Nyabihu: Uko Caritas wari uturutse i Kigali yashyuhije agasantere kugeza kiswe mu Gashyushyangutiya

Yanditswe na N.Kubwimana Janvière
Kuya 27 Kanama 2020 saa 08:49
Yasuwe :
0 0

‘Gashyushyangutiya’ ni izina ry’agasantere k’ubucuruzi kari mu Murenge wa Rugera, Akagari ka Gakoro, Umudugudu wa Mubuga mu Karere ka Nyabihu.

Kuba igisobanuro cy’iri zina kidasanzwe biri mu byatumye IGIHE ifata urugendo ijya gusura abahatuye kugira ngo hamenyekane inkomoko yaryo.

Abakuze bo muri aka gace bavuga ko kahawe iri zina ahagana mu 1978 biturutse ku mukobwa wakoraga umwuga w’uburaya i Kigali nyuma akaza gukora mu kabari kari muri aka gace, akajya yigisha abagore n’abagabo bakanyweragamo kubyina bamaze gusinda.

Uyu mukobwa ngo witwaga Caritas nyuma yo kugera muri aka gace aje gukora mu kabari k’uwitwa ‘Biyingoma Ephrem’ yahinduye ibintu, azana imbyino abahatuye batari basanzwe bamenyereye.

Ako kabari kabagamo ibikoresho by’umuziki ku buryo kahoragamo umuziki , maze uwo mukobwa akirirwa abyina, abahururaga bose baje kumureba bakahanywera bamara gusinda akababyinisha ku buryo nk’abagore batatinyaga no kuzamura ingutiya.

Dukuzumuremyi Euphrasie w’imyaka 69 ni umwe mu bacuruzaga umusururu muri iyi Santere, iyo akubwira amateka ya Caritas uba ubona abyibuka nk’ibyabaye ejo.

Yagize ati "Ndabyibuka nanjye nacuruzaga umusururo muri iyo Santere, maze haza umukobwa witwaga Caritas akora mu kabari k’uwitwaga Biyingoma, maze akirirwa aceza, abaturage bagahurura baje kureba uwo mukobwa, nabo bakahanywera, habaga harimo abagore benshi pe! Bamara gusinda akababyinisha ingutiya bakaziterura, byabaga ari ibicika! Hitwa mu Gashyushyangutiya gutyo kugeza magingo aya."

Amateka y’aka gace agarukwaho kandi na Biziyaremye Thomas w’imyaka 64 uvuga ko Caritas n’aka kabari ka Biyingoma bari baraciye ibintu.

Ati "Twari tukiri bato, aha muri iyi Santere habaga inzu nke z’ubucuruzi n’utubari duciriritse, keretse akabari ka Biyingoma niko kari kagezweho, kabamo byeri gusa nta nzagwa, twumva ngo hari umukobwa wirirwa abyina mu kabari ke ashaka n’abakiliya, abagore barahanyweraga sinakubwira, bamara gusinda bakabyina kakahava, hari n’abinyabyaga mu ntoki n’abagabo bagakora ibyabo, niko kuhita Gashyushyangutiya kubera imyitwarire y’abo bagore bitewe n’uwo Cartas."

Kuba abagore banyweraga muri aka kabari barabyinaga bazamura ingutiya ndetse bakarangwa n’imyitwarire idasanzwe nibyo byatumye hahabwa izina ryo mu ‘Gashyushyangutiya’.

Iyo ugeze mu Gashyushyangutiya uyu munsi ako kabari ntako ubona kuko ngo Biyingoma wahoze ari nyirako, yaje kuhagurisha maze yimukira muri Repubukika Iharanira Demokarasi ya Congo.

Abatuye aha nta n’umwe uzi irengero rya Caritas wabasusurukije bigatinda gusa abenshi bemeza ko iwabo kavukire hari mu Karere ka Gakenke mu Murenge wa Janja.

Uyu munsi iyo ugeze mu Gashyushyangutiya, ubu hari isoko rirema kabiri mu cyumweru, hari inzu nyinshi z’ubucuruzi kandi zisa neza, umuriro w’amashanyarazi nawo wamaze kuhagera, ni agace gahingwamo urutoki ku bwinshi, aho abantu baturutse hirya no hino baza kubihashakira, yaba ibyo kurya, ibyengwamo inzagwa n’iby’imineke.

Caritas ngo yashyuhije iyi santere yigisha abagore baho kubyina karahava
Ni agace kazwiho guhinga urutoki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .