Sulah Nuwamanya na Prossy Bonabaana ba RNC bari gukorwaho iperereza ku iterabwoba n’ubucuruzi bw’intwaro

Yanditswe na Musangwa Arthur
Kuya 12 Nzeri 2020 saa 07:37
Yasuwe :
0 0

Inzego z’umutekano za Uganda zirimo gukora iperereza ku banyamuryango ba RNC, Sulah Nuwamanya Wakabirigi na Prossy Bonabaana, ku byaha bitandukanye bakekwaho birimo; ubujura, iterabwoba, gucuruza intwaro ndetse no gutera ubwoba no guhohotera abanyarwanda baba muri Uganda.

Aba bombi bakunze kugarukwaho cyane mu biganiro ku mubano w’u Rwanda na Uganda, nk’abantu bakomeje kugira uruhare mu bikorwa bigambiriye guhungabanya umutekano warwo no gushaka kuruhindanya isura, binyuze mu muryango bari barashinze, Self-Worth Initiative.

Bavugwa kandi mu bikorwa byo gushaka abayoboke bajya mu mutwe w’iterabwoba wa RNC wa Kayumba Nyamwasa, ababyanze bakaregwa mu rwego rushinzwe iperereza rya gisirikare (CMI), bagashinjwa kuba intasi z’u Rwanda.

Muri Nyakanga uyu mwaka, umuturage wo muri Uganda yajyanye mu nkiko Sulah Nuwamanya, Prossy Bonabaana na Godfrey Chebet, abarega ibyaha birimo kumuharabika, ubwo bamenyeshaga inzego z’umutekano ko ari maneko y’u Rwanda ndetse ko atunze imbunda, agafungwa azira ubusa.

Henry Mugisha yaregeye urukiko ko bamuhimbiye ibirego agafungwa, nyuma y’iperereza bigaragaza ko arengana ararekurwa. Ibirego bamuhimbiye ni ibyaha bishobora guhanishwa igihano cy’urupfu cyangwa gufungwa burundu.

Kumugambanira kwatangiye mu gihe bari basangiye ubucuruzi binyuze mu kigo Lloyd FX, Sulah Nuwamanya na Prosy Bonabaana na Mugisha bakaba abanyamigabane bacyo. Ibibazo byakuze ubwo mu nama yo ku wa 23 Werurwe 2020, Mugisha yababazaga ku irengero rya $35 000 y’ikigo.

Aba binjiye mu biro bya Mugisha batwara ibitabo by’imari by’ikigo, baniba $2500, atanga ikirego mu rukiko n’ubu kigikurikiranwa. Ngo bamaze kumenya ko ibyo bakoze bitemewe, batangiye kumutera ubwoba ko nadahagarika ibyo birego bazamutanga mu nzego z’umutekano.

Umwe mu bahaye amakuru IGIHE, yavuze ko ubwo Mugisha yatangaga ikirego kuri CID, ngo yatewe ubwoba na Prossy Bonabaana kuko afite abarinzi b’abapolisi yahawe na Museveni.

Ati “Bagiye kumutera ubwoba babakoraho iperereza, nguko uko ibindi birego byagiye bihishurwa. Ubu rero barakekwaho ibyaha ndetse barimo gukorwaho iperereza ku cyaha cy’iterabwoba ndetse n’ubucuruzi bw’intwaro”.

Inyandiko ihamagaza Nuwamanya, Bonabaana n’undi witwa Thomas Sankara yo kuwa 7 Nzeri 2020, ibasaba kwitaba polisi kuwa Mbere tariki 14 Nzeri 2020, ngo babazwe ku byaha bakekwaho.

Umwe mu basesenguzi yagaragaje ko Nuwamanya na Bonabaana ‘barimo gusahurira mu mubano mubi uri hagati y’u Rwanda na Uganda. Nta kazi bagira icyo bakora ni ugukangisha gusebanya ku banya-Uganda cyangwa n’abanyarwanda bagiye kwishakira amahahiro ariko birumvikana bafite n’abantu bo muri CMI bakorana nabo’.

Undi yagize ati “Ishami rishinzwe gukora iperereza muri polisi ririmo kubakoraho iperereza, barabamenye niyo mpamvu babahamagaje. No mu nzego z’umutekano barabamenye ko babaha amakuru y’ibinyoma bagafungisha abantu”.

Akomeza agira ati “Aba bantu bashobora gufungwa imyaka myinshi cyane. CMI itangiye kubona ko bagiye hari aho bayibeshya henshi”.

Sulah Nuwamanya yabaye umunyamakuru wa The New Times Publications, yize mu Rwanda ndetse afite n’indangamuntu y’u Rwanda, nubwo yari Umunya-Uganda, aza kwinjira mu bikorwa byo guhungabanya umutekano warwo no gutoteza Abanyarwanda baba muri Uganda.

Sulah Nuwamanya akorana na RUD-Urunana [aba bagabye ibitero mu Kinigi bica abaturage] abafasha mu bijyanye n’intwaro, naho Prossy akomeye cyane ku bya RNC mu gushaka abayoboke bayo no kubakuramo amafaranga.

Sulah Nuwamanya akorana bya hafi na RNC, RUD-Urunana na FDLR mu mugambi wo guhungabanya umutekano w'u Rwanda
Prossy Bonabaana azwi cyane mu gushakira inkunga umutwe w'iterabwoba wa RNC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .