Rubavu:Umuyobozi w’abamotari yafataga amadeni akishyurwa na koperative

Yanditswe na Mukwaya Olivier
Kuya 12 Gashyantare 2020 saa 04:42
Yasuwe :
0 0

Ubuyobozi bw’ikigo cy’amakoperative mu igenzura bwakoze bwagaragaje ko umuyobozi w’ihuriro ry’abamotari mu karere ka Rubavu, Safari Phillipe yafataga amadeni noneho akishyurwa avuye mu isanduku y’abanyamuryango, ibi bikaba ari amwe mu makosa yatumye buvanaho komite nyobozi na ngenzuzi.

Byerekaniwe mu nama y’inteko rusange yahuje ubuyobozi bw’ikigo cy’igihugu gishinzwe amakoperative (RCA) n’abahagarariye abamotari.

Amwe mu makosa yagaragajwe ni amadeni menshi arimo ayo umuyobozi afitiye abaturage harimo ayishyurwaga n’imisanzu y’abanyamuryango, amafaranga Airtel itanga ariko ntihamenyekane irengero ryayo, Abayobozi b’ihuriro batanga amabwiriza atandukanye mu miyoborere (Kuvuguruzanya), abatanga imisanzu ni 60% abandi bagakingirwa ikibaba n’abayobozi, amafaranga y’amande 90% ntajya mu ihuriro ahera mu nzira n’ibindi.

Amaze kugaragaza aya makosa, umugenzuzi mukuru ushinzwe imicungire y’amakoperative mu ntara y’iburengerazuba, Jean Damascene Hamisi yavuze ko komite nyobozi na ngenzuzi zikuweho hahita hashyirwaho komite y’agateganyo izategura amatora.

Nyuma yo gukuraho ubuyobozi bwose abari bungirije Safari Phillipe bavuga ko barenganye kuko amakosa ye batari kuyazira mugihe babimenyesheje ubuyobozi.

Kabanda Innocent wari Visi perezida w’ihuriro ry’abamotari mu rwego rw’akarere, yahakanye ibyo bamuvuzeho ku kutumvikana n’uwari umukuriye avuga ko icyo batumvikanye ari ukwiba.

Ati “Twebwe nta kibazo twari dufitanye na bagenzi bacu, kuvanwaho ntabwo tubyishimiye kuko ibyo twavugwagaho nta bimenyetso, ni amagambo kuko kutumvikana ntabwo babigaragaje neza.”

Rwamucyo Emmanuel wari umunyamabanga wa komite yegujwe avuga ko baharaniraga iterambere ry’umumotari ariko bakisanga babangamira inyungu za benshi.

Ati’’Byakozwe mu buryo butari bwo kuko kurega umuntu ibyaha bijyanye n’ibitabo bituzuye ariko n’urwego rubishinzwe rutaratweretse ibyo twakagombye gukora kandi twarabasabye ko baduhugura bakanga kudusubiza, kutumvikana nabyo ntibyakabaye ikibazo kuko kutumvikana mu kurya iby’abandi, twe twaharaniraga iterambere ry’abamotari bikabangamira inyungu z’abandi’’.

Umugenzuzi mukuru ushinzwe imicungire y’amakoperative mu ntara y’iburengerazuba , Jean Damascene Hamisi, yavuze ko kwitwaza ko batahuguwe bagakora nabi bidakwiriye kuba urwitwazo.

Ati “Gukora nabi ntabwo bivuze kudahugurwa kuko ubumenyi barabufite ariko ntabwo ibikorwa bakoze byo kudafasha bagenzi babo, kudafata ibyemezo, kugira amakimbirane hagati yabo, ntabwo twari kubahugura kutagira amakimbirane. Iyo abantu bayobora bagomba gushyira hamwe bagafata icyemezo hamwe kandi bagakurikirana ko gishyirwa mu bikorwa’’.

Imikorere mibi mu ihuriro ry’abamotari i Rubavu ryari rimaze iminsi rivugwa, bamwe mu bamotari bagaragaza ko kuba baririmo bisa nk’aho ntacyo bibamariye.

Abamotari b'i Rubavu bari bamaze igihe binubira imikorere y'ubuyobozi bwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza