00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Abayobozi b’Imidugudu bahawe Smartphones zizabafasha mu gukumira amakimbirane

Yanditswe na Sitio Ndoli
Kuya 25 Nyakanga 2021 saa 07:53
Yasuwe :
0 0

Binyuze mu bukangurambaga bwa ‘Connect Rwanda’, Abayobozi b’imudugudu 587 yo Mirenge 15 igize Akarere ka Nyamasheke bahawe telefone zigezweho (smartphones), zizabafasha gukumira ibyaha no gutangira ku gihe amakuru n’amashusho y’ibyabaye mu midugudu bahagaririye.

Ubusanzwe mu Rwanda hose, abayobozi b’imidugudu bakoresha telefone zisanzwe bahabwa n’Akarere. Gusa abayobozi b’imidugudu bajyaga bahura n’inzitizi yo gutanga amakuru yabo mu buryo bw’amafoto cyangwa amashusho kuko izi telefone bahabwaga zidafite ubu buryo.

Bamwe mu bayobozi b’imidugudu bo mu Mirenge ya Ruharambuga na Bushekeri bavuze ko guhabwa smartphones hari icyo bigeye kubafasha mu gukora akazi kabo neza.

Nyirangirababyeyi Adera ati “Icyatugoraga ni ugutanga raporo zidafite amashusho, nk’aho twageraga abaturage bashyamiranye n’ahandi hantu hose hasabwa gufotora ntitubashe kubikora ariko ubwo tubonye izi zigezweho tuzajya tubikora kandi dutange amakuru ku gihe twifashishije ikoranabuhanga.”

Sibomana Pascal yunzemo ati “urareba nko muri iki gihe cyo kwirinda icyorezo biba bigoye gukora inama imbonankubone none ubwo twabonye izi telefone bizatuvuna amaguru tujye dukora inama twifashishije ikoranabuhanga hamwe n’abayobozi bacu. Ikindi n’uko tuzahita dukora urubuga kuri WhatsApp, tujye twungurana inama n’abayobozi bacu natwe ubwacu.”

Ubuyobozi bw’Akarere ka Nyamasheke bwasabye aba bayobozi b’imidugudu gufata neza izi telefone bakazikoresha neza. Mu mpera za Werurwe 2021 nabwo abagore bakora mu bijyanye n’ubuhinzi n’ubworozi bahawe smartphones binyuze mu bukangurambaga bwa #ConnectRwanda.

Ubukangurambaga bwa #ConnectRwanda bwatangijwe na MTN Rwanda ku bufatanye na Minisiteri y’Ikoranabuhanga na Innovasiyo mu Ukuboza 2019 hagamijwe kugenera abaturarwanda telefoni ngendanwa zigezweho mu rwego rwo kwihutisha iterambere ry’ubukungu bushingiye ku ikoranabuhanga.

Ubu bukangurambaga bukorwa mu buryo ibigo byigenga, inzego za Leta n’abantu ku giti cyabo bitanga kugira ngo intego yo kugeza iryo koranabuhanga ku banyarwanda bose.

Hirya no hino mu Rwanda hatangiye gutangwa smartphone ku bayobozi b’imidugudu, mu Ntara y’Iburengerazuba hazatangwa 3621.

Abayobozi b'Imidugudu 587 bahawe smartphone zizabafasha gukora akazi kabo bifashishije ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .