00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Mu minsi itanu hatanzwe miliyoni 200 Frw mu gufasha abatishoboye

Yanditswe na Prudence Kwizera
Kuya 4 June 2022 saa 12:58
Yasuwe :

Mu cyumweru cy’Umujyanama n’Umufatanyabikorwa cyamaze iminsi itanu mu Karere ka Nyaruguru hatanzwe ubufasha ku batishoboye bwatwaye amafaranga arenga miliyoni 200 Frw.

Ni icyumweru cyatangiye ku wa 23 kizasozwa ku wa 27 Gicurasi 2022 hagamijwe kureba ibikorwa byakozwe ndetse n’ibisigaye bikeneye gushyirwamo ingufu kugira ngo byihutishwe.

Basuye imirenge itandukanye igize ako karere bagira n’umwanya wo kuganira n’abaturage kugira ngo nabo bakomeze kugira uruhare mu bibakorerwa kugira ngo birambe.

Perezida w’Ihuriro ry’Abafatanyabikorwa mu Karere ka Nyaruguru, Pasiteri Kabarisa Anicet, yavuze ko ibikorwa bakoze birimo gutanga inzu, amatungo, amabati n’ibindi bikoresho ku batishoboye bifite agaciro ka miliyoni zigera kuri 200 Frw.

Hatanzwe inka 28, ihene 246, ingurube 230, telefone 88, ibitenge 458, amabati 735, amashyiga arondereza ibicanwa 245, inkwavu 460, radiyo 35, inzu ebyiri, ibitanda bitandatu, matela 382 n’amasuka umunani.

Hatanzwe n’ibindi bikoresho birimo moto enye, amagare atatu, utugare tw’abana bafite ubumuga, ibikoresho byo kuhira imyaka, amasuka n’ibindi bitandukanye birimo iby’isuku ndetse hatangwa n’ubwisungane mu kwivuza kuri imwe mu miryango itishoboye.

Hubatswe n’ibikorwa remezo birimo ubwanikiro bw’ibigori n’ubuhunikiro bw’ibirayi no kwegereza abaturage amazi meza ndetse n’amashanyarazi.

Kabarisa ati “Twari dufite imihigo tubona ikiri hasi kandi twifuza ko igomba kuzamuka, irimo gukemura ibibazo bibangamiye abaturage no gutanga amatungo. Tuteranyije ibyatanzwe byose n’ibyakozwe nibura bifite agaciro k’amafaranga arenga miliyoni 200 Frw.”

Yavuze ko kuba mu cyumweru kimwe bakoze ibyo bikorwa byabahaye isomo ko bakomeje gushyira hamwe bagera kuri byinshi bagakura abaturage mu bukene.

Ati “Niba mu cyumweru kimwe dushobora gukora ibikorwa bikinjiza miliyoni 200 mu bikorwa bizamura imibereho myiza y’abaturage ni ikigaragaza ko imihigo yose tuzayesa 100%.”

Yavuze ko ikindi bishimira ari uko bazamuye uruhare rw’umuturage mu bimuorerwa kuko bagiye basura abaturage mu ngo, bakaganira nabo bakareba n’uko babyaje umusaruro ubufasha bagiye bahabwa mu bihe byashize.

Bamwe mu baturage bahawe ubufasha bagaragaje ko imibereho yabo igiye guhunduka bakarushaho kubaho neza.

Umuryango wa Mwongereza Simon wo mu Murenge wa Mata mu Karere ka Nyaruguru wishimira ko wahawe inzu yo kubamo ndetse n’amagodora yo kuryamaho.

Ni nyuma y’imyaka myinsi bamaze batuye ahantu habi hafi y’ishyamba mu nzu ya nyakatsi.

Ati “Twabaga muri nyakatsi imeze nabi dufite umwanda turwara amavunja, noneho ubuyobozi butuzana hano mu nzu nziza, baduha n’ibikoresho birimo matola eshatu zo kuryamaho. Hano tumeze neza kuko umuntu aryama agasinzira kandi hri n’isuku.”

Mukantwari Thanasie wahawe ingurube yavuze ko igiye kumukura mu bukene kuko izajya imiha ifumbire kandi yabwagura akabona amafaranga.

Ati “Iri tungo rizankura mu bukene kuko ngiye kujya mpinga nkoresheje ifumbire umusaruro ukiyongera kandi niribwagura nzagurisha ibibwana mbone amafaranga kuko rishobora kubwagira ibibwana 10.”

Umuyobozi w’Akarere ka Nyaruguru, Murwanyashyaka Emmanuel, yavuze ko asabye abaturage bahawe ubufasha kubukoresha neza kugira ngo imibereho yabo ikomeze gutera imbere.

Ati “Umuntu wese uhabwa ubufasha icyo tumusaba ni ukububyaza umusaruro kugira ngo imibereho ye ihinduke myiza. Natwe nk’ubuyobozi tuzakomeza kubaba hafi kugira ngo bibagirire akamaro ariko uruhare rwanyu rurakenewe cyane.”

Usibye ubufasha bwahawe abaturage mu cyumweru cy’ubujyanama n’ubufatanyabikorwa, hatanzwe n’inyigisho zigamije kurwanya imirire mibi, kujyana abana mu ishuri, gukumira inda z’imburagihe, guca ibiyobyabwenge n’ibindi.

Abahinzi bahawe n'ibikoresho bibafasha kuhira
Abahawe inzu zo kubamo bafashijwe no kubona ibiryamirwa
Abatishoboye bahawe n'amatungo magufi arimo ingurube
Abatishoboye banatangiwe umusanzu w'ubwisungane mu kwivuza
Abaturage basabwe kubyaza umusaruro inkunga bahabwa
Abaturage bakomeje kwegerezwa amazi meza
Abaturage basabwe kugira uruhare mu bibakorerwa kugira ngo bihindure imibereho yabo
Abayobozi, abajyanama n'abafatanyabikorwa basuye ibikorwa bitandukanye mu mirenge bareba impinduka biri kuzana
Bahawe amabato yo gusakara ubwiherero
Baganiriye n'abaturage bareba aho bageze biteza imbere
Hatanzwe amabati yo gusakaza inzu
Hatanzwe n'amagare ku bana bafite ubumuga
Muri iki cyumweru hari gutangwa n'inka ku batishoboye
Perezida w'ihuriro ry'abafatanyabikorwa mu karere ka Nyaruguru, Pasiteri Kabarisa Anicet yavuze ko mu minsi itanu bakoze ibikorwa bya miliyoni 200Frw
Meya wa Nyaruguru Murwanashyaka Emmanuel yavuze ko bifuza ko umuturage wese abaho atuje

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .