Rubavu: Abahoze ari abazunguzayi basubiye mu muhanda bashinja ubuyobozi kubateza igihombo

Yanditswe na Mukwaya Olivier
Kuya 8 Nzeri 2020 saa 10:17
Yasuwe :
0 0

Abagore bacururizaga imbuto mu gasoko ko mu murenge wa Gisenyi, ahazwi nko kwa Rujende, bamaze iminsi barigabije ibice bitandukanye by’Umujyi wa Gisenyi nyuma yo kuvanwa aho bacururizaga, bagashinja Ubuyobozi bw’Umurenge wa Gisenyi kubateza igihombo.

Iki kibazo cyagaragaye nyuma y’uko basohowe aho bari bamaze imyaka ibiri bakorera nyuma yo kuvanwa mu muhanda. Abenshi bongeye gusubira gukorera ku mihanda n’imbere y’amaduka atandukanye yo mu mujyi wa Gisenyi.

Abaganiriye n’Itangazamakuru bavuze ko kuva wa kane w’icyumweru gishize ari bwo ubuyobozi bw’Umurenge wa Gisenyi bwabategetse kuva mu gasoko ko kwa ’Rujende’ nyamara batarigeze bateguzwa .

Bavuga ko intandaro yo kugira ngo bavanwe aho bari basanzwe bacururiza ari uko amasezerano umuryango Femme Active wabafashaga wari ufitanye n’uwari warayikodesheje yarangiye.

Twambazimana Dativa umwe muri abo bagore yavuze ko nta wigeze abateguza none ibyo baranguye bikaba birimo kwangirika kandi uwo bakodeshaga akaba yari yabemereye ahubwo ari ubuyobozi burimo kubitambika.

Ati"Mu by’ukuri biteye agahinda kuza bakakwirukana aho wakoreraga nta wigeze aguha igihe cyo kwitegura, ngo ibyo twaranguye tubanze tubicuruze kuko kuri ubu imari zacu twaranguye zirimo kwangirika. Baratubwiye ngo tugende mu murenge wa Rugerero tubasaba icyumweru baranga imyembe, ibinyomoro,imineke byaraboze baraza bakabimena. Nta kuntu wajya Rugerero kuko ntabwo bagura indimu bigurira ibijumba gusa. Nyiri igipangu twarumvikanye ariko ubuyobozi nibwo bwanze.”

Uworoheje Valentine we avuga ko nyir’ikibanza bakoreragamo yari yemeye ko bakomeza kugikoreramo, gusa ubuyobozi bw’Umurenge wa Gisenyi na Femme Active bagahitamo kubimura mu nyungu zabo bwite.

Ati “Twabaga mu muhanda haza umuryango witwa Femme active badushyira hamwe batuzana hano ngo tuhakorere, ejobundi nibwo baje baradusohora ngo amasezerano bagiranye na nyiri ikibanza yarangiye. Kuwa Gatandatu baraje baradusohora ibintu byacu babijugunya hanze ntitwanze kujya Majengo na Rugerero ahubwo bazaze batujyane barebe ko tutagenda.”

Umunyamabanga Nshingwabikorwa w’umurenge wa Gisenyi,Uwimana Vedaste yavuze ko no kuba bari bahari byari amaburakindi abasaba kujya mu masoko kuko hariya hatemewe.

Ati “Hariya ntabwo ari isoko urebye no mu gishushanyombonera no kuhabashyira ni ukubura uko ugira. Twahabashyize muri 2018 abenshi bava mu Gisa kandi isoko ryaho ryaruzuye n’agasoko ka Majengo, ubu icyo basabwa ni ukujya muri ayo masoko abiri bitewe naho batuye kandi twabiganiriyeho nabo barabyumvishe. Abo mwabonye ni abashatse kuhashyira irindi soko bibwira ko nibavamo hazakomeza kuba isoko’’.

Aba bagore bavuga ko mu isoko rya Rugerero bari gusabwa ibihumbi 40 ngo babone gukoreramo kandi ntayo bafite. Umuyobozi w’Umurenge yabijeje ubufasha ku murenge wa Rugerero kuborohereza.

Bataje akavuyo mu kubasohoramo ku ngufu
Bahisemo gusubira mu muhanda
Ntibiyumvisha ukuntu basohowemo kandi nyiri igipangu yabemereye gukomeza bakarangiza imbuto babitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .