Nyamasheke: Abambuwe imirima y’icyayi basabye Guverineri Munyantwari kubafasha kuyisubizwa

Yanditswe na Sitio Ndoli
Kuya 11 Nyakanga 2020 saa 07:44
Yasuwe :
0 0

Abaturage bo mu murenge wa Karambi mu karere ka Nyamasheke, batakiye Guverineri w’Intara y’Iburengerazuba, Alphonse Munyantwari, ngo abafashe gusubizwa imirima y’icyayi bavuga ko bambuwe n’ubuyobozi bwa koperative Kotega muri 2014.

Mu biganiro yagiranye n’abahinzi b’icyayi bo mu murenge wa Karambi, mu byo bamugejejeho hari ni ikibazo cy’imirima y’icyayi bambuwe n’ubuyobozi bwa koperative Kotega, buvuga ko bananiwe guhinga iyo mirima.

Umwe muri abo baturage yagize ati “Baduhaye imirima badushishikariza guhinga icyayi ariko abayobozi ba koperative barayitwambuye batubwira ko tutayihinze neza kandi batubeshyera ahubwo bayiha abifite.”

Undi nawe ati “Njyewe nari naragiye kurwaza umuntu nsanga umurima wanjye bawuhaye undi muntu ngize ngo ndabaza barambwira ngo nananiwe kuwitaho.”

Zigamukuri Timothée avuga ko hari abantu bambuwe imirima biturutse kutita ku buhinzi bw’icyayi ariko akemeza ko hari bake bayambuwe binyuze mu manyanga y’abayobozi ba koperative bari bariho icyo gihe.

Ati “Icyayi icyo gihe cyari gifite amafaranga make cyane ariko leta iduha amasambu ngo duhinge icyayi, bamwe ubuhinzi bw’icyayi ntibabwumvaga. Ntabwo wabyara umwana ako kanya ngo ahite akura, abaturage baracyanze ngo nta muhinzi w’icyayi wigeze ukira, uyu munsi wa none batangiye kubona ko icyayi gifite akamaro none barifuza ya mirima babambuye kubera kutayitaho gusa hari bamwe bambuwe imirima bikozwe n’abayobozi ba koperative.”

Nubwo umubare w’aba baturage bambuwe imirima utaramenyekana, nyuma y’ibi biganiro Guverineri Munyantwari yabwiye IGIHE ko bagiye kumva buri ruhande maze abambuwe imirima bari basanzwe bayitaho bakayisubizwa.

Ati “Biri ukubiri, hari abagitaga [icyayi] bataragira imyumvire, hari n’abacyambuwe, tugiye kubikurikirana mu mizi ku buryo bose bazabona igisubizo kandi kinoze.”

Umurenge wa Karambi ugizwe n’imisozi ihinzeho icyayi, muri 2012 ubuyobozi bwahaye abaturage imirima yo guhinga icyayi ariko bamwe ntibabasha kumva inyungu izaboneka mu buhinzi bw’icyayi bituma bamwe bayita maze abayinambyeho bakomeza kuyitaho kuri ubu bakaba bari kubona inyungu nyinshi dore ko begerejwe n’uruganda rutunganya icyayi.

Guverineri Munyantwari yavuze ko ikibazo cy'aba baturage kigiye gukurikiranwa mu mizi
Hari abaturage batakiye Guverineri Munyantwari ngo bongere kubona imirima y'icyayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .