Rwanda FDA muri gahunda yo gushyiraho amabwiriza agenga iyamamazwa ry’ibiribwa n’imiti

Yanditswe na Uwimana Abraham
Kuya 16 Ukwakira 2020 saa 06:39
Yasuwe :
0 0

Ikigo gishinzwe kugenzura Ibiribwa n’Imiti mu Rwanda, Rwanda FDA, cyatangiye gahunda yo gushyiraho amabwiriza n’imirongo ngenderwaho izagenga iyamamazwa ry’ibiribwa n’imiti, hagamijwe ko umuturage ahabwa amakuru y’ukuri atamuyobya hagamijwe kumureshya ngo agure igicuruzwa runaka.

Mu gihe cy’icyumweru gishize, Rwanda FDA iganira n’abafatanyabikorwa, yabamurikiye umushinga w’inyandiko ikubiyemo amabwiriza n’imirongo ngenderwaho bizagenga iyamamazwa ry’ibiribwa n’imiti kugira ngo babyunguraneho ibitekerezo mbere y’uko byemezwa bigatangira gukurikizwa.

Umuyobozi w’Ishami rishinzwe gukurikirana Ubuziranenge n’Ingaruka z’Imiti n’Ibiribwa muri Rwanda FDA, Ntirenganya Lazare, yavuze ko impamvu yo gushyiraho aya mabwiriza n’imirongo ngenderwaho ari uko wasangaga hari abamamaza babeshya rubanda bagamije kwikururira abakiliya hatitawe ku buzima bw’abaturage.

Yagize ati “Tugomba kugenzura amakuru akoreshwa mu kwamamaza bigendereye kurinda ubuzima bw’abaturage rusange. Mu by’ukuri nk’uko bigaragara ntabwo byari bimeze neza, hari imiti n’ibiribwa bamamaza mu buryo butemewe bavuga amakuru atariyo ashobora kuyobya abaturage, bakaba bagura ikintu bagendeye ku makuru bahawe atari yo.”

Aya mabwiriza Rwanda FDA iri kuganiraho n’abafatanyabikorwa, areba iyamamazwa ry’ibiribwa n’ibijyanye na byo, imiti, ibikoreshwa mu gusukura umubiri n’imiti y’amatungo. Hakaba hagamijwe kujya hagenzurwa ko amakuru akoreshwa byamamaza ari ukuri hashingiwe kuri siyansi.

Ku bijyanye no kugenzura niba ibivugwa n’abavuzi gakondo ku miti bakoresha ari ukuri, Ntirenganya yavuze ko bazakorana n’inzego zitandukanye kugira ngo hamenywe mu by’ukuri ikiri muri iyo miti kivura ndetse n’indwara gishobora kuvura.

Yagize ati “Twabiganiriyeho tubona ko ari ibintu bikeneye ko tugira ubufatanye n’inzego zitandukanye, zirimo abashakashatsi, za laboratwari zidufasha kugira ngo tumenye tuti ese wa muti koko ni iki kirimo kivura (active ingredient), urumva rero ni ubufatanye bw’inzego bukenewe kugira ngo tugende tubishyira ku murongo.”

Bamwe mu bahagarariye inganda zitunganya zikanacuruza ibiribwa baganiriye na IGIHE, bavuze ko bishimiye ishyirwaho ry’aya mabwiriza kuko bizafasha abaturage kumenya koko ukuri ku byo bagura ubundi bakihitiramo.

Umuyobozi ushinzwe ubuziranenge mu ruganda rwa Inyange Industries Ltd, Bahati Jean Claude, yavuze ko bishimiye ishyirwaho ry’aya mabwiriza kuko bizatuma abakoresha ibiribwa n’ibinyobwa byabo barushaho kubagirira icyizere.

Yagize ati “Iki gikorwa njyewe ndagishyigikiye, ku buryo umunsi iri tegeko rizaba ryashyizwe ahagaragara, numva bizarushaho kutubera byiza twese, ari abakoresha ibiribwa n’ibinyobwa byacu ari natwe tubikora. Bizatuma abakiriya bacu barushaho kutugirira icyizere.”

Umuyobozi w’Ishami rishinzwe Itunganywa ry’Ibiribwa muri Enterprise Urwibutso Nyirangarama, Uwayo Désire, na we yavuze ko aya mabwiriza azafasha abasanzwe bakora kurushaho kubona abakiliya.

Ati “Ikintu bizadufasha cya mbere, ni uko ba bantu babeshywaga n’iyamamaza ridakwiriye batazaba bakibasha kuyobywa mu buryo bworoshye, noneho bigatuma abakora ibintu bizima babyamamaza mu buryo bukwiriye barushaho kubona abakiliya kandi koko ibyo baje babashakaho akaba ari byo babona.”

Ku ruhande rw’ibitangazamakuru nk’imwe mu nzira zifashishwa mu kwamamaza ibiribwa n’imiti, bamwe mu babihagarariye bavuze ko n’ubwo hazagaragara impinduka mu nzira byanyuragamo kugira ngo imiti n’ibiribwa byamamazwe, nta mpungenge bafite mu gihe hazaba imikoranire myiza hagati y’abatunganya ibiribwa n’imiti na Rwanda FDA.

Rwanda FDA yavuze ko ikiri kuganira n’abafatanyabikorwa harebwa ibyakosorwa n’ibyakongerwa muri aya mabwiriza, nyuma izashingira ku bitekerezo bayihaye, ubundi ibizagaragara ko bigomba gukosorwa bizahita bikosorwa, hanyuma izahite iyemeza asohorwe mu gihe cya vuba kandi ahite atangira no gukurikizwa.

Abatazayubahiriza mu gihe azaba asohotse ngo hari ibihano bibateganyirijwe nk’ibigenerwa n’ubundi umuntu wese warenze ku mabwiriza ya leta.

Bahati Jean Claude ukorera Inyange Industries Ltd yavuze ko aya mabwiriza azatuma abakiliya barushaho kubagirira icyizere
Benshi mu bafatanyabikorwa ba Rwanda FDA bari bitabiriye ibi biganiro byari bigamije kurebera hamwe ishyirwaho ry'aya mabwiriza
Bunguranye ibitekerezo kuri uyu mushinga w'amabwiriza
Umukozi wa Rwanda FDA, Mutimukeye Nicole, asobanurira abafatanyabikorwa ibikubiye mu mabwiriza ari gutunganywa
Rwanda FDA yashimye inyunganizi n'ibitekerezo yaherewe muri iyi nama ivuga ko izabigenderaho hategurwa inyandiko ya nyuma

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .