Sena yagaragaje ibikwiye kwitabwaho mu ngengo y’imari ya 2020-2021

Yanditswe na Twarabanye Venuste
Kuya 29 Gicurasi 2020 saa 01:24
Yasuwe :
0 0

Sena y’u Rwanda yatanze ibitekerezo ku mbanzirizamushinga y’itegeko rigena ingengo y’imari, igaragaza ibikwiye kwitabwaho birimo amasomo yavuye ku cyorezo cya Coronavirus.

Mu mwaka wa 2020/21, u Rwanda ruteganya gukoresha ingengo y’imari ya miliyari 3245.7 Frw ivuye kuri 3017.1 Frw yakoreshejwe mu mwaka w’ingengo y’imari ushize.

Ni ukuvuga ko iziyongeraho miliyari 228.6 Frw, bingana n’inyongera ya 7.5 % ugereranyije n’ingengo y’imari ya 2019/2020 nkuko bigaragara mu mbanzirizamushinga y’itegeko riyigena Minisitiri w’imari n’igenamigambi, Dr Uzziel Ndagijimana, aherutse kugeza ku Nteko Ishinga Amategeko.

Inteko Rusange ya Sena yateranye ku wa Kane tariki 29 Gicurasi 2020 yemeje ibitekerezo byayo ku mbanzirizamushinga y’itegeko rigena ingengo y’imari y’umwaka wa 2020/2021, ishimangira ibijyanye no guteza imbere ikoranabuhanga no kwita ku buhinzi, harimo kubika neza umusaruro ubukomokaho.

Ni ibitekerezo byatanzwe nyuma yo kugezwaho, raporo ya Komisiyo y’Iterambere ry’Ubukungu n’Imari yasesenguye iyo mbanzirizamushinga, yagaragajwe na Senateri Nkusi Juvénal.

Muri rusange Inteko Rusange yashimye ingamba zafashwe na Leta y’u Rwanda mu guhangana n’icyorezo cya Covid-19 n’ingaruka cyateye.

Abasenateri bagaragaje ko mu bigomba kwitabwaho mu ngengo y’imari y’umwaka utaha harimo kongera ibikorwaremezo by’ikoranabuhanga no gukemura ibibazo byagaragaraye mu ikoreshwa ry’ikoranabuhanga mu gihe cya Covid-19.

Bagaragaje ko bizatuma rirushaho gufasha mu mitangire ya serivisi, gutunganya serivisi z’imari no gufasha mu myigire n’imyigishirize, nka bimwe mu byagaragaje ko ikoranabuhanga rikewe cyane.

Inteko Rusange ya Sena yasabye kwihutisha gusana ibikorwa remezo by’ubuhinzi byangijwe n’imvura idasanzwe kugira ngo bitangire gutanga umusaruro mu gihembwe cy’ihinga cya C.

Abasenateri basabye ko abaturage bakangurirwa guhinga ibihingwa byera vuba n’ibindi bifasha abaturage kubona ibiribwa mu buryo burambye, ariko bakibutswa no kubika neza umusaruro wabonetse mu buhinzi.

Mu bworozi, Sena isaba ko hashyirwaho gahunda z’ubworozi bw’amatungo magufi kugira ngo bifashe abaturage kuzamura ubushobozi bwabo, kurwanya imirire mibi no kubona ifumbire.

Sena kandi isaba ko mu ngengo y’imari hihutishwa imishinga yo kubaka amacumbi aciriritse mu Mujyi wa Kigali no mu mijyi iwunganira, inzitizi zituma bidindira zigashakirwa ibisubizo kandi bigakorwa mu buryo bitanga imirimo ku batuye iyo mijyi.

Inteko Rusange ya Sena yanasabye ko harangizwa ishyirwaho rya Banki y’Amakoperative ishingiye kuri za Sacco kugira ngo zishobore kubona imarishingiro n’amafaranga yo kuguriza abanyamuryango.

Inteko Rusange ya Sena yashimangiye ko amafaranga agomba gucungwa neza agakoreshwa icyo yagenewe kandi abashinzwe gucunga umutungo bagomba kujya babazwa bakanasobanura uko buzuza inshingano zabo kandi imyanzuro itangwa n’Umugenzuzi Mukuru w’Imari ya Leta ikubahirizwa.

Nk’uko biteganywa n’Itegeko Nshinga rya Repubulika y’u Rwanda n’Itegeko Ngenga rigenga imikorere ya Sena, mbere y’uko ingengo y’imari ya Leta yemezwa burundu, Sena iyitangaho ibitekerezo.

Inteko Rusange ya Sena kandi yatoye Itegeko Ngenga rishyiraho amategeko rusange agenga ibigo bya Leta.

Sena yasabye ko mu ngengo y'imari y'umwaka utaha, hashyirwa ingufu mu bikorwa biganisha ku ikoreshwa ry'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .