RIB iri gushakisha Zirikana Daniel ukekwaho kwica umugore we

Yanditswe na Prudence Kwizera
Kuya 11 Kanama 2020 saa 08:31
Yasuwe :
0 0

Urwego rw’Igihugu rw’Ubugenzacyaha, RIB, rwatangiye igikorwa cyo gushakisha umugabo witwa Zirikana Daniel wo mu Karere ka Gasabo mu Mujyi wa Kigali ukekwaho icyaha cyo kwica umugore we, akaburirwa irengero.

Itangazo ryashyizwe ahagaragara na RIB ku mugoroba wo kuri uyu wa Kabiri, rivuga ko uwabona Zirikana Daniel yakwihutira gutanga amakuru y’aho aherereye kuri sitasiyo ya RIB cyangwa Polisi imwegereye.

RIB ibinyujije ku rukuta rwayo rwa Twitter, yasabye ko uwamubona ashobora no guhamagara ku murongo w’uru rwego utishyurwa 166 cyangwa Polisi 112.

Umuvugizi wa RIB w’Umusigire, Dr Murangira B. Thierry, yabwiye IGIHE ko ubusanzwe Zirikana Daniel n’umugore we bari batuye mu Mudugudu wa Kabuhunde I mu Kagari ka Kugu mu Murenge wa Kinyinya.

Amakuru y’ibanze avuga ko Zirikana icyaha akekwaho cyo kwica umugore we yagikoze tariki ya 9 Kanama 2020.

Bivugwa ko Zirikana na Kankundiye babanaga nk’umugabo n’umugore mu buryo butemewe n’amategeko kuko batasezearanye. Bari bafitanye amakimbirane yo mu rugo ashingiye ku gucana inyuma ku buryo byageze aho umugore ata umugabo asanga undi bakundanaga.

Ku cyumweru Zirikana yagiye kureba Kankundiye Liliane mu rugo aho yagiye kubana n’undi mugabo, ahageze baramukubita atahana uburakari.

Nyuma yaho ahagana saa Saba z’amanywa Kankundiye Liliane yagiye kwa Zirikana kureba umwana babyaranye yahasize, bararwana ngo umugabo aramuniga amuheza umwaka aramwica.

Umurambo wa nyakwigendera wajyanywe mu Bitaro bya Kacyiru kugira ngo ukorerwe isuzuma naho umugabo akomeje gushakishwa.

RIB yasabye abaturage kwirinda ibyaha kandi bakajya batangira amakuru ku gihe igihe cyose babonye hari ibintu bushobora kuvamo ibyaha kugira ngo bikumirwe bitaraba.

Igitabo cy’amategeko ahana ibyaha mu Rwanda mu ngingo yacyo ya 107 gisobanura ko umuntu wica undi abishaka, aba akoze icyaha. Iyo abihamijwe n’urukiko, ahanishwa igihano cy’igifungo cya burundu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .