Perezida Kagame yasabye Isi gufatanyiriza hamwe mu guhangana n’icyorezo cya Coronavirus

Yanditswe na Ndahayo Emmanuel
Kuya 23 Nzeri 2020 saa 08:54
Yasuwe :
0 0

Mu ijambo yagejeje ku Nteko Rusange y’Umuryango w’Abibumbye iri guterana ku nshuro yayo ya 75, Perezida Paul Kagame yongeye kugaragaza ko ubufatanye hagati y’ibihugu bituye uyu mubumbe ari ryo zingiro ryo guhashya icyorezo cya Coronavirus kimaze amezi arenga icyenda kiyogoza abatuye Isi.

Perezida Kagame avuze ibi mu gihe ibihugu bitandukanye ku Isi byarushijeho kurebana ay’ingwe muri ibi bihe bya Coronavirus, ibyagize ingaruka ku bufatanye n’imibanire hagati y’ibihugu kandi ari bwo Isi yari ibikeneye cyane.

Yagize ati “Icyorezo cya Covid-19 kimaze gutwara hafi ubuzima bwa miliyoni [y’abantu], kandi yasunikiye benshi mu bizazane bitateguwe. Iki rero si igihe cyo kugenda biguru ndetse no kwikanyiza. Dufite ibizadufasha gutsinda iki cyago no gutera imbere [nyuma yacyo]”.

Umukuru w’Igihugu yavuze ko ubufatanye bw’ibihugu bituye Isi ari bwo buzatuma intego z’iterambere rirambye Isi yiyemeje mu 2015 zigerwaho.

Ati “Hasigaye imyaka 10 mbere y’uko 2030 igera [umwaka izo ntego zigomba kuba zesejwe], rero ntitwibeshye ku buryo bizagorana kwesa izo ntego ku gihe. Ibihugu byinshi, cyane muri Afurika, ntibyari bisanzwe mu murongo wa nyawo [mu kwesa izo ntego] mbere ya 2020. Icyorezo cyazambije iterambere ndetse no kwakira amafaranga ku Isi, kandi bishobora kuzamara imyaka myinshi”.

Yongeye no gushimangira ko urukingo ari rwo mizero yo kuzagarura ibintu mu buryo, asobanura ko Coronavirus ikwiye kuba isomo ku bihugu byose, bigashishikarira mu gushora mu nzego z’ubuzima.

Ati “Gutanga urukingo, imiti n’ubuvuzi kuri bose bizihutisha irangira ry’icyorezo kuri bose. Iki cyorezo cyerekanye akamaro k’ubuvuzi buteye imbere ndetse no gushora muri serivisi z’ubuvuzi bwegereye abaturage”.

Aha kandi Perezida Kagame yahahereye agaragaza akamaro k’Ishami ry’Umuryango w’Abibumbye ryita ku Buzima, OMS, ati “Tuzakomeza guha imbaraga OMS ndetse no kuyifasha gutanga umusaruro ukwiye”.

Perezida Kagame yakomoje ku kamaro ko kurushaho guteza imbere uburinganire, avuga ko ‘nta gihugu na kimwe ku Isi kirabugera byuzuye’, kandi bwarabaye umusingi w’iterambere rusange ku Isi, asaba ko imbaraga zo guteza imbere uburinganire zikwiye gukomeza.

Yanagarutse ku ruhare rw’ikoranabuhanga mu hazaza k’Isi, avuga ko ari ngombwa gushyigikira imishinga igamije kugeza ikoranabuhanga kuri bose. Yashimangiye ko ibi bigomba no kugendana no kubahiriza uburenganzira bwa muntu ku Isi yose.

Perezida Kagame yavuze ku kibazo cy’ihindagurika ry’ikirere, avuga ko amasezerano agamije kugabanya ingaruka z’imihindagurikire y’ikirere yasinyiwe i Kigali n’i Paris akwiye kubahirizwa, kugira ngo azagere ku ntego zayo.

Perezida Kagame yavuze ko Isi ikwiye gufatanyiriza hamwe mu guhangana na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .