00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yasubije abakeka ko u Rwanda rwemeye kwakira abimukira rukurikiye amafaranga

Yanditswe na Philbert Girinema
Kuya 26 June 2022 saa 07:15
Yasuwe :

Perezida Paul Kagame yasubije abakeka ko u Rwanda hari amafaranga rukurikiye mu masezerano rwagiranye n’u Bwongereza yo kwakira abimukira, avuga ko ubikeka atyo yibeshya, ahubwo ko icyo rwakoze ari ugutanga ubufasha rwumva ko bukenewe.

Yabigarutseho mu kiganiro n’abanyamakuru cyakurikiye isozwa ry’inama ya CHOGM yaberaga i Kigali.

Perezida Kagame yavuze ko ibibazo by’abimukira, byabayeho na mbere y’uko u Rwanda rugirana amasezerano n’u Bwongereza yo kwakira abimukira binjiyeyo mu buryo bunyuranyije n’amategeko.

Yavuze ko u Rwanda rufite impunzi nyinshi, yaba izo mu Burundi no muri RDC. Ikindi kandi ni uko mu 2018 ubwo yari Umuyobozi w’Umuryango wa Afurika yunze Ubumwe, u Rwanda rwemeye gufasha abimukira n’impunzi bacuruzwaga nk’abacakara.

Bakiriwe mu Rwanda, ku buryo ubu ibihumbi byabo bafashijwe ku buryo babonye ubuhungiro mu bindi bihugu by’u Burayi, Canada na Leta Zunze Ubumwe za Amerika.

Ati “Twatanze ubufasha mu kibazo cy’aho ibihumbi by’urubyiruko rwa Afurika, rwaheraga muri Libya rushaka kujya mu Burayi ntibabashe kugerayo, bagahera muri Libya, bari muri gereza ndetse rimwe na rimwe bagacuruza nk’abacakara.”

“Twabwiye umuryango mpuzamahanga tuti aho kugira ngo aba bantu babe bari guhura n’ibibazo muri Libya, ntitwabakira mu Rwanda ku buryo ibyo bihugu bishaka kubafasha yaba mu kubasubiza mu bihugu byabo cyangwa se kubajyana aho bashobora kwakirwa, hanyuma abashaka kugumana natwe twabafasha bakagumana natwe.”

Perezida Kagame yavuze ko ku bijyanye n’abimukira bo mu Bwongereza, hari ikibazo cy’uko abantu babisanisha n’amafaranga, bakumva ko u Rwanda hari ayo rwahawe kugira ngo rubakire.

Ati “Wakora iperereza ukareba niba hari umuntu waduhaye amafaranga ku bo muri Libya. Icyabaye ni uko umuryango mpuzamahanga wadufashije kubageza hano, dutanga aho baba, hanyuma dutangira kubafasha.”

Umukuru w’Igihugu yavuze ko hari n’ubwo Israel yari iri kwirukana abimukira binjiye ku butaka bwayo bavuye muri Eritrea, Sudani na Ethiopia nabwo u Rwanda rugatanga ubufasha.

Ati “ Ibiri kuba uyu munsi ntabwo bitandukanye n’ibyabaye mu gihe cyashize. Iki kibazo cy’uko hari amafaranga abirimo abantu bakomeza bavuga, ahanini ni amafaranga yo kwita kuri aba bantu bazanywe hano kuko aho bari bari batemewe.”

Perezida Kagame yavuze ko umwanzuro w’u Rwanda ujyanye n’uburyo rubona ikibazo cy’abimukira. Yavuze ko mu bijyanye n’iki kibazo, harimo ababa baragiye muri ibi bihugu ubusanzwe badakwiriye no kuba bakwakirwa kubera impamvu zibajyanye mu Bwongereza, u Bufaransa n’ahandi.

Yavuze ko nk’ababa bahunga ubutabera baba badakwiriye kwakirwa ariko ko ari umwanzuro ufatwa n’icyo gihugu.

Ati “Bamwe bahunga ubutabera kubera ibyaha bitandukanye bakoze, bagera aho hantu, ntabwo ari ibintu bihita byikora ku buryo bakirwa. Icya kabiri, hari ibyaha bifitanye isano n’ubucuruzi bw’abantu.”

“Hari agatsiko k’abantu gakora ubwo bucuruzi, birazwi muri Afurika no mu Burayi. Niba ibihugu biri kuvuga biti tugomba kugira uburyo bwo kwakira abimukira buciye mu mucyo, ikibazo kiri he?”

Perezida Kagame yavuze ko ibyo u Rwanda ruri gukora, nta muntu n’umwe ubiruhera amafaranga kugira ngo rubikore.

Ati “Iki kibazo cy’abimukira, ni ikintu abantu bazakomeza kugiraho ibitekerezo bitandukanye. Gusa nagerageje gusobanura aho duhagaze n’impamvu tubikemura uko tubikora.”

“Haba hari icyaha turi gukora mu kwemera ko abo bantu baza hano? N’iyo bataza, ntabwo tuzaburana, ntabwo ari nk’aho turambirije ku kuba abantu baza, ahubwo ni uko twagerageje gufasha.”

Umukuru w’Igihugu yavuze ko u Rwanda aho rwavuye, rwishimiye intambwe rumaze gutera kandi ko ruzakomeza gukorana n’abandi kugira ngo rugere ku ntambwe yisumbuye.

Perezida Kagame yavuze ko nta mafaranga na make u Rwanda rwahawe kugira ngo rwakire abimukira bo mu Bwongereza
Perezida wa Sierre Leone, Julius Maada Bio, yashimye intambwe u Rwanda rumaze gutera
Perezida wa Guyana, Irfaan Ali, ni umwe mu bitabiriye ikiganiro n'abanyamakuru cyasoje CHOGM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .