Rubavu: Abagizi ba nabi batwikiye umugore n’abana mu nzu

Yanditswe na Tuyishimire Raymond
Kuya 20 Ukwakira 2020 saa 10:59
Yasuwe :
0 0

Abagizi ba nabi bitwikiriye ijoro batwikira umugore n’abana mu nzu y’uwitwa Majyambere Vedaste utuye mu Murenge wa Nyamyumba ho mu Karere ka Rubavu ariko ku bw’amahirwe ntihagira upfiramo.

Ibi byabaye mu ntangiriro za Nzeri 2020, icyo gihe hari ahagana saa Cyenda z’ijoro ubwo abana bane n’umugore wa Majyambere bari mu nzu.

Majyambere yavuze ko ubwo byabaga yari atarataha ndetse nyuma baje kumuhamagara bamubwira ko inzu ye yahiye yitabaza kizimyamwoto ariko biranga biba iby’ubusa.

Uretse kuba nta wapfiriye muri iyo nzu ariko nta kintu na kimwe cyakuwemo kuko byose byarakongotse.

Majyambere yavuze ko nyuma yaho babanje gukeka ko baba ari abacengezi ariko iperereza riza gusanga ari abo bari bafitanye amakimbirane.

Yagize ati “Hari abantu twagiranye ibibazo mu kwezi kwa munani kujya gushira, tuburana isambu bambwira ko kugira ngo nyibone bazanyica. Bavuga [kandi] ko aho kugira ngo tuyitunge bazatwica bagasibanganya ibimenyetso.”

Majyambere yavuze ko yajyanye ikirego mu Rwego rw’Igihugu rw’Ubugenzacyaha, RIB, ariko ntibahita bagikurikirana. Nyuma abakoze icyo cyaha barafashwe ariko baza kurekurwa.

Yakomeje ati “Ubwo RIB yakoze iperereza nyuma yaho hashize ukwezi, abakoze icyaha, baboherereza urwandiko rubahamagaza (convocation) batinya kwitaba. Iya kabiri bitabye RIB itangira kubakoraho iperereza ndetse baba bafunzwe by’agateganyo. Nyuma y’iminsi icumi bahise babarekura.’’

Icyo gihe RIB yamusobanuriye ko yakoze ibyari bikenewe bijyanye n’icyo amategeko ateganya.

Umwe mu baturanyi b’uyu muryango witwa Nahimana Félix watabaye bwa mbere, avuga ko yaje agasanga umubyeyi n’abana bari kurira, basanga umuriro wabaye mwinshi bihutira gukora ubutabazi bw’ibanze, maze bahamagara Polisi ari nako nabo bagerageza guhosha umuriro.

Yavuze ko ibyabaye atari impanuka isanzwe ahubwo byari byagambiriwe. Ati “Si impanuka isanzwe kuko iyo biba byari guturuka ku muriro w’amashanyarazi, cyane ko natwe twabibonye, twabanje guca insinga ngo zidafatwa, bigaragara ko atari umuriro w’amashanyarazi kuko bari babanje kumena inzu, bigaragara ko ari abagizi ba nabi baje kubikora.’’

Umunyamabanga Nshingwabikorwa w’Umurenge wa Nyamyumba, Murenzi Augustin, avuga ko ikibazo bakimenye bakihutira gutanga ubutababazi bw’ibanze.

Yagize ati “Ikibazo cy’uriya muryango kirazwi, icyo twashoboye gukora nk’ubuyobozi bw’umurenge twabahaye ubufasha bw’ibanze ariko ntibyarangiriye aho twaganirije n’abaturanyi. Habaye igikorwa cyiza cyo kumuremera, bamushakira icyo kurya n’ibiryamirwa ndetse banamuha amafaranga kugira ngo niba hari ikindi akeneye akibone.’’

Ubuyobozi bw’inzego z’ibanze mu Karere ka Rubavu, bwijeje umuryango wa Majyambere Vedaste ko ku bufatanye n’abaturage bazakomeza gufatanya gucunga umutekano wawo.

Inzu yahiye irakongoka
Abagizi ba nabi batwitse iyi nzu bari gushakishwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .