Resonate yamuritse porogaramu nshya izafasha mu kubaka ubushobozi bw’umugore

Yanditswe na Ishimwe Israel
Kuya 28 Nzeri 2018 saa 08:08
Yasuwe :
0 0

Umushinga udaharanira inyungu wa Resonate wamuritse porogaramu nshya yo guha ubumenyi abafashamyumvire bazahugura abagore n’abakobwa kwiyubaka no kubakirwaho iterambere rirambye ry’igihugu.

Porogaramu yamurikiwe i Kigali kuri uyu wa 27 Nzeri 2018 iri mu mushinga mugari wo guhishura ubushobozi bw’umugore mu miyoborere no gukoresha neza amahirwe atabyazwa umusaruro mu iterambere ry’Isi na Afurika y’Uburasirazuba (EAC).

Resonate yungutse porogaramu yiyongera ku zirimo iyo kuzamura abagore mu miyoborere (Storytelling for Leadership) bigishwa kwigirira icyizere, kuvugira mu ruhame no gufata ibyemezo; Iterambere ry’umwuga (Professional Development) aho bafashwa gukemura ibibazo, kunoza ihererekanyamakuru ndetse n’amahugurwa “Action Leadership” yo gutoza urubyiruko imiyoborere no gutegura imishinga.

Iki gikorwa cyitabiriwe n’abahagarariye ibigo bikorana na Resonate birimo Women for Women International, Rwanda Women’s Network na Cricket Builds Hope.

Umuyobozi w’Umuryango Women for Women International, Uwimana Antoinette, yavuze ko bita ku gushyigikira iterambere ry’umugore aho kuva mu 1997 wafashije abapfakazi barenga 76 000.

Yagize ati “Dukorana na Resonate kuva mu 2015. Kubaka icyizere mu mugore ni ingenzi kuko iyo bidakozwe ntagera ku ntego ze. Binyuze mu mahugurwa dutanga twabonye umusaruro kuko hari abitinyutse binyuze muri koperative basaba inguzanyo, batangira imishinga.”

Mary Maina ukora mu mushinga wa Cricket Bulids Hope yavuze ko batangiye guhugura abaturiye Stade ya Cricket i Gahanga.

Yagize ati “Dukorana n’abagore bari mu cyiciro cya mbere n’icya kabiri cy’ubudehe bafite imyaka iri hagati ya 19 na 25. Twakoze ubushakashatsi dusanga abari muri iyo myaka bari mu bakene kandi biterwa n’imyumvire ituma bibona nk’abadashoboye.”

Yakomeje ati “Twashyize porogaramu yo kubereka ko hari ibyo bakora bigiriye icyizere no kwimenya kurushaho, bakibanda ku byo bazi.”

Iyi porogaramu yifashisha umukino wa Cricket mu gutanga ubumenyi bwo kwiha intego no kwihangira imirimo yatangiye muri Mata 2018, imaze guhugura abagore basaga 45.

Umuyobozi wa Resonate mu Rwanda, Norette Turimuci, yatangarije IGIHE ko guhuza iyi porogaramu na gahunda z’ibigo biha ubushobozi umugore bigira uruhare mu kumuteza imbere.

Yagize ati “Iyi porogaramu izadufasha kugera ku bagore n’abakobwa benshi mu Rwanda binyuze mu guha ubumenyi abafashamyumvire mu bigo dukorana bazahugura abandi. Nyuma y’amahugurwa abagore bagaragaza ubushobozi batizeraga ko bafite. Hari abagiye bigirira icyizere cyo kwiyamamaza mu nzego za leta. Turifuza gukorana n’ibigo byinshi ngo dukomeze kuzamura ubushobozi bw’abagore.”

Resonate yatangijwe mu Rwanda mu 2013, yibanda ku kuzamura ijwi ry’umugore mu gihugu giha agaciro ihame ry’uburinganire n’ubwuzuzanye.

Resonate yakoranye na Koperative y’abagore yitwa Abahizi Dushyigikirane Company yatangiranye n’abagore b’abadozi 150 b’i Masoro mu Karere ka Rulindo. Kuva mu 2014 yagurishirije ibikapu byayo mu maduka akomeye muri Amerika.

Kuva mu 2014, Resonate yakoranye n’abafatanyabikorwa barenga 50, inahugura mu by’imiyoborere abagore n’urubyiruko 5000 rwo muri EAC.

Mu bitabiriye amasomo yayo mu 2017, abagera kuri 45% babonye imyanya y’ubuyobozi, 38% batangije imishinga na 24% barimo ababonye imirimo mishya, abazamuwe mu ntera n’abakomeje amasomo.

Abatoni Penina wo muri Rwanda Women's Network yasobanuye uko amahugurwa yatumye yimenya ndetse atangira no kwiha intego z'ahazaza
Mary Maina ukora mu mushinga wa Cricket Bulids Hope wubatse Stade ya Cricket i Gahanga yatanze ubuhamya bw'uburyo amahugurwa yamufashije kuzamura urwego rwe rw'imyumvire
Batanze ubuhamya bw'uburyo amahugurwa yabafashije kwiteza imbere
Iki gikorwa cyitabiriwe n'abahagarariye ibigo bitandukanye
Megan Madeira uri mu bashinzwe Itumanaho muri Resonate
Resonate imaze kongerera ubushobozi abagore n'urubyiruko barenga 5000 muri EAC
Umuyobozi w'Umuryango Women for Women International, Uwimana Antoinette, yavuze ko bita ku gushyigikira iterambere ry’umugore

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza