U Rwanda rugiye gushyira ahagaragara imibare ivuguruye y’abafite akazi n’abashomeri

Yanditswe na Evariste Nsengimana
Kuya 19 Gashyantare 2019 saa 10:01
Yasuwe :
0 0

Ikigo cy’Igihugu cy’Ibarurishamibare, NISR, kigiye gutangaza imibare ivuguruye igaragaza abanyarwanda bafite akazi n’abatagafite hagendewe ku bipimo bishya by’ubushomeri, ikazasimbura iyatangajwe muri Kanama 2018.

Ubu bushakashatsi bugaragaza uko isoko ry’umurimo rihagaze mu gihugu, Labour Force Survey (LFS), bwatangiye gukusanyirizwa amakuru ku wa 1 Gashyantare 2019, buzasozwa ku wa 28 Gashyantare 2019, nyuma hahite hatangazwa ibyabuvuyemo.

Ni ubushakashatsi bukorerwa mu ngo 4 606 zatoranyijwe mu gihugu hose hakoreshejwe uburyo bwizewe bwo guhitamo icyiciro bukorerwaho, ku buryo amakuru azavamo azaba atanga ishusho y’abanyarwanda bafite akazi n’abatagafite muri rusange.

Ubushakashatsi bw’ubu burihariye ugereranyijwe n’ubusanze kuko bwakorwaga kabiri mu mwaka, mu 2019 bukazakorwa inshuro enye.

Mu kiganiro IGIHE yagiranye n’umuyobozi wa gahunda y’ibarura muri NISR, Byiringiro James, yavuze ko ‘Icyo bugamije ari ugutanga amakuru cyangwa ibipimo bijyanye n’isoko ry’umurimo’.

Ibipimo bishingirwaho mu kugenzura isoko ry’umurimo harimo igipimo cy’ubushomeri, icy’abafite akazi, icy’abagashaka bari mu myaka yo gukora, ibyiciro barimo n’ibindi.

Amakuru akusanywa gute?

Abakusanya amakuru yifashishwa muri ubu bushakashatsi ntabwo babaza umuntu ngo ‘Ese ufite akazi cyangwa uri umushomeri?’ ahubwo bateguye urutonde rw’ibibazo birimo; waba warakoreye umushahara mu minsi ishize? waba waracuruje? n’ibindi, ibisubizo byabyo bikaba aribyo bishingirwaho ashyirwa mu cyiciro runaka.

Imirimo iratandukanye harimo nk’ukora ubuhinzi kugira ngo abone ibimutunga, ugira umuha umushahara, uw’ubucuruzi bumubyarira inyungu, ubukorerabushake n’ibindi.

Ni ryari bavuga ko umuntu afite akazi?

Byiringiro ati “Tuvuga ko umuntu afite akazi mu gihe umurimo akora umuhesha umushahara cyangwa ukaba umuzanira indi nyungu y’amafaranga, cyane cyane nk’ubucuruzi. Ibindi bisigaye biba ari umurimo ariko tutabara nk’akazi.”

Ibyo bipimo bishingirwaho harebwa umuntu ufite akazi, ntabwo byita cyane ku ngano y’amafaranga, ubwiza bwako cyangwa umushahara kamuha n’ibindi, ahubwo bireba ingufu byamusabye n’ibyo yatanze kugira ngo akabone.

Umuntu uhingira 800Frw ku munsi bimushyira mu bafite akazi, uwihingira kugira ngo abone ibimutunga bimushyira mu batagafite ariko igihe ibyo ahinga abijyana ku isoko nawe ahita ajya mu cyiciro cy’abafite akazi. Umukozi wo mu rugo nubwo yaba ahembwa 5000Frw ku kwezi, bimushyira mu bafite akazi kuko hari ibyo aba yarakoze ngo akabone.

Umushomeri ni muntu ki?

Byiringiro yavuze ko umushomeri agomba kuba ‘Umuntu uri gushyira igitutu ku isoko ry’umurimo kandi afite imyaka yo gukora’ bitandukanye n’uko abantu bibeshya ngo ‘Uwarangije kwiga icyiciro cy’amashuri runaka wese, afite n’imyaka yo gukora ariko ntacyo akora’ afatwa nk’umushomeri.

Umuntu afatwa nk’umushomeri igihe afite imyaka yo gukora itari munsi ya 16, nta kazi afite, ashaka akazi ashishikaye nibura mu byumweru bine mbere y’uko abazwa n’abakusanya amakuru kandi akaba yabonekera igihe kabonetse ngo agatangire.

Uyu muyobozi yakomeje asaba abatoranyijwe gukorwaho ubushakashatsi gukomeza gutanga amakuru y’ukuri kugira ngo ubushakashatsi buzabe ubutanga ibisubizo birambye. Yavuze ko mu gihe bumaze bukirwa bugeze ku kigero cya 63%.

Buzahuzwa gute n’ubwabubanjirije

Byiringiro yavuze ko imwe mu mpamvu ingo zikorwaho ubushakashatsi zikurikiranwa ari ukugira ngo harebwe ihindagurika ry’ibyo bipimo kandi ko amakuru mashya agereranywa n’ayayabanjirije mu igenamigambi.

Ati “Iyo dusohoye amakuru tuyagereranya n’ayabanje kugira ngo tumenye niba ibipimo by’isoko ry’umurimo birimo birazamuka, biri kumanuka cyangwa biri hamwe n’impamvu yabyo…Ni ingenzi kugira ngo tumenye niba ibintu biri kugenda neza cyangwa nabi, n’abagomba gufata ingamba bakamenya uko bazifata n’icyiciro bibandaho.”

Ubushakashatsi buheruka gushyirwa ahagaragara na NISR muri Kanama 2018 bwerekanye ko ubushomeri mu Rwanda bwari ku gipimo cya 14,3% buvuye kuri 16% muri Gashyantare uwo mwaka. Iyo ugereranyije Kanama ya 2017 n’iya 2018 usanga bwaragabanutse kuko bwavuye kuri 17,8% bukagera kuri 14,3%.

Abafite imyaka yo gukora bari bafite akazi bavuye 43,4% muri Kanama 2017 bagera kuri 47.3% muri Kanama 2018. Abanyarwanda bari mu myaka yo gukora bavuye kuri miliyoni 6,8 muri Kanama 2017 bagera hafi kuri miliyoni zirindwi muri Kanama 2018.

Bamwe mu rubyiruko ruba wahurijwe mu gikorwa kizwi nka Jobnet gihuza abasaba n'abatanga akazi mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza