00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Imiryango irenga 2400 itaragiraga ubwiherero yafashijwe kububona

Yanditswe na Prudence Kwizera
Kuya 29 Ugushyingo 2022 saa 10:49
Yasuwe :

Imiryango 2,402 yo mu Karere ka Nyamagabe itaragiraga ubwiherero bwujuje ibisabwa, yafashijwe kububona mu gihe cy’umwaka umwe mu rwego rwo kuyitoza kugira isuku no guca ukubiri n’indwara zikomoka ku mwanda.

Mu Ugushyingo 2021 nibwo Ubuyobozi bw’Akarere ka Nyamagabe bwihaye umuhigo wo gukemura ikibazo cy’imiryango itishoboye idafite ubwiherero bwujuje ibisabwa kugira ngo ibubone ku bufatanye na bo ubwabo ndetse n’abafatanyabikorwa.

Icyo gihe bari bari biyemeje ko muri Kamena 2022 bazaba bamaze kwesa umuhigo wo kubaka ubwiherero 2,352.

Umuyobozi w’Akarere ka Nyamagabe, Niyomwungeri Hildebrand, yavuze ko uwo muhigo bamaze kuwesa banarenzaho.

Ati “Twari dufite intego yo kubaka no gusana ubwiherero burenze ibihumbi bibiri, ubu bwose twaraburangije. Twagombaga kubirangiza mu kwezi kwa Munani ariko twarengejeho indi minsi.”

Yavuze ko bafatanyije n’abaturage ubwabo ndetse n’abafatanyabikorwa batandukanye barimo umuryango mpuzamahanga ukora ibikorwa bijyanye n’isuku n’isukura witwa Water Aid wagize uruhare mu gutanga amabati yo gusakara ubwiherero.

Bamwe mu baturage batagiraga ubwiherero bavuze ko nyuma yo gufashwa kububona basigaye baraciye ukubiri n’umwanda.
Ndahimana Clothilde wo mu Murenge wa Mushubi ati “Kutagira ubwiherero nabiterwaga n’ubukene ku buryo nari narabashije gucukura umwobo muto tuzajya twifashisha ariko utubakiye neza. Abayobozi baramfashije mbona ubwiherero bwiza busakaye kandi bukinze ku buryo mu rugo tujya kwiherera neza.”

Abafashijwe kubona ubwiherero baganiriye na IGIHE bavuze ko batojwe no kugira isuku muri byose kandi bakomeje kubyubahiriza.

Nyiranzeyimana Bonifrida ati “Batwigishije ko tugomba kugira isuku cyane dukaraba intoki igihe hari ikintu tugiye gukora nko gutegura amafunguro, tuvuye mu bwiherero mbese igihe cyose.”

Mu 2020 mu Karere ka Nyamagabe hagaragaye umwanda ukabije kuko imibare yerekanye ko mu mezi 11 y’uwo mwaka, abantu 119,013 bagannye ibitaro bya Kigeme n’ibya Kaduha barwaye indwara zikomoka ku isuku nke.

Kuri uyu wa Kane mu Karere ka Nyamagabe hizihijwe iminsi mpuzamahanga ibiri yahurijwe hamwe ari yo uwo gukaraba intoki n’uwo kugira ubwiherero busukuye.

Abaturage bahawe ubutumwa bubasaba guhora bazirikana akamaro ko kugira isuku. Niyo mpamvu basabwe kujya bafata neza ibikorwa bakorerwa kugira ngo birambe kandi bikajya bibabera urugero rwo kwikorera ibibafasha kugira imibereho myiza badategereje ubufasha.

Abayobozi mu gikorwa cyo gufasha umuturage kugira ubwiherero bwujuje ibisabwa
Abaturage bahawe amabati yo gusakara ubwiherero
Umuyobozi w'Akarere ka Nyamagabe Wungirije ushinzwe iterambere ry'imibereho myiza y'abaturage, Uwamariya Agnes, yasabye abaturage guhora bazirikana ibyiza by'isuku n'isukura
Abaturage basabwe kurangwa n'isuku muri byose

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .