00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Rotary Club Kigali Kalisimbi yishyuriye mituweli abatishoboye, inatanga ibikoresho by’isuku ku bakobwa

Yanditswe na Claude Bazatsinda
Kuya 31 May 2022 saa 10:25
Yasuwe :

Umuryango w’Abagiraneza, Rotary Club Kigali Kalisimbi, wafashije abaturage 100 batishoboye bo mu Murenge wa Kabatwa mu Karere ka Nyabihu kubona ubwisungane mu kwivuza, unatanga ibikoresho by’isuku y’abakobwa.

Rotary ni Umuryango Mpuzamahanga utari uwa Leta ukora ibikorwa by’ubugiraneza birimo gufasha abatishoboye, gushyigikira serivisi ziteza imbere imibereho myiza y’abaturage nk’amazi meza, kubungabunga ibidukikije, kurwanya indwara z’ibyorezo no gutanga umusanzu mu bikorwa bigamije guteza imbere abaturage.

Bigendanye n’intego zayo, ku Cyumweru, tariki 29 Gicurasi 2022, Rotary Club Kigali Kalisimbi, yatanze ubwisungane mu kwivuza ku baturage 100 batishoboye bo mu Murenge wa Kabatwa mu Karere ka Nyabihu unatanga ibikoresho by’isuku y’abakobwa.

Bamwe mu baturage bahawe ubwo bwisungane mu kwivuza, bashimiye ababafashije, bavuga ko bagiye kujya bivuriza ku gihe batarembeye mu ngo.

Batamuriza Donatha ni umwe muri bo ufite umuryango w’abantu bane bari mu cyiciro cya kabiri cy’ubudehe, wavuze ko yishimiye gufashwa.

Yagize ati “Ubundi byansabaga gushakisha kuko nk’uyu mwaka narayitanze [mituweli] ariko nyitanga nkererewe. Ndashimira aba badufashije kuko ubu tuzatangira guhita twivuza bitadusabye ko turembera mu rugo, ngiye kujya nca inshuro bitangoye nanjye nite ku muryango wanjye.’’

Havugimana Pierre Célestin ufite ubumuga bw’ingingo akaba anatunze umuryango w’abantu batandatu yagaragaje ko inkunga yahawe izamufasha kwiteza imbere.

Yakomeje ati “Ndishimye cyane kandi ndashimira n’abadufashije; ubu ayo nari kuzatanga kuri mituweli ngiye kuyaheraho ntange ‘Ejo heza’, ayandi nyaguremo agatama nkorore nanjye niteze imbere.’’

Umuyobozi wa Rotary Club Kigali Kalisimbi, Kelechi Anyanwu, yavuze ko bahisemo gutangirira ibikorwa byabo by’ubugiraneza ku baturage bo mu Murenge wa Kabatwa.

Yagize ati “Amahitamo twagize mu gukorana bya hafi n’abaturage b’Umurenge wa Kabatwa ntiyaje gutyo gusa ahubwo ashingiye ko iki Kirunga cya Karisimbi ari cyo kirekire mu Rwanda bikigira umwihariko. Twahaye club yacu izina rya Karisimbi kugira ngo natwe twihe intego yo kuba abadahigwa nk’uko Karisimbi nta wundi musozi n’ibirunga biwusumba mu burebure."

Akomeza agira ati “Inkunga yacu izibanda ku mishinga iramba n’ubufatanye tuzagirana. Ni yo mpamvu twifuje ko mutubera itsinda rikorana hafi na hafi na Rotary kugira ngo imbuto duteye n’izo tuzatera hano zizabagirire akamaro kandi namwe muzibungabunge kugeza zitanze umusaruro. Club yacu irizera idashidikanya ko tuzabona abakorerabushake bazafasha muri uwo mujyo.’’

Umuyobozi w’Umurenge wa Kabatwa, Kampire Georgette, avuga ko kuba babonye ubufasha bigiye kuborohereza kandi ko nabo nk’ubuyobozi bazakomeza kwerekana ubwiza bwa Kalisimbi mu baturage bayoboye bityo barusheho kuyibungabunga.

Yagize ati “Ubu abaturage bacu na bo bagiye kumenya ubwiza bwa Kalisimbi bityo barusheho kuyibungabunga ibateze imbere. Twari dufite abaturage 683 batishoboye batabona mituweli biboroheye. Ubwo aba ngaba 100 bavuyeho biratworohera no kuba twakomeza ubuvugizi no kwishakamo ubushobozi ku buryo umwaka wa mituweli uzatangira tugeze ku 100%.’’

Rotary Club Kigali Kalisimbi ni yo nshya iheruka kuvuka mu Rwanda, yatangijwe muri Werurwe 2022 ikaba ari iya cumi mu Rwagasabo. Biba biteganyijwe ko mu gihe hari Club ya Rotary nshya ivutse iba igomba kugira igikorwa ikora mu byo Rotary Club iba yariyemeje mu gihe kitarenze iminsi 100 ivutse.

Hatanzwe n'ibiganiro bitandukanye byagarutse ku gusobanurira abaturage imikorere ya Rotary Club mu Rwanda
Ubuyobozi bw'Umurenge wa Kabatwa bwashyikirijwe ubufasha bwa mituweli y'abantu 100 n'ibikoresho by'isuku y'abakobwa
Rotary Club Kigali Kalisimbi yishyuriye mituweli abatishoboye, inatanga ibikoresho by’isuku ku bakobwa b'i Nyabihu
Abanyamuryango ba Rotary Club Kigali Kalisimbi mu gikorwa cya mbere kuva bemerewe gukorera ku butaka bw'u Rwanda
Abaturage bishimanye n'abanyamuryango ba Rotary Club Kigali Kalisimbi nyuma yo guhabwa ubufasha

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .