Rutsiro: RIB iri gushakisha agatsiko k’abajura bitwaje intwaro gakondo kibye Sitasiyo ya lisansi

Yanditswe na Mukwaya Olivier
Kuya 16 Nzeri 2020 saa 05:00
Yasuwe :
0 0

Urwego rw’Ubugenzacyaha, RIB, rwatangaje ko ruri gushakisha agatsiko kitwaje intwaro gakondo (imihoro, ibisongo, Fer à béton n’amabuye) kibye kuri sitasiyo ya lisansi mu Karere ka Rutsiro mu Murenge wa Kivumu.

Byabaye mu ijoro ryo kuri uyu wa Mbere rishyira kuwa Kabiri tariki 15 Nzeri 2020 ahagana saa saba z’ijoro, bivugwa ko ubwo bujura bwakozwe n’agatsiko k’abantu 15 kitwaje intwaro gakondo.

Abo bajura bibye ibihumbi 200 Frw n’ibicuruzwa mu iguriro riri kuri iyo sitasiyo. Baninjiye ahabikwa lisansi batwara mudasobwa ebyiri n’amafaranga ibihumbi 15000.

Umuvugizi w’Umusigire w’Urwego rw’Ubugenzacyaha, RIB, Dr. Murangira B. Thierry, yavuze ko umwe mu bakekwa yafashwe mu gihe bagenzi be bagishakishwa.

Ati “Ibyo bisambo byageraga muri 15, ndetse byitwaje intwaro gakondo, aho bibye mu Murenge wa Kivumu, ubugenzacyaha bugendeye ku buhamya bwahawe bwasanze hibwe mudasobwa, amafaranga n’ibicuruzwa bitaramenywa agaciro.”

“Aba bajura abababonye bavuze ko bari bitwaje intwaro gakondo, bari bameze nk’urubyiruko ndetse umwe muri bo yabashije gufatwa kuri ubu afungiye kuri Sitasiyo ya RIB ya Kivumu mu gihe iperereza rigikomeje kugira ngo n’abandi bafatwe.”

RIB yasabye abaturage gukomeza kugira uruhare mu kwicungira umutekano, kandi bakihutira gutanga amakuru mu gihe babonye ikintu icyo aricyo cyose gishobora kuwuhungabanya.

Abajura bamenywe amadirishya y'iguriro bibamo amafaranga
Kuri iyi station niho hibwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .