U Rwanda rugiye gushyiraho indangamuntu ikomatanyije izaba irimo Permis na Pasiporo

Yanditswe na Twarabanye Venuste
Kuya 6 Gashyantare 2020 saa 08:41
Yasuwe :
0 0

Ikigo cy’igihugu gishinzwe Irangamuntu (NIDA), kiratangaza ko kigiye gushyiraho Indangamuntu ‘Ikomatanyije’ ikubiyemo ibindi byangombwa birimo uruhushya rwo gutwara ibinyabiziga, (Permis de Conduire), urwandiko rw’abajya mu mahanga, (Pasiporo), ikarita yo kwivuza n’ibiranga usora.

Kugeza ubu indangamuntu ikoreshwa mu buryo bw’ikoranabuhanga mu kureba imyirondoro kugira ngo uyitunze ahabwe serivisi zirimo iz’ubuzima, iz’ibigo by’imari, gutunga Sim Card n’izindi zitandukanye.

Gusa ibyo ntibyakuragaho ko mu mufuka we aba afite ibindi byangombwa bitandukanye, birimo amakarita ya RAMA [nayo iherutse guhuzwa n’indangamuntu] ibyangombwa byo gutwara imodoka, Pasiporo n’ibindi.

NIDA iratangaza ko igiye gukora Indangamuntu ikomatanyije ‘Smart ID’ izaba ikubiyemo ibyangombwa bitandukanye ku buryo uyifite yonyine, azajya aba afite n’ibindi byinshi.

Harelimana Marguerite, ushinzwe ishami ry’irangamimerere n’iyandikwa ry’abaturage, yavuze ko ibindi byangombwa bizaba bikubiye mu ndangamuntu imwe.

Ati “Iyo ndangamuntu ikomatanyije ku ikubitiro izaba irimo umwirondoro w’umuntu ni ukuvuga indangamuntu isanzwe. Hazaba harimo abagize umuryango, uruhushya rwo gutwara ibinyabiziga, urwandiko rw’abajya mu mahanga, ikarita y’ubwisungane mu kwivuza n’amakuru ajyanye n’abasoreshwa.”

Nubwo iyi ndangamuntu itarashyirwaho cyangwa ngo hatangazwe igihe izaba yatangiye gukoreshwa. Iteka rya Minisitiri rigena imiterere yayo n’uburyo ishyirwaho, kuyitunga n’ikoreshwa ryayo ryasohotse mu igazeti ya leta tariki 13 Nzeri 2013 kandi ngo n’ibikenerwa ngo ikorwe byamaze kuboneka.

Mu mateka yasohotse mu igazeti yo ku wa 13 Nzeri 2013 harimo Iteka rya Minisitiri N° 02/07.01 ryo kuwa 04/09/2013 rigena imiterere y’ikarita ndangamuntu ku Banyarwanda n’umubare w’amafaranga atangwa kuri serivisi z’irangamuntu.

Ingingo ya kabiri y’iryo teka ivuga ko hari ubwoko bubiri bw’indangamuntu; isanzwe ishingiye kuri “barcode” [ahantu ubona hatsibaze ibara ry’umukara ku ruhande rw’inyuma]; n’ikomatanyije.

Mu ngingo ya 12 risobanura ko Indangamuntu ikomatanyije iba ifite ibipimo mpuzamahanga by’indangamuntu isanzwe. Ni ukuvuga uburebure bwa milimetero mirongo inani n’eshanu n’ibice bitandatu (85,6), ubugari bwa milimetero mirongo itanu n’enye (54) n’umubyimba wa milimetero zero n’ibice mirongo irindwi na bitandatu (0, 76).

Iba irimo amakuru atandukanye, akoreshwa n’inzego zibifitiye ububasha agafasha nyirayo koroherezwa muri za serivisi zitandukanye ahabwa haba mu nzego za Leta cyangwa iz’abikorera, ikagira agaciro k’imyaka 10 guhera igihe yatangiwe.

Iri teka mu ngingo yaryo ya 18 risobanura ko umunyarwanda usaba ikarita ndangamuntu ikomatanije yishyura 15 000 Frw.

Uretse ibikubiye muri iyo ndangamuntu ikomatanyije, itandukaniro n’isanzwe rigaragara ku bijyanye n’uburyo bwo kuyitunga. Indangamuntu isanzwe kuyitunga no kuyigendana ni itegeko ku munyarwanda wese ufite imyaka 16 y’amavuko mu gihe ikomatanyije yo isabwa n’uyishaka na yo guhera ku myaka 16 y’amavuko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .