa Komisiyo yo gusezerera no gusubiza mu buzima busanzwe abari abasirikare, Seraphine Mukantabana, yasobanuriye IGIHE ko muri abo bantu 1471 bakiriwe, 71 bari mu mutwe wa FDLR.

Ati “Iyo miryango twayakiriye mu nkambi ya Nyarushishi, bose bari muri FDLR, imiryango yabo iri hano kuko ari imiryango y’abari abarwanyi, bamwe baheruka kuza[291] hari n’abandi 71 baje muri abo baje ejo.”

Yakomeje agira ati “Abari abarwanyi bari kumwe n’abandi. Iyo umuntu afatiwe ku rugamba hari ibigomba gukorwa, rimwe na rimwe ababa bashobora kuba bagifite intwaro ugomba kubanza ukazibambura. Ibyo bikorwa n’abazobereye mu by’intwaro, bakabanza kureba niba bazifite bakabona gusubizwa mu buzima busanzwe.”

Umuvugizi wa Batayo ya 33 y’Ingabo za RDC yabwiye Radi Okapi yo muri RDC ko abo bantu barimo abarwanyi bari bacumbikiwe mu nkambi ya gisirikare ya Nyamunyunyi iherereye ahitwa Kabare nyuma y’uko aba mbere 291 boherejwe mu Rwanda.

Igisirikare cya FARDC cyahagurukiye kurwanya imitwe yitwaje intwaro irwanya u Rwanda muri gahunda yayo yo kurandura imitwe yose yitwaje intwaro iri ku butaka bw’icyo gihugu.

Muri Kamena, Perezida wa RDC, Félix-Antoine Tshisekedi, yavuze ko afite umugambi wo kurandura burundu imitwe yitwaje intwaro ikorera muri iki gihugu ndetse ko biri kuganirwaho na Monusco n’ibihugu by’ibituranyi birebwa n’ikibazo.

Aba 291 baheruka gucyurwa, bakomoka mu mutwe w’iterabwoba wa CNRD, baherutse gufatirwa mu bitero bikomeje kugabwa ku mitwe yitwaje intwaro mu Ntara ya Kivu y’Amajyepfo. Basesekaye mu Rwanda bari kumwe n’abana babo 11.

Ibi bije bikurikira amakuru RD Congo yaherukaga gutangaza ko abarwanyi 1,951 bo mu nyeshyamba z’umutwe wa CNRD bafashwe mpiri, bakurikira abafashwe mpiri mu bitero byo guhashya imitwe yitwaje intwaro muri Teritwari ya Kalehe mu Ntara ya Kivu y’Amajyepfo.

Mu minsi ishize kandi FARDC yafashe mpiri Umuyobozi Mukuru wungirije w’Umutwe udasanzwe w’Inyeshyamba za FDLR (FDLR-CRAP), Nshimiyimana Asifiwe Manudi.

U Rwanda rwakiriye mu kivunge abahoze ari abarwanyi b’umutwe wa FDLR n’imiryango yabo 1471, babaga mu mashyamba ya Repubulika Iharanira Demokarasi ya Congo (RDC),
Abahungutse bakiriwe mu karere ka Rusizi gahana imbibi na RDC
Abenshi mu bakiriwe ni imiryango igizwe n'abaturage basanzwe
Mu nkambi ubuyobozi bwavuze ko aba baturage bazahamara igihe gito bagasubizwa mu miryango yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .