Nyarugenge: Basabye ko abanyerondo bahabwa amahugurwa kubera imyitwarire idahwitse

Yanditswe na Thamimu Hakizimana
Kuya 20 Mutarama 2020 saa 01:09
Yasuwe :
0 0

Abaturage bo mu Murenge wa Rwezamenyo n’uwa Nyamirambo mu Karere ka Nyarugenge, basabiye abanyerondo amahugurwa nyuma y’uko bamwe muri bo bagiye bafatanwa ibintu by’abaturage byibwe kandi ari bo bashinzwe kubacungira umutekano.

Ibi babitangaje nyuma y’aho mu mpera z’Icyumweru gishize hari umuturage wameshe imyenda ayanika ku mugozi, barayimwiba ariko aza gutungurwa no guhura n’umunyerondo ayambaye.

Byabereye hafi y’amashuri abanza y’i Ntwari mu Murenge wa Rwezamenyo mu Karere ka Nyarugenge.

Abaturage bo muri aka gace bavuga ko batunguwe cyane n’uburyo mugenzi wabo wari wibwe imyenda yahuye n’umunyerondo ayambaye, amubajije aho yayikuye undi ngo afata urumogi arumushyira mu mufuka w’ipantalo, amujyana abeshya ko amufatanye ibiyobyabwenge.

Abaturage bamaze kubona uko mugenzi wabo ari kugerekwaho idosiye y’ibiyobyabwenge, bahise bajya kuri Sitasiyo ya Polisi ya Rwezamenyo mu rwego rwo kugaragaza ko arengana.

Uwase Hadidja yagize ati “ Uriya musore yameshe imyenda ayanika ku mugozi noneho asohotse aburamo ikoti. Ubu nibwo ahuye n’uyu munyerondo aryambaye amubaza aho yarikuye undi na we amubaza ikigaragaza ko ari irye, amwereka ibimenyetso bitatu by’uko ari irye. Twese twabibonye, aho kurimuha nibwo we amufashe abwira bagenzi be ngo bamumufashe amusake mu mifuka ahita avuga ko amusanganye agapfunyika k’urumogi .”

Uwitwa Biziyaremye Olivier, we avuga ko atari ubwa mbere abanyerondo bafatanwa ibyibano bagahita bahimbira ba nyirabyo ko babafatanye ibiyobyabwenge.

Ati “Ubuyobozi nibudufashe bubategurire amahugurwa bubigishe uko bakwiye kwitwara mu kazi kandi bareke kujya batoragura buri muntu wese babonye udafite akazi batazi aho aturuka ngo bamugire umunyerondo kuko nibo bari kutumaraho ibintu.”

Uhagarariye abanyerondo mu Karere ka Nyarugenge, Kabiligi Yusuf, yabwiye IGIHE ko umunyerondo wakoze ayo makosa yahise atabwa muri yombi.

Uwo munyerondo we yireguye avuga ko imyenda bamusanganye ari yo yatse abazunguzayi.

Ati “Amahugurwa y’abanyerondo yo ni ngombwa arakenewe ndetse turi kuyategura ariko uriya munyerondo we yahise atabwa muri yombi kuko n’iyo wafashe imyenda y’abazunguzayi nk’uko abivuga, ntabwo uhita uyambara.”

Umunyamabanga Nshingwabikorwa w’Umurenge wa Rwezamenyo, Uwamwiza Chantal, yavuze ko uyu mwaka amahugurwa y’abanyerondo azakorwa.

Ati “ Uyu mwaka amahugurwa azaba ariko icyo kirego cy’uwo munyerondo kirakurikiranwa kugira ngo hagaragazwe ibimenyetso niba aribyo koko.”

Abaturage bo mu Murenge wa Rwezamenyo n’uwa Nyamirambo ndetse na Nyakabanda basaba ko ubuyobozi bwajya bushishoza bukamenya imyitwarire y’abo bugiye kugira abanyerondo kugira ngo bakore ibyo basobanukiwe kandi badahutaza abaturage.

Abatuye Nyarugenge basabye ko abanyerondo bahabwa amahugurwa kubera bamwe muri bo bafite imyitwarire idahwitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza