Polisi yihanangirije abahinduye ingo zabo utubari muri iki gihe

Yanditswe na Twarabanye Venuste
Kuya 30 Werurwe 2020 saa 10:47
Yasuwe :
0 0

Polisi y’u Rwanda yashimiye imyitwarire abanyarwanda bagaragaje mu cyumweru gishize basabwe kuguma mu ngo, ariko yihanangiriza abahinduye ingo zabo utubari, abakoresha nabi impushya z’ibinyabiziga bahawe n’ababeshya bashaka gusohoka nta mpamvu zikomeye bafite.

Umuvugizi wa Polisi y’u Rwanda CP John Bosco Kabera yabigarutseho mu makuru ya Televiziyo y’u Rwanda ku mugoroba wo kuri iki Cyumweru, ubwo yagaragazaga ishusho y’umutekano mu iyubahirizwa ry’amabwiriza yo kwirinda ikwirakwira rya Coronavirus.

Mu cyumweru gishize yavuze ko hari abagiye babeshya ko bagiye kwa muganga atariho bagiye, avuga ko nibatabireba neza muri iki cyumweru cyatangiye bizarushaho kuba bibi kubera ko bazafatwa. Yavuze ko uretse umuntu ujyanye undi kwa muganga, ariko guhaha hagenda umuntu umwe.

CP Kabera yavuze ko hari abafite impamvu ariko bagaragaje kuzikoresha nabi. Ati “Ugasanga hari nk’Umuryango usohotse ngo ugiye guhaha hagomba gusohoka umuntu umwe, abandi baratuma abana cyangwa bagasohokana na bo, ntabwo byemewe.”

Mu gihe Minisiteri y’Ubutegetsi bw’igihugu, yatangaje ko kunywa inzoga bitabujijwe ahubwo umuntu ashobora kugura icupa akaricyura, akarinywera mu rugo iwe, CP Kabera yavuze ko hari abahinduye ingo zabo utubari.

Ati “Abantu bahinduye ingo zabo utubari, ntabwo byemewe turabihanangiriza. Kunywa inzoga ntabwo ari bibi wayigura ukayitwara iwawe ariko gutumira inshuti n’abavandimwe cyangwa abandi bantu b’inshuti ngo inzoga iryoha isangiwe ntabwo ari byo. Gura inzoga uyinywe wenyine n’undi na we ayinywe wenyine.”

Yavuze ko hari abahawe uburenganzira bwo gutwara ibinyabiziga bakoresha ubwo burenganzira nabi, bashaka gutwara abantu batandukanye n’abo baherewe uruhushya rwo kubigendamo.

Nubwo gutwara abantu kuri moto byahagaritswe ngo hari ababikoze muri iki cyumweru gishize na bo basabwe kubireka, kimwe n’abakoresheje izo moto batwara ibicuruzwa bitemewe muri iki gihe cyangwa ibiyobyabwenge.

Abatwara amakamyo atwara imyaka ngo bagaragayeho imyitwarire yo gutwaramo abantu kandi ubusanzwe amabwiriza ya Minisiteri y’ubuhinzi n’ubworozi, yarabemereye ko igendamo abantu babiri.

Polisi y’u Rwanda irashimira abatanga serivisi ku bwo gushyira abantu ku murongo igihe babakira, bagahana nibura intera ya metero imwe hagati y’umuntu n’undi.

CP Kabera yibukije ko kuguma mu rugo bikomeje kugeza igihe hazasohokera andi mabwiriza arekurira abantu gukomeza ubuzima busanzwe cyangwa yongera igihe cyo kwirinda.

Minisiteri y’Ubuzima mu Rwanda itangaza ku kugeza kuri iki cyumweru abanduye COVID-19 iterwa na Coronavirus, bageze kuri 70.

Umuvugizi wa Polisi, CP Jean Bosco Kabera yihanangirije abafashe ingo zabo bakazihindura utubari muri iki gihe cyo kurwanya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .