Rubavu: Hafunguwe irerero rizajya ryakira abana bato barimo abasigaraga ku mupaka

Yanditswe na Mukwaya Olivier
Kuya 23 Gashyantare 2019 saa 03:47
Yasuwe :
0 0

Mu karere ka Rubavu mu bice byegereye umupaka wa Repubulika Iharanira Demokarasi ya Congo, hari abana bahasigwaga na ba nyina ku mupaka no hafi yaho bakajya gukora ubucuruzi bwambukiranya imipaka, bikagira ingaruka zo kuba nta burere buboneye bahabwa.

Gusa iki kibazo ubu cyabaye amateka nyuma yuko hafunguwe ikigo mbonezamikurire cy’abana bato, cyubatswe mu Kagari k’Umuganda, Umurenge wa Gisenyi, agace gaturukamo ababyeyi benshi bajya gucuruza muri RDC.

Uru rugo rw’abana bato rwa Majengo ku musigiti, rwakiriye abana bato bagera kuri 201. Ni imwe mu nyubako zari zisanzwe zihari yavuguruwe hifashishijwe miliyoni 7.5 Frw.

Rwakira abana bari hagati y’umwaka umwe kugeza kuri itandatu, bivuze ko hari abiga mu ishuri ry’incuke. Abana bazajya bagaburirwa bahabwe amata, bitabweho nk’abari mu irerero.

Mukeshimana Francine umwe mu babyeyi barerera muri uru rugo, ashima ubuyobozi bwabagobotse bakaba babona aho basiga abana mu gihe bagiye gushakisha imibereho muri Congo.

Ati “Abana bacu twabasigaga ku mupaka tugiye gushakisha imibereho muri RDC, kuri ubu bagiye kubaho batuje. Turashima Leta yashyizeho iyi gahunda kuko igera ku bana bacu natwe bakatwigisha”.

Ababyeyi bajya gushakira ubuzima muri RDC ntabwo bemerewe kwambukana abana, byatumaga babasigira barumuna babo cyangwa abaturanyi bigatuma nta burere bukwiye bahabwa.

Umuyobozi w’Urugaga rw’amadini ruharanira guteza imbere ubuzima mu Rwanda (RICH), Musenyeri Antoine Kambanda, yashimye uruhare rw’ingo mbonezanikurire mu kuzamura ubuzima bw’abana bakiri bato, asaba ko buri torero ryagira umuco wo kwigira kuri Islam, bagatangiza ibigo mbonezamikurire nk’iki.

Ati “Twese dufite inshingano zo kurera neza abana nibo dutezeho ahazaza heza h’igihugu cyacu [...]. Ndasaba n’abanyamadini bose gushyiraho gahunda nk’izi zigamije kuzamura no kwita ku bana”.

Umuhuzabikorwa wa Porogaramu y’Igihugu Mbonezamikurire y’abana bato, Dr Anita Asiimwe, yashimye ubufatanye bw’inzego zitandukanye cyane iz’amadini bwatumye hubakwa urugo mbonezamikurire ruzafasha abaturage bose kuzamura imikurire y’umwana muto.

Ati “Gahunda y’ingo mbonezamikurire y’abana ni ingenzi, ntacyo twageraho tutaramiye ubuzima bw’ abana ku gihe”.

Yakomeje avuga ko u Rwanda rwiyemeje ko muri 2050 igihugu kizaba cyishoboye, ariko bisaba ko abana bitabwaho uko bikwiye mu minsi ya mbere 1000.

Ubuyobozi bw’idini ya Islam mu Rwanda, bwemeza ko bamaze kubakwa ingo mbonezamikurire y’abana bato zigera kuri 13 ndetse ngo barateganya kubaka ibindi bigo.

Porogaramu y’Igihugu Mbonezamikurire y’abana bato ivuga ko buri mudugudu wagira irerero ry’abana, ku buryo ababyeyi bajya bahasiga abana bizeye uburere bahabwa. Kugeze ubu hamaze kubakwa amarerero 4325, akaba ari gahunda igikomeza.

Ababyeyi barishimira ko babonye aho bazajya basiga abana babo
Ubwo bafunguraga ku mugaragaro irerero
Musenyeri Kambanda yasabye amadini gushyigikira gahunda y'amarerero
Dr Anita Asiimwe aha abana amata
Dr Asiimwe yavuze ko iyi gahunda izatuma u Rwanda rugera ku cyerekezo rwihaye
Mufti w'u Rwanda Hitimana Saleh ageza ijambo ku bitabiriye ifungurwa ry'irerero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza