00:00:00 IGIHE NETWORK KN KINYARWANDA EN ENGLISH FR FRANCAIS

Ruvebana wahoze muri MIDIMAR agiye kuburanishwa ku gusambanya umwana

Yanditswe na Ntabareshya Jean de Dieu
Kuya 5 Mutarama 2023 saa 04:15
Yasuwe :

Ruvebana Antoine wigeze kuba Umunyamabanga Uhoraho muri Minisiteri yari ishinzwe ibiza n’impunzi, MIDIMAR, ukurikiranyweho icyaha cyo gusambanya umwana agiye kuburanishwa nyuma y’igihe kitari gito urubanza rwe rusubikwa.

Uyu mugabo yatawe muri yombi ku wa 11 Ukuboza 2021 ndetse dosiye ye ijyanwa mu Bushinjacyaha, aho yakiriwe tariki 16 Ukuboza 2021.

Ruvebana ufungiye muri Gereza ya Nyarugenge i Mageragere, yatangiye inzira zo kuburana muri Nzeri 2022 mu Rukiko Rwisumbuye rwa Gasabo ariko urubanza rugenda rusubikwa ku mpamvu zinyuranye.

Ubusanzwe urubanza rwa Ruvebana rwagombaga kuburanishwa ku itariki 12 Nzeri 2022 ariko ruza gusubikwa ku busabe bwe kuko yavugaga ko atabashije guhura n’umwunganizi we rushyirwa ku wa 12 Ukwakira 2022.

Iyi tariki igeze ntabwo rwabaye ariko ku busabe bw’Ubushinjacyaha bwanditse busaba ko imanza zari zihari kuri uwo munsi zasubikwa kubera ko bwari bufite imanza nyinshi rwimurirwa kuri 14 muri uko kwezi.

Ntibyatinze kuri uwo munsi rwarasubukuwe ariko hifashishijwe ikoranabuhanga. Byatumye Ruvebana asaba ko yazanwa ku rukiko bityo urubanza rurasubikwa rwimurirwa ku wa 6 Mutarama 2023.

Ubwo urukiko rwasubikaga urubanza, rwavuze ko ari ku mpamvu z’ubwire. Rwavuze ko ruzatangira kumva abatangabuhamya muri uru rubanza ku wa Gatanu tariki ya 6 Mutarama 2023 i saa tatu za mu gitondo mu Rukiko Rwisumbuye rwa Gasabo.

Ruvebana yabaye Umunyamabanga Uhoraho muri MIDIMAR mu myaka ya 2012 avaho mu 2017 ubwo yasimburwaga na Kayumba Olivier.

Ubushinjacyaha busobanura ko yagiye asambanya abakobwa batandukanye ari nayo mpamvu hazatangwa ubuhamya mu iburanisha nubwo ababutanga bahawe kode mu guhisha umwirondoro wa bo.

Ubwo yafatwaga hari amakuru yavuga yatangiye gusambanya abo bakobwa kera bamwe batarageza n’imyaka y’ubukure. Ngo bamwe yabashukishaga ibintu bitandukanye birimo n’imyambaro kugira ngo abigarurire.

Hari umutangabuhamya wigeze kubwira IGIHE ko Ruvebana mu myaka ya 2006 yigeze kujya gukorera mu Busuwisi muri Ambasade y’u Rwanda. Muri icyo gihe ngo nabwo hari abakobwa yasambanyije gusa ntibigeze bagira imbaraga zo kubivuga kuko bumvaga ari igisebo kuri bo kandi bishobora kubagiraho ingaruka.

Amakuru avuga ko abo bakobwa hafi ya bose yabasambanyije hagati ya 2003 na 2006.

Ku rundi ruhande, amakuru avuga ko umwe mu bakobwa yasambanyije nawe amaze igihe kinini abana n’ihungabana ku buryo uko imyaka igenda ishira, arushaho kumererwa nabi.

Ubusanzwe gukorana imibonano mpuzabitsina n’ibifitanye isano na yo n’umuntu utarageza ku myaka 18 byitwa gusambanya umwana.

Byitwa gufata ku ngufu iyo ibi byaha bikorewe umuntu ufite imyaka 18 kuzamura cyangwa se bishobora no kwitwa gusambanya ku gahato bitewe n’uburyo icyo cyaha cyakozwemo.

Ingingo ya 133 y’itegeko rigenga ibyaha n’ibihano ryo mu 2018 itegenya ko umuntu wese ukoze ukorera ku mwana kimwe mu bikorwa bishingiye ku gitsina birimo gushyira igitsina mu gitsina, mu kibuno cyangwa mu kanwa k’umwana; gushyira urugingo urwo ari rwo rwose rw’umubiri w’umuntu mu gitsina, cyangwa mu kibuno cy’umwana no gukora ikindi gikorwa cyose ku mubiri w’umwana hagamijwe ishimishamubiri aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka 20 ariko kitarenze imyaka 25.

Ruvebana Antoine wigeze kuba Umunyamabanga Uhoraho muri MIDIMAR akurikiranyweho gusambanya umwana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .