Rubavu: Abantu 27 batawe muri yombi nyuma y’ubwicanyi bwahitanye barindwi

Yanditswe na Mukwaya Olivier
Kuya 3 Werurwe 2020 saa 04:22
Yasuwe :
0 0

Abantu 27 bafunzwe bakekwaho ubwicanyi bumaze guhitana abantu barindwi mu gihe kitarenze icyumweru mu murenge wa Rubavu, bigakekwa ko bushingiye ahanini ku makimbirane.

Ubuyobozi bw’akarere bwasabye abaturage kwerekana ingo zifite amakimbirane kugira ngo bigishwe bitageze aho bicana.

Ibi byagaragajwe mu nama ubuyobozi bw’akarere bwakoresheje abaturage bo mu murenge wa Rubavu mu kagari ka Byahi nyuma y’uko habonetse umurambo w’umugore wishwe n’umugabo bakamushyingura mu mbuga.

Bamwe mu baturage bavuga ko izo mpfu zituruka no ku businzi bwiganje muri uwo murenge.

Dusabimana Thérèse utuye mu kagari ka Byahi, yasabye ubuyobozi kubafasha kurwanya ubusinzi bukabije bugaragara muri aka gace kuko aribwo mvano y’ubwicanyi.

Yagize “Dufite agahinda kenshi kubera impfu z’ubwicanyi zihoraho inaha ukibaza niba umuntu ari itungo babika bakaryica igihe babishakiye. Inaha hari ubusinzi, bahera mu gitondo banywa bakageza saa munani z’ijoro, yaba abagore n’abagabo kuko niho havamo kurwana no kwicana’’.

Ukuriye ingabo mu murenge wa Rubavu, Lt Rwabuhungu Eric yasabye abaturage gutanga amakuru hakiri kare.

Ati “Aho igihugu kigeze si impanuka, ni ingufu byatwaye ngo igihugu kibe kigeze hano. Ntiwabikiniramo tukureba, turabasaba kujya muduha amakuru vuba byihuse kuko ntidushaka kumva urupfu rwo kwiyahura n’ubwicanyi mu murenge wa Rubavu’’.

Umuyobozi w’akarere ka Rubavu, Habyarimana Gilbert yasabye abaturage kwerekana imiryango irimo amakimbirane ikitabwaho.

Ati “Mu midugudu mwicare murebe uko mwashyira hamwe imiryango bizwi ko ibana nabi, mubaganirize kuko ubwicanyi no gukubita mumenye ko umubiri w’umuntu ari ntavogerwa. Kumva ko umuntu yafata undi akamwica, birababaje kubona umuntu abura amezi arindwi yose harabuze amakuru afatika’’.

Mu cyumweru gishize nibwo mu Karere ka Rubavu hamenyekanye amakuru y’uko Nyirantezimana Farida yishwe, umurambo we ukaboneka imbere y’urugo rw’uwahoze ari umugabo we amaze amezi arindwi ashyinguye mu mufuka.

Nsekerabanzi Bahiza wari umugabo we yahise atabwa muri yombi hamwe n’uwari inshoreke ye Nyiransabimana Fillette bakekwaho kwica Nyirantezimana Farida.

Meya Habyarimana yaburiye abaturage bari kuvugwaho gushaka kugirira nabi uwatanze amakuru yatumye abo babiri bafatwa.

Yagize ati “Bambwiye ko hari abaturage bashatse guhohotera umubyeyi w’uriya mugabo wishe umugore we, bashaka kwihorera. Ntabwo umubyeyi yazira icyaha cy’umwana keretse abaye yarabigizemo uruhare nabwo agakurikiranwa mu mategeko’’.

Mu Murenge wa Rubavu mu byumweru bibiri bishize hari abantu bagiye bagaragara bamanitse mu biti basa nk’abiyahuye, ariko bigakekwa ko ari ababica bakabamanika.

Ubundi bwicanyi buheruka ni aho umubyeyi yishe umwana we w’imyaka 10 amuziza amafaranga 5000 ndetse n’umwana wishwe n’abanyerondo .

Abaturage biyemeje gukumira ibyaha cyane cyane iby'ubwicanyi bushingiye ku makimbirane
Abaturage bahawe umwanya wo gutanga ibitekerezo
Amakimbirane n'ubusinzi ni bimwe mu byagarutsweho nk'intandaro y'impfu za hato na hato
Inzego z'umutekano zari zaje kuganiriza abaturage no kubasaba ubufasha mu kwicungira umutekano
Abaturage basabwe gutanga amakuru y'ahari amakimbirane kare
Inzego z'umutekano zari zaje gusaba abaturage kwirinda ubwicanyi
Meya wa Rubavu Habyarimana Gilbert yabwiye abaturage bo mu murenge wa Rubavu ko umubiri w'umuntu ari ntakorwaho
Umunyamabanga Nshingwabikorwa w'Umurenge wa Rubavu, Tuyisenge Annonciata yavuze ko hakenewe ubufatanye bw'abaturage mu kugaragaza ahari amakimbirane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .