Nyamagabe: Abahinzi barinubira ko ishwagara bagenewe na Leta yatinze kubageraho

Yanditswe na Prudence Kwizera
Kuya 10 Ugushyingo 2019 saa 11:15
Yasuwe :
0 0

Bamwe mu bahinzi bo mu Karere ka Nyamagabe bagaragaje ko ishwagara bemerewe na Leta yo gukoresha nk’inyongeramusaruro mu buhinzi yajya ibagereraho igihe kuko uyu mwaka yatinze cyane.

Abo baturage baganiriye na IGIHE, bavuze ko n’ubwo iyo shwagara ibafitiye akamaro muri uyu mwaka yatinze kubageraho.

Ahorukomeye Jean Baptitse yagize ati “Uyu mwaka ishwagara yatugezeho itinze bikabije ku buryo twahinze itaratugeraho. Ubu nta cyizere dufite cyo kuzabona umusaruro uhagije.”

Yakomeje avuga ko iya mbere yabagezeho muri iki cyumweru kandi igihe cyo kuyitera cyararenze.

Ni ikibazo cyagarutsweho n’abandi bahinzi batandukanye barimo n’abohereje ubutumwa bugufi mu Nteko rusange z’abaturage zabaye kuwa Kabiri w’iki cyumweru kuko ibiganiro bagiranaga byatambukaga kuri Radiyo Huye mu buryo bw’ako kanya [live].

Umuyobozi w’Akarere ka Nyamagabe, Uwamahoro Bonaventure, yavuze ko icyo kibazo atari akizi abaza ababishinzwe impamvu kugeza ku bahinzi ishwagara byatinze.

Umuyobozi wungirije ushinzwe iterambere ry’ubukungu mu Karere ka Nyamagabe, Kabayiza Lambert, yavuze ko koko ishwagara yatinze ariko byatewe n’uko Rwiyemezamirimo wahawe isoko ryo kuyigemura yabatengushye.

Ati “Ubusanzwe dutanga isoko ry’ishwagara izakoreshwa mu mwaka turimo ndetse ikazambukiranya no mu mwaka uzakurikiraho (…) haje kubamo rero gutenguhwa na Rwiyemezamirimo aza kunanirwa gutanga ya shwagara yari ikenewe yose haba ko dutanga n’ubundi isoko; urumva twabifatiyemo hagati. Ishwagara yatangiye kugera ku bahinzi mu kwezi kwa cumi.”

Kabayiza yijeje abahinzi ko noneho mu bihembwe bizakurikiraho n’umwaka utaha bazajya bayibonera igihe ku buryo bazajya bahinga nta kibazo.

Muri uyu mwaka wa 2019 mu Karere ka Nyamagabe ishwagara yari yemerewe abaturage gutangwa mu buryo bwa nkunganire ingana na toni zisaga ibihumbi bibiri.

Umuyobozi w’ishami ry’ubuhinzi n’umutungo kamere mu Karere ka Nyamagabe, Ndayambaje Janvier, yavuze ko kubera ko gutanga isoko byatinze hamaze kugera toni 698 gusa.

Yasobanuye ko ibipimo byerekana ko guhingisha ishwagara byatumye umusaruro wiyongera ku buryo bufatika.

Ati “Duhereye nko mu mwaka ushize hari imirenge yagaragazaga ubutaka bufite ubusharire cyane butera; ntanze nk’urugero ku birayi twavuye kuri toni 18 twasaruraga ubu zimaze kugera kuri toni 23 kuri hegitari; tukaba twizeye ko zizagera kuri 25 mu mpera z’uyu mwaka.”

Ubusanzwe iyo shwagara bahabwa mu buryo bwa nkunganire, umuhinzi uyihawe aba asabwa kwishyura 50% naho leta ikamutangira igice gisigaye.

Kuri ubu Rwiyemezamirimo ayitanga ku mafaranga 53 ku kilo kimwe; ubwo umuturage asabwa kwishyura 26.5 Frw ku kilo.

Amabwiriza agaragaza ko ubundi ishwagara ishyirwa mu murima byibura iminsi 15 mbere y’itera ry’imbuto.

Ibihingwa byatoranyijwe biri kwibandwaho mu Karere ka Nyamagabe birimo ibirayi, ibigori n’ingano.

Mu Karere ka Nyamagabe na Nyaruguru hakunze kugaragara ubutaka busharira ku buryo bisaba gukoresha ishwagara kugira ngo babashe kweza.

Abahinzi bagaragaje ko ishwagara yabagiriye akamaro umusaruro uriyongera bifuza ko yajya ibageraho ku gihe kuko haba ubwo ije itinze
Ikibazo cyo gutinda kw'ishwagara cyabajijwe kenshi
Bamwe mu bayobozi bo mu Karere ka Nyamagabe bitabiriye ibiganiro ubuyobozi bw'Akarere bwagiranye n'abaturage

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza