Sr Nayituriki Hélène yatunze agatoki ababyeyi ku busambanyi n’inda zitateguwe ziterwa abangavu

Yanditswe na Ishimwe Deborah
Kuya 31 Kanama 2020 saa 01:30
Yasuwe :
0 0

Ababyeyi barashinjwa kudahanura abana babo no kutabaha urugero rwiza, ibintu bituma ingeso y’ubusambanyi ikomeje kwiyongera mu rubyiruko ndetse n’umubare w’abangavu baterwa inda buri munsi ukarushaho kwiyongera.

Imibare ya Minisiteri y’Uburinganire n’Iterambere ry’Umuryango (Migeprof), igaragaza ko mu 2016 abakobwa 17500 bari hagati y’imyaka 16 na 17 batewe inda zitateguwe. Bivuze ko nibura ku munsi umwe abana b’abakobwa 47 babyaye mu gihugu cyose.

Iyi mibare yatumye inzego z’igihugu zihaguruka zirushaho gukora ubukangurambaga zisaba ababyeyi kwita ku burere bw’abana babo babarinda icyabashobora mu bishuko bibaviramwo guterwa inda.

Uretse ibi, Leta kandi yakajije ibihano ku batera inda abana bataruzuza imyaka y’ubukure, itegeko ryateganyijwe ko gusambanya umwana uri munsi y’imyaka 18 bihanishwa igifungo kitari munsi y’imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y’imyaka 14 igihano kiba igifungo cya burundu kidashobora kugabanywa naho iyo byamuteye indwara idakira cyangwa ubumuga, igihano kiba igifungo cya burundu. Iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu.

Nubwo ibihano byakajijwe, ukurikije imibare ntabwo ibyo byaha byagabanyutse cyane.

Uruhare rw’ababyeyi mu busambanyi n’inda zitateguwe biri mu rubyiruko

Umuyobozi w’ishuri rya Lycée Notre Dame de Citeaux ndetse akaba n’umwe mu bamenyekanye cyane mu burezi bw’u Rwanda kubera inama adasiba kugira urubyiruko n’ababyeyi, Soeur Nayituriki Hélène asanga hari uruhare ababyeyi bagira mu myitwarire mibi y’abana babo.

Mu kiganiro Televiziyo y’u Rwanda yagiranye na Sr Hélène Nayituriki, yavuze ko asanga hari uruhare runini rw’ababyeyi mu myitwarire mibi yugarije urubyiruko irimo ubusambanyi ari nabwo ntandaro y’inda zitateguwe mu bangavu.

Yagize ati “Abantu bakuru nitwe dufite uruhare runini mu iterwa inda ry’abangavu kuko aho kubaha impanuro z’uko bagomba kwitwara neza ahubwo dusigaye tubigisha uko bajya mu busambanyi. Urugero aho usanga umubyeyi yigisha umwana we gukoresha gapote aho kumwigisha kwifata no kwitwara neza, akamwahura aho kumurinda.”

Yakomeje agira ati “Niba umwana asanga umubyeyi we abikorera ku karubanda cyangwa yambaye ubusa imbere ye, we azabura ate kubyigana? Ababyeyi ntibakibonera abana babo umwanya wo kubaganiriza ngo babahe uburere rero iyo umwana abyumvise ahandi cyangwa kumbuga nkoranyambaga ajya kubigerageza kuko aba atarigishijwe ibyo agomba kumenya.”

Akomeza atunga agatoki kandi bimwe mu biganiro bimwe na bimwe bitangwa, ku mbuga nkoranyambaga byakabaye bibwirwa abakuru nyamara bikagira ingaruka mbi kubana kuko mu myaka yabo baba bafite amatsiko kandi bakunda kugerageza ibyo bumvise.

Ni muri urwo rwego Sr Hélène avuga ko byakabaye bishakirwa ubundi buryo bitangwamo butambitse ubusa ibyo bashatse kuvuga kuko biba birenze ubushobozi bw’ibyo umwana agenewe kwakira, cyane ko nta buryo buhari bwo kubuza uwo mwana kubyumva cyangwa kubireba.

Soeur Nayituriki Hélène avuga ko hari aho ababyeyi badohotse ku burere bw'abana babo ndetse bamwe muri bo bakaba batababera urugero rwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .