Malaria y’igikatu yagabanutseho 38% mu Rwanda mu myaka ibiri ishize

Yanditswe na Ndahayo Emmanuel
Kuya 12 Nzeri 2020 saa 05:32
Yasuwe :
0 0

Raporo ya Ministeri y’Ubuzima mu Rwanda ku ndwara ya malaria, igaragaza ko imibare y’abarwara iyi ndwara mu gihugu yagabanutse cyane, bitewe ahanini n’ingamba zagiye zifatwa zijyanye no kuyihashya.

Iyi mibare igaragaza ko abanyarwanda 401 ku 1000 barwaye malaria muri 2017-2018, ariko nyuma y’imyaka ibiri, bakaza kugabanuka cyane bakagera kuri 200 ku 1000 muri 2019-2020.

Muri rusange, abarwayi ba malaria y’igikatu na bo baragabanutse, bagera ku 4.358 bavuye kuri 7.054 muri 2018-2019.

Imibare y’abitaba Imana kubera iyi ndwara na yo yagabanutseho 105, mu mwaka wa 2018-2019. Abana bari munsi y’imyaka itanu bitabye Imana ari 41, bingana na 25% by’abahitanwe n’iyi ndwara bose.

Muri rusange, igabanuka ry’ubukana bwa malaria rishingira ku iterambere ry’urwego rw’ubuvuzi mu Rwanda, gahunda yo kuvurira ubuntu abari mu cyiciro cya mbere n’icya kabiri ndetse no gushyiraho gahunda zo kurwanya malaria mu miryango.

Nk’urugero, abanyarwanda bato n’abakuru bagana serivisi z’ubuvuzi bavuye kuri 13% muri 2015-2016, bagera kuri 58% muri 2019-2020.

Iyi raporo ikavuga ko “ibi bigaragaza ko uburyo bwo guhangana na malaria nko kuvurira abana n’abantu bakuru mu rugo byatumye malaria iboneka hakiri kare, ndetse n’uburyo bwo kuyivura bwatanze umusaruro mu kugabanya imibare y’abarwaye malaria y’igikatu, ndetse n’abahitanwa na yo”.

Ibi bishingiye kuri gahunda ya leta yo gukoresha abajyanama b’ubuzima mu guhangana na malaria, aho bafite ubushobozi bwo gupima, kuvura ndetse no kwita ku murwayi wa malaria muri rusange kugeza yorohewe.

Ingamba zirimo kuvuza abo mu cyiciro cya mbere n’icya kabiri barwaye malaria kandi na zo zatanze umusaruro, kuko zafashije abadafite amikoro bajyaga barembera mu rugo, kubona uburyo bwo kwivuza.

Umuyobozi w’Agashami gashinzwe kurwanya malaria n’izindi ndwara zandura, mu kigo cy’Igihugu cy’Ubuzima, RBC, Dr, Aimable Mbituyumuremyi, yavuze ko usibye izo ngamba zafashwe, hari n’izindi zitandukanye zirimo gushyirwa mu bikorwa zose zigamije kurandura malaria, burundu, zirimo nko gutera imiti yica imibu itera malaria ndetse no gutanga inzitiramibu ku baturage.

Iterwa ry’imiti mu nzu rishingira ku gihe malaria iba yakajije umurego mu gihugu, cyane nyuma y’amezi y’itumba, arimo Ugushyingo, Ukuboza na Mutarama. Iki cyorezo kandi cyongera gukaza umurego muri Gicurasi na Kamena, nyuma y’imvura yo muri Mata.

Mbituyumuremyi yavuze ko bafite gahunda yo gutera umuti mu turere 13 tuzwiho kugira malaria nyinshi, ari two Kayonza, Rwamagana, Gatsibo, Huye, Nyanza, Gisagara, Rusizi, Kamonyi, Ruhango Bugesera Ngoma, Nyagatare na Kirehe.

Ni mu gihe kandi uturere 24 two mu gihugu tumaze gutangwamo inzitiramibu, aho leta yiyemeje kuzajya itanga izigera kuri miliyoni 7.5 buri myaka ibiri.

Agaciro k’inzitiramibu imwe ni 4$ (arenga 3.868 Frw) mu gihe bitwara miliyoni 2.5$ (arenga miliyari 2.4 Frw) kugira ngo leta itere umuti mu karere kamwe.

Gahunda yo gutanga inzitiramibu imaze kugera mu turere 24 tw'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .