00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Hakenewe amabati ibihumbi 100 yo gusana inzu zasenywe na Nyiragongo

Yanditswe na Mukwaya Olivier
Kuya 15 Ukuboza 2021 saa 08:08
Yasuwe :

Ubuyobozi bw’Akarere ka Rubavu bwatangaje ko hakenewe amabati ibihumbi 100 yo gusana inzu zigaye muzasenywe n’imitingito yatewe n’iruka ry’ikirunga cya Nyiragongo muri Gicurasi 2021.

Ibi byatangajwe ku wa Kabiri ubwo imiryango 50 yo mu Murenge wa Rubavu yasenyewe n’iruka rya Nyiragongo yashyikirizwaga inkunga y’amabati 1600. Ni inkunga yabonetse ku bufatanye n’umuryango Action Aid.

Abaturage bagobotswe bahawe amabati asaga 1600 n’akanyamuneza kenshi bavuga ko bari bamaze igihe batuye mu nzu zimeze nko kurara hanze.

Icyitegetse Goreth, wo mu Kagari ka Burinda mu Murenge wa Rubavu yavuze ko bari basanzwe bameze nk’abarara.

Ati “Njyewe nararaga mu nzu imeze nko kurara hanze, imyenda yacu yaducikiyeho. Ndetse turasaba ko twakomeza gufashwa nko kubona imisumari n’ibindi bintu kuko twasubiye inyuma rwose.”

Hakizimana Innocent nawe yunzemo, ashima impano y’amabati avuga ko bagiye kwirwanaho bakabona ibiti n’imisumari bakongera kwiyubakira inzu.

Ati “Inzu yanjye yasenywe n’imitingito, amabati yose arangirika ku buryo twari tumeze nk’abantu barara hanze. Kuba mbonye aya mabati umutima uranezerewe cyane pe, ibisigaye tuzagerageza kwiyambaza abavandimwe turebe ko twabona ibiti n’imisumari.”

Umuyobozi wa Action Aid mu Rwanda, Uwamariya Irene Josephine yavuze ko ubushobozi bwabonetse ari ubw’imiryango 50 y’abagizweho ingaruka n’imitingito yatewe n’iruka ry’ikirunga cya Nyiragongo.

Yakomeje avuga ko uko ubushobozi buzarushaho kuboneka bazakomeza gufasha n’abandi.

Ati “Twabonye ubushobozi bwo gufasha imiryango 50 yagizweho ingaruka n’iruka ry’Ikirunga cya Nyiragongo ryateje imitingito, abakeneye ubufasha ni benshi ariko nanone bushingira ku bushobozi bwabonetse hagafashwa imiryango ikennye kurusha indi, kandi uko ubushobozi buzajya buboneka tuzakomeza kubafasha.”

Umuyobozi w’Akarere ka Rubavu, Kambogo Ildephonse, yavuze ko igikorwa cyo kugoboka abaturage ari icyo kwishimira ariko hakiri abaturage benshi bakeneye amabati asaga ibihumbi 100.

Ati “Iki ni igikorwa cyiza twishimiye, kuko cyagizwemo uruhare n’umufatanyabikorwa ukomeye kandi wita ku baturage bagizweho ingaruka n’Ibiza. Abaturage bakeneye ubufasha baracyahari kuko umubare w’abasenyewe n’ibiza ari munini.”

‘’Imbaraga nyinshi zashyizwemo kandi hasigaye abaturage bakeneye amabati asaga ibihumbi 100 kandi mu ntangiriro z’umwaka utaha dufite icyizere ko hafi ya bose bazaba baramaze gufashwa’’.

Imiryango 50 itishoboye yasenyewe n’imitingito yakurikiye iruka rya Nyiragongo yahawe amabati 1,600 n’ibiro 250 by’imisumari byo kuyifasha gusana, buri muryango wahawe amabati bitewe n’uko wasenyewe ndetse n’ibiro 5 by’imisumari.

Iyi miryango 50 yahawe amabati azayifasha gusana inzu zangijwe n'iruka rya Nyiragongo
Umuyobozi w’Akarere ka Rubavu, Kambogo Ildephonse yavuze ko hagikenewe amabati ibihumbi 100
Umuyobozi wa Action Aid mu Rwanda, Uwamariya Irene Josephine, yavuze ko ubushobozi nibuboneka n'abandi bazahabwa ubufasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .