Prof Sam Rugege yanenze abacamanza banga kwiteranya bagahishira bagenzi babo baka ruswa

Yanditswe na Evariste Nsengimana
Kuya 28 Ugushyingo 2019 saa 10:38
Yasuwe :
0 0

Perezida w’Urukiko rw’Ikirenga, Prof Sam Rugege, yavuze ko bitumvikana ukuntu abayobozi b’Inkiko baba bafite amakuru y’ibanze ku bacamanza bashobora kuba baka abaturage ruswa, bakanga kuyatanga ngo batiteranya, bajya no gutanga amanota y’uko bakora bakabaha hejuru ya 80%.

Prof Rugege yabivuze ku wa mbere w’iki cyumweru ubwo hatangizwaga icyumweru cy’Ubucmanza, nyuma y’igitekerezo cyatanzwe na Perezida w’Urukiko Rukuru rw’Ubucuruzi, Bwasisi Germain Mugabo avuga ko mu nkiko hakivugwamo ruswa.

Si ubwa mbere bigaragajwe ko ruswa mu nkiko ivuza ubuhuha nubwo Guverinoma igenda ikaza ingamba zo guhangana nayo, aho yaba itangwa hose.

Umwaka ushize Ubugenzuzi bw’inkiko bwatangaje ko hafi 90% y’amafaranga ya ruswa atangwa mu nkiko atakirwa n’abazikoramo ahubwo ahabwa abitwa abakomisiyoneri, bahuza abayitanga n’abacamanza.

Bwasisi yagize ati “Iyo uganira n’abantu bo hanze bavuga ko mu nkiko habamo ruswa. Njye ngatekereza ko nubwo hari ibyakozwe hakibura byinshi byo gukora kugira ngo iyo myumvire ihinduke.”

Uyu muyobozi yavuze ko uretse n’abantu bo hanze y’inkiko n’abacamanza ubwabo baganira bakabikomozaho ariko bikaba ibintu bidafitiwe ibimenyetso, asaba ko hazabaho ibiganiro byihariye byo kugira ngo bihinduke.

Perezida w’Urukiko rw’Ikirenga, Prof Sam Rugege yibajije impamvu abayobozi b’Inkiko baganira kuri bagenzi babo baka ruswa bakabigira ibanga. Ati “Ko mujya mubiganiraho hagati yanyu, mukaba muzi n’abantu bariye ruswa kuki mutatumenyesha?”

Prof Rugege yavuze ko bitumvikana ukuntu abayobozi b’Inkiko bahereza abacamanza n’abandi bakozi b’inkiko amanota agaragaza ko bakora neza kandi bafite amakuru y’uko hari ibyo batuzuza neza.

Ati “Ntimukwiye gutinya kwiteranya ahubwo niba wowe nk’umuyobozi uri inyangamugayo, ukwiye guharanira ubunyamugayo mu rukiko rwawe niba hari uwo uziho ruswa, cyangwa uyikekwaho hakaba hari ibimenyetso bikeneye kongera gucukumburwa kugira ngo bibe byamuhama, mugomba kubivuga agakurikiranwa.”

Yavuze ko bakwiye guharanira ukuri no kunoza inshingano bagatanga amakuru ku bakekwaho ruswa bagakurikiranwa n’inzego zibishinzwe.

Ati “Ruswa ikomeza kuvugwa mu nkiko zacu kandi koko irahari ntiracika, gusa twakishimira ko yagabanutse bigaragara ariko iracyahari kandi murabizi. Mugomba kudufasha kuyikurikirana.”

Prof Sam Rugege yanenze abayobozi b’Inkiko usanga bafite amakuru y’abakozi baba bakekwaho ruswa ntibayatange, ariko inzego zibishinzwe zabimenya zikaba arizo zibibariza bakemeza ko aribyo batarabivuze.

Umwaka ushize urwego rw’Ubutabera rwagaragaza ko guhera mu 2005 abakozi b’inkiko 32 barimo abacamanza 13, abanditsi b’inkiko 19 n’abakozi batatu b’abacamanza (b’aba aba sous-contract) bari bamaze guhamwa na ruswa cyangwa ibindi bikorwa bijyanye nayo ndetse barabihanirwa.

Ubushakashatsi bwa Transparency International Rwanda mu 2015, bwagaragaje ko ruswa mu nkiko iri ku gipimo cya 9.1 %; bwanagaragaje ko miliyoni 56 z’amafaranga y’u Rwanda ari zo zatanzwe nka ruswa mu nkiko uwo mwaka.

Prof. Sam Rugege yavuze ko bidakwiye kwanga kwiteranya ugahishira umuntu urya ruswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza