Rubavu: Inzu yubakiwe urubyiruko kuri miliyoni 50 Frw ishaje idakoreshejwe

Yanditswe na Mukwaya Olivier
Kuya 26 Ugushyingo 2020 saa 03:33
Yasuwe :
0 0

Urubyiruko rwo mu Karere ka Rubavu rwagaragaje ko rutishimiye kuba inzu rwubakiwe ngo ijye irufasha kwidagadura, igiye gusaza rutayikoresheje icyo yari igenewe kandi yaratwaye amafaranga ya leta.

Iyi nzu iherereye mu Murenge wa Busasamana igizwe n’inzu ebyiri zifatanye yuzuye mu mwaka wa 2011, yari iteganyirijwe gufasha urubyiruko rwo mu Mirenge ya Mudende, Busasamana, Bugeshi na Cyanzarwe kwidagadura, no kuyikoresha nk’ahantu ho kwigira imyuga n’ubukorikori kubera ko nta mashuri yigisha imyuga n’ubumenyi ngiro aba muri utu duce.

Bagaragaza Jean de Dieu ukuriye urubyiruko mu Murenge wa Busasamana, yavuze ko kuva iyi nzu yakuzura, ibikoresho bagombaga guhabwa byigiriye ahandi bigatuma urubyiruko rusigara ntacyo gukora, kugeza ubu inzu itangiye gusenyuka.

Ati ’’Baraje barayubaka, Meya atwizeza ibikoresho none amaso yaheze mu kirere. Twabasabye imashini zo kudoda ku rubyiruko 60 bazana imashini 12, kubera ubwinshi bazihera abantu. Twibereye mu muhanda, naho imyidagaduro no kwiga imyuga byarahagaze, iriya nzu nta kintu yigeze itumarira, yatangiye no gusenyuka.’’

Mugenzi we utashatse ko amazina ye atangazwa, yunzemo ko abayobozi babishinzwe batigeze babegera ngo buzuze ibyo bari babasezeranyije.

Ati “Icyo gihe ubushake twari dufite nk’urubyiruko kwari ugushaka abanyeshuri bahigira, ariko mu bijyanye no kwigisha ntabwo umwana yakwikura amafaranga mu mufuka ntayo afite, akeneye ubufasha. Ni aho byazambiye cyane ko no mu myumvire twumvaga ko ari ikigo cy’Akarere.”

“Iyo abayobozi bashyiramo imbaraga bakaduha ubushobozi, ikigo kigakomera nk’icyo mu Rugerero cyangwa Vision Jeunesse, ubu tuba dukomeye.”

Umunyamabanga Nshingwabikorwa w’Umurenge wa Busasamana, Nsabimana Mvano Etienne, yavuze ko ikibazo cy’uru rubyiruko n’iyi nzu yarwo cyashyikirijwe ubuyobozi bw’Akarere, bwemera ko buzayisana igakoreshwa ibyo yubakiwe.

Ati “Ubushize bari bohereje abahanga bo kudukorera inyigo y’ibikenewe kugira ngo yongere isanwe, nkaba nibwira ko kuri iyi ngengo y’imari bashobora kuzagira icyo badufasha kugira ngo icyifuzo cy’urubyiruko kibashe gushyirwa mu bikorwa.”

Bamwe mu bayobozi mu Karere bemeza ko iyi nzu yuzuye itwaye miliyoni 50 Frw. Yamaze kwangirika ibice bitandukanye birimo igisenge, ubwiherero bwayo burasenyuka ndetse kenshi iba irimo amatungo yagiye kugama imvura.

Yuzuye mu 2011 iginewe urubyiruko ariko nti rwigeze runayikandagiramo
Iyi nzu yatangiye kwangirika
Inzu yatwaye miliyoni 50, imaze imyaka icyenda idakora
Bimwe mu bigize iyi nzu byarangiritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .