00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Abana icumi batangiye umwaka mushya biyemeza kuva mu muhanda

Yanditswe na Prudence Kwizera
Kuya 4 Mutarama 2023 saa 10:24
Yasuwe :

Abana icumi bo mu Karere ka Nyamagabe batangiye umwaka mushya wa 2023 biyemeza kuva mu buzererezi bamazemo igihe.

Babivuze ubwo mu Karere ka Nyamagabe habaga igikorwa cyo guhuriza hamwe abana bafite ibibazo bitandukanye bikomoka mu miryango yabo no gusabana nabo mu rwego rwo kubifuriza iminsi mikuru ya Noheli n’Ubunani.

Ni igikorwa cyabaye ku Gicamunsi cyo kuri uyu wa Kabiri tariki ya 3 Mutarama 2023; cyateguwe n’ubuyobozi bw’akarere mu rwego rwo kubafasha kwishima no kurebera hamwe uko ibibazo bafite byashakirwa ibisubizo birambye.

Mu bana 245 basangiye n’abayobozi harimo 10 bazerera mu muhanda, abavanywe mu muhanda batanu, abafite ubumuga barindwi, abarererwa mu kigo muri SOS 15, abavuye kugororerwa Iwawa batanu, abana 10 barerwa na ba malayika murinzi, abana 12 bahagarariye abandi, 13 bo mu bigo by’amashuri abanza byo mu Murenge wa Gasaka n’abandi batandukanye bo mu Mujyi wa Nyamagabe baje bazaniye impano abatishoboye.

Umuyobozi w’Akarere ka Nyamagabe Wungirije Ushinzwe Iterambere ry’Imibereho Myiza y’Abaturage, Uwamariya Agnes, yavuze ko mu miryango imwe n’imwe hakiri ibibazo bituma abana bayikomokamo bisanga mu buzima bugoye birimo no kuba inzererezi.

Ati “Harimo amakimbirane mu miryango n’ababyeyi batabana n’abo bashakanye, hari abaterwa inda imburagihe, hanyuma ibyo bibazo byose byugarije umuryango bigatuma abana bahura n’ibibazo bibaganisha mu buzererezi, mu kwishora mu biyobyabwenge, mu guterwa inda ndetse n’ibindi bituma abana bava mu ishuri.”

Yavuze ko bateguye igikorwa cyo kubiyegereza no kubereka urukundo kugira ngo bagarure icyizere cy’ubuzima kandi babone ko hari ababazirikana.

Mu bana bitabiriye icyo gikorwa harimo abagera ku icumi bahise biyemeza kuva mu muhanda, bagasubira mu miryango yabo; ubuyobozi bubizeza ubufasha burimo imibereho no kubaha ibikoresho by’ishuri bagasubira kwiga.

Ntabanganyimana Bruno w’imyaka 15 y’amavuko, yavuze ko amaze imyaka ine azerera mu mihanda yo mu mujyi wa Nyamagabe kuko yabitangiye afite imyaka 11.

Yavuze ko imibereho mibi iri mu rugo iwabo yatumye aba inzererezi mu rwego rwo gushakisha ibyo kurya.

Ati “Nsanzwe niga mu mashuri abanza mu wa kane; iyo mvuye ku ishuri nkuramo imyenda nkaza kuzerera mu mujyi nshaka ibyo kurya kuko mu rugo nta bihari.”

Avuga ko ahawe ibikoresho by’ishuri ndetse no mu rugo iwabo bagahindurirwa imibereho, atagaruka mu muhanda kuzererera kuko haba n’ubwo asiba ishuri akajya gushakisha ibyo kurya.

Mfashwanayo Eric w’imyaka 14 y’amavuko na we yavuze ko yagiye kuzerera mu muhanda afite imyaka icyenda, amaramo amezi atandatu kubera ko mu rugo iwabo atabonaga ibyo kurya.

Ati “Bankuye mu muhanda no mu rugo baradufasha kandi batwizeza ko bazatwubakira. Bansubije mu ishuri bampa n’ibikoresho. Kuri ubu ndishimye kubera ko Leta itwitayeho ikaba yaramenye abana bo mu muhanda ububabare tuba dufite bakatwitaho bakadukoreshereza n’umunsi mukuru.”

Mukarugira Mediatrice ufite umwana ufite ubumuga bukomatanyije yavuze ko yishimiye ko umwana we yatumiwe gusangira n’abandi iminsi mikuru.

Ati “Byatubereye byiza, umwana wanjye nk’ubu afite imyaka 19 ariko ni ubwa mbere ibi bitubayeho abana bacu batumiwe bakisanga mu bandi.”

Ubuyobozi bw’Akarere ka Nyamagabe bwibukije ababyeyi ko bagomba kwita ku bana babo baharanira ko baba mu muryango utekanye. Bwabijeje ko abafite ibibazo bazafashwa kubikemura kugira ngo abana babo babeho neza kandi bose bajye mu ishuri.

Abana batishoboye bitabiriye icyo gikorwa bahawe impano na bagenzi babo bakomoka mu miryango yifashije.

Abafite impano zirimo kuririmba bahawe umwanya wo kuzigaragaza
Ababyeyi bishimiye ko abana babo batumiwe mu munsi mukuru bahabwa n'impano
Abana barimo abazerera mu muhanda n’abafite ibibazo mu miryango basangiye iminsi mikuru n’abayobozi mu Karere ka Nyamagabe
Abana bishimiye gusangira iminsi mikuru ya Noheli n'ubunani n'abayobozi
Abayobozi basabanye n'abana mu Karere ka Nyamagabe
Habayeho no gukata umutsima bwarawusangira
Bahawe impano zirimo ibikapu n'ibikoresho by'ishuri
Umuhanzi Izere Louange Ora yataramiye abana bo mu Karere ka Nyamagabe batumiwe n'ubuyobozi mu musangiro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .