Rwanda Mountain Tea yatanze telefoni yemeye muri Connect Rwanda Challenge

Yanditswe na Twarabanye Venuste
Kuya 6 Gashyantare 2020 saa 09:58
Yasuwe :
0 0

Rwanda Mountain Tea yashyikirije MTN Rwanda telefoni 1344 yemeye mu bukangurambaga bwa Connect Rwanda Challenge bugamije kugeza smartphone nibura imwe kuri buri rugo mu Rwanda.

Ku wa 20 Ukuboza 2019 nibwo MTN Rwanda yatangije ubukangurambaga bwa Connect Rwanda Challenge, maze ibigo n’abantu ku giti cyabo batangira kwiyemeza umubare wa telefoni zigezweho bazatanga zigahabwa abadafite ubushobozi bwo kuzigurira hirya no hino mu gihugu.

Icyo gihe Rwanda Mountain Tea yemeye ko izatanga telefoni 1344; kuri uyu wa Kane tariki 6 Gashyantare 2020, nibwo yashyikirije MTN Rwanda sheki ya miliyoni 134 Frw, azagura izo telefoni.

Umuyobozi wa Rwanda Mountain Tea, Kabeja Alain, yavuze ko telefoni batanze zizahabwa abahinzi b’icyayi bakorera mu nganda bakorana na zo.

Yagize ati “Tuzihaye abafatanyabikorwa bacu aribo bahinzi b’icyayi bari mu nganda zirindwi dukorana nazo umunsi ku wundi.”

Umuyobozi wa MTN Rwanda, Mitwa Kaemba Ng’ambi, yavuze ko intego ari ugukusanya telefoni nyinshi zishoboka ku buryo zagera ku batazifite bose kandi ko uburyo Abanyarwanda bari kwitabira kuzitanga bushimishije.

Yavuze ko kuva mu Ukuboza abantu bamaze kwemera telefoni zigera ku bihumbi 43 bitanga icyizere gikomeye kuko nibura buri cyumweru hatangwa ibihumbi 10.

Ati “Intego yari ugukusanya telefoni nyinshi zishoboka zagera kuri buri wese utayifite. Turashimira Rwanda Mountain Tea itwiyunzeho muri uru rugendo.”

Mu Rwanda hari ingo miliyoni 2.8, intego ni uko buri rugo nibura rwagira smartphone, nyuma y’igihe, intego ikaba yaba ko buri wese yayigira.

Minisitiri w’Ikoranabuhanga na Inovasiyo, Ingabire Paula, yashimiye Rwanda Mountain Tea iri mu ba mbere bemeye gutanga telefoni no kuzishyikiriza Abanyarwanda, avuga ko bizatuma abahinzi bagera ku ikoranabuhanga.

Ati “Ni byiza kubona abantu benshi bemeye gutanga telefoni ku batazifite. Abahinzi barazihabwa nabo baraba bari kumwe n’abandi mu ikoraabuhanga”

Rwanda Mountain Tea ikorana n’inganda z’icyayi zo mu turere twa Nyabihu, Ngororero, Nyamasheke na Rutsiro mu Burengerazuba naho mu Majyepfo hari Nyamagabe na Nyaruguru. Izo nganda zikoramo abarenga ibihumbi 20 habariwemo na ba nyakabyizi. Abantu 1344 muri bo batagiraga smartphone bakaba bazibonye.

Rwanda Mountain Tea yatanze telefoni muri Connect Rwanda Challenge zizahabwa abahinzi b'icyayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .