Nyarugenge: Abazunguzayi badukanye amayeri yo kwitwikira ijoro bagacuruza nta nkomyi

Yanditswe na Thamimu Hakizimana
Kuya 21 Mutarama 2020 saa 01:04
Yasuwe :
0 0

Mu gihe Umujyi wa Kigali ukomeje kurwanya ubucuruzi bwo mu kajagari, bamwe mu bakoraga ubwo bucuruzi bazwi nk’abazunguzayi badukanye amayeri yo gucuruza mu masaha y’ijoro.

Aba bazunguzayi bacuruza mu masaha y’ijoro iyo bamaze kubona ko abashinzwe kurwanya akajagari bamaze gutaha.

Ibi babikora mu gihe ufashwe acuruza mu kajagari cyangwa agurira abakora ubwo bucuruzi, acibwa amande y’ibihumbi 10 by’amafaranga y’u Rwanda.

Hamwe mu ho aba bazunguzayi bakunze gucururiza nijoro ni i Nyamirambo n’ahitwa Down Town hafi ya Gare iri mu Mujyi wa Kigali na Nyabugogo.

Bamwe mu bakora ubu bucuruzi butemewe, babwiye IGIHE ko bahisemo kujya bacuruza nijoro kugira ngo babone ikibatunga n’imiryango yabo.

Biziyaremye Innocent, utuye mu Murenge wa Gatsata yagize ati“ Turabizi ko bitemewe ariko aho kugira ngo umuntu afungwe azira ko yibye yafungwa azira ko azunguza kuko ibyaha birarutanwa kandi aho kugira ngo abana bawe bicwe n’inzara ureba cyangwa ngo ujye gusabiriza, wajya mu muhanda ukazunguza.”

Yongeyeho ko bahisemo kujya bacuruza nijoro kubera ko ari bwo abashinzwe kubarwanya baba batashye.

Umubyeyi w’abana bane utarashatse kuvuga izina rye, nawe yemeza ko yahisemo kujya acuruza nijoro kubera ko abashinzwe kurwanya abacuruza mu kajagari ari bwo baba bagabanutse ugereranyije no ku manywa.

Ati “Yego gucuruza nijoro biba bigoye kuko abakiriya baba atari benshi ariko aho kugira ngo uze gucuruza ku manywa bakwambure ibyawe uhombe wabikora nijoro utekanye kabone n’iyo watwara utwo duke.”

Umuyobozi wungirije w’Akarere ka Nyarugenge, Ushinzwe ubukungu, Nsabimana Vedaste, we avuga ko bagiye kuganira n’inzego z’umutekano zishinzwe kurwanya akajagari kugira ngo zongere amasaha.

Ati “Na nijoro inzego za DASSO ziba zihari ahubwo wenda twareba igihe baviramo niba abazunguzayi babikora bamaze kubona ko bavuyemo ariko inzego zose zabirwanyaga ntabwo zigeze zihagarara.”

Yakomeje ashimangira ko niba abazunguzayi basigaye bahengera bagacuruza nijoro DASSO zimaze gutaha bagiye kuganira nazo barebere hamwe uko zakongera amasaha yo gukora kugira ngo bakomeze kurwanya abacuruza mu buryo butemewe.

Nubwo hashyizweho amande azajya acibwa ufashwe acuruza cyangwa agurira ucurua mu kajagari, uyu muyobozi avuga ko nta mubare nyir’izina w’amafaranga y’amande bamaze guca abazunguzayi afite ariko agaragaza ko icyo bashyizemo imbaraga ari ubukangurambaga bwo gushishikariza abahahira abazunguzayi kubireka.

Umujyi wa Kigali washyizeho amabwiriza y’Inama Njyanama y’Umujyi wa Kigali No. 002/2015 ya 03/05/2015 agena ko umuguzi cyangwa ugurisha uzajya afatirwa mu bikorwa by’ubucuruzi bw’akajagari bombi bazajya bacibwa amande ya Frw 10,000 buri umwe.

Nubwo hakiri bamwe bacururiza mu kajagari, Umujyi wa Kigali uvuga ko abahoze ari abazunguzayi barenga ibihumbi 10, bamaze gushyirwa mu masoko bubakiwe, aho bacuruza neza kandi bikaba bikomeje kubagirira akamaro.

Kugeza ubu mu Karere ka Gasabo abafashijwe kuva mu bucuruzi butemewe ni 6 308, Nyarugenge 3 800 na ho Kicukiro bagera kuri 520.

Ahitwa Down Town nijoro haba hari abazunguzayi benshi
Baba bacuruza ibintu bitandukanye mu kajagari birimo n'amasogisi
Bamwe mu babyeyi bemeza ko bahitamo gucuruza nijoro kugira ngo babone icyo bagaburira abana babo
Nijoro abazunguzayi bacuruza nta nkomyi
Nyamirambo abazunguzayi bacuruza nijoro bacungana na DASSO

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .