Rwamagana: Access Bank yishyuriye imiryango 39 ubwisungane mu kwivuza

Yanditswe na Twarabanye Venuste
Kuya 16 Ugushyingo 2019 saa 07:46
Yasuwe :
0 0

Abaturage 162 bo mu miryango 39 yo mu Murenge wa Muyumbu mu Karere ka Rwamagana, barishimira ko bagiye kujya bivuza neza, nyuma yuko Access Bank Rwanda Plc ibishyuriye ubwisungane mu kwivuza.

Hashize amezi agera kuri atanu umwaka wa mituweli utangiye, ariko hari abaturage bo mu Murenge wa Muyumbu batarabasha kwiyishyurira ubwisungane mu kwivuza kubera ubushobozi buke.

Muri gahunda y’ubukangurambaga bwa Access Bank yo kwimakaza ubuzima bwiza no kwita ku bidukikije, kuri uyu wa Gatandatu yishyuriye mituweli abaturage 162 bagize imiryango 39 yo muri uwo murenge mu gikorwa cyahuriranye no kubakira umuturage utari ufite aho akinga umusaya.

Batamuriza Olive ufite umuryango w’abantu bane yavuze ko yishimiye ko arwaye atarembera mu rugo.

Ati “Byandenze rwose nishimye cyane. Icyatumye ntabasha kwiyishyurira ni ubushobozi buke. Ikintu kintunze ni uguca inshuro hanze, sinabashaga kubona mituweli.’’

Mugenzi we Akimana Costasie, ufite umuryango w’abantu batatu, avuga ko guhura n’ubukene byatumye atabasha kubona uko yishyura mituweli y’umuryango wose.

Ati “Hari igihe umuntu ahura n’ikibazo cy’ubukene kugira ngo abashe kwishyura mituweli bikageraho bikamugora, ariko ubu ndishimye.”

Umuyobozi w’Ishami rishinzwe Abari n’Abategarugori muri Access Bank, Rutabayiro Nadine, yavuze ko bashyizeho ubukangurambaga bwo kwita ku buzima bw’abaturage mu gusigasira amagara yabo ndetse no kubukungabunga ibibakikije.

Ati “Twifuje kuza gufatanya namwe muri ubu bukangurambaga bw’ubuzima n’ibidukikije mu rwego rwo kubungabunda ubuzima bwiza bw’abaturage. Ntabwo twakorera mu gihugu abaturage bari mu buzima bubi.’’

Umuyobozi w’Umusigire w’Umurenge wa Muyumbu, Simpunga Gilbert, yavuze ko inkunga ya Access Bank izamura umubare w’abafite ubwisungane mu kwivuza kandi abaturage bakabaho batuje kuko baba bizeye ko barwaye bakwivuza.

Yavuze ko Mukankuranga Clotilde, wahawe umuganda wo kubakirwa inzu afite abantu batandatu, batagiraga aho kuba ariko bagiye kuhabona.

Simpunga yashimye gahunda nziza ya Access Bank yo kwita ku buzima bw’abaturage no kubungabunga ibidukikije.

Imibare y’Akarere ka Rwamagana yo ku wa 15 Ugushyingo 2019 yerekana ko Umurenge wa Muyumbu uri ku mwanya wa 10 mu mirenge 14 igize akarere aho igeze kuri 74.5% mu gutanga ubwisungane mu kwivuza mu mwaka wa 2019/20.

Umurenge uza imbere ni Gishali igeze kuri 84% naho uza inyuma ni Fumbwe ugeze kuri 68.1% mu gihe Akarere ka Rwamagana kageze ku gipimo cya 75.9%.

Abakozi ba Access Bank bifatanyije n'abaturage ba Muyumbu kubakira Mukankuranga Clotilde inzu yo kubamo
Bafatanyije no kumwubakira n'akarima k'igikoni
Mukankuranga Clotilde yubakiwe aho yari afite ikibanza
Abakozi n'abaturage bafatanyije gukora umuganda
Simpunga Gilbert yabwiye abaturage ko nta kundi kurembera mu rugo
Umuyobozi w’Ishami rishinzwe Abari n’Abategarugori muri Access Bank, Rutabayiro Nadine, yavuze ko baharanira ko abaturage babaho mu buzima bwiza
Umuyobozi w'Umusigire w'Umurenge wa Muyumbu, Simpunga Gilbert, yavuze ko inkunga ya Access Bank ifasha abaturage kubaho batuje kuko baba bizeye ko barwaye bakwivuza biboroheye
Akanyamuneza ku miryango 39 yahawe mituweli n'abakozi ba Access Bank nyuma y'umuganda wo kubakira umwe mu baturage utishoboye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .