Nyabihu: Abaturage bamwenyuye nyuma yo guhabwa amazi meza (Amafoto)

Yanditswe na N.Kubwimana Janvière
Kuya 30 Kamena 2020 saa 09:00
Yasuwe :
0 0

Abaturage bo mu mirenge itandukanye yo mu Karere ka Nyabihu basazwe n’ibyishimo nyuma y’uko bari bamaze imyaka isaga 30 babana n’umwanda uterwa no kutagira amazi meza.

Ni amarangamutima bagaragaje ku wa 29 Kamena 2020, ubwo bagezwagaho amavomo yubatse neza agera kuri atandatu, ubwogero bw’intoki bugezweho bune, amasoko avuguruye agera kuri 45, bizifashishwa mu gukemura ibibazo byababangamiraga bitewe no kubura amazi meza.

Bamwe mu baturage bakakoreshaga amazi mabi y’umugezi bavuga ko bari barazonzwe n’umwanda, abana babo bibasirwa n’indwara z’inzoka.

Abaganiriye na IGIHE bagaragaza ko guhabwa amazi meza bizabafasha guca ukubiri n’ibyo bibazo.

Mukamurenzi Drocelle w’imyaka 62 yagize ati “Tumaze imyaka irenga 30 tutazi gukoresha amazi meza, twavomaga ayo mu migezi itemba nayo asa nabi. Abana bahoraga barwaye inzoka kubera kunywa amazi mabi, basa nabi kandi natwe ni uko, amavomero twagiraga kera yarapfuye, mbese tubonye amazi meza bisa nk’aho tubonekewe.’’

Niyotwiringiye Jean de la Croix yakomehe ati “Mfite imyaka 32, namenye ubwenge iwacu bakoresha amazi y’umugezi asa nabi agira ibara ry’umuhondo, ntiwayameshesha umwenda ngo ucye, kuyanywa twabanzaga kuyateka, aho akajerekani ka litiro eshanu havagamo eshatu z’amazi meza, yewe no kurwanya COVID-19 dukoresha amazi y’ibiziba twumvaga ari ihurizo, none tubonye amazi meza ni umunsi mukuru kuri twe.’’

Umuyobozi wungirije w’Umuryango ufite mu nshingano kurwanya imirire mibi no gushimangira isuku n’isukura mu Rwanda ari nawo wagize uruhare mu gutanga amazi meza muri Nyabihu, Dr Yvonne Serubibi Umurungi, yavuze ko intego yo kurwanya imirire mibi batayigeraho badafite isuku, ndetse bitashobokera abaturage kurwanya icyorezo cya COVID-19 nta suku ibaranga.

Yagize ati "Ubusanzwe dushyira imbaraga mu kurwanya imirire mibi n’igwingira mu bana bato, ariko kandi ntitwabigeraho tutagira amazi meza, twatangiye ibikorwa byo kubaka amavomero, kuvugurura amasoko ashaje mu 2019. By’umwihariko muri ibi bihe byo kurwanya COVID-19 twegereje amazi abaturage ndetse tunubaka ubukarabiro bw’intoki ahahurira abantu benshi kugira ngo dukomeze gufatanya guhangana n’iki cyorezo.’’

Umuyobozi w’Akarere ka Nyabihu, Mukandayisenga Antoinette, yibukije aba baturage bashyikirijwe amazi kuyafata neza kuko ari ibikorwa byayo ndetse no gukomeza kwigengesera ku mabwiriza yo kwirinda COVID-19, cyane bagira isuku no kwambara neza agapfukamunwa.

Yagize ati “Amazi muhawe mwibuke kuyasigasigasira nk’ibikorwa byanyu bwite, ikindi n’abaje kuvoma mwirinde kubyigana, muhane intera mutibagiwe no kwambara neza agapfukamunwa, COVID-19 ntaho irajya nta n’uzi igihe izarangirira ni ngombwa rero kwitwararika.”

Igikorwa cyo kugeza amazi meza ku baturage cyakozwe n’Akarere ka Nyabihu ku bufatanye n’umuterankunga wabo umushinga Gikuriro, uterwa inkunga na USAID, ugashyirwa mu bikorwa na CRS, SNV, Caritas Rwanda.

Uyu mushinga warangiye utwaye asaga miliyoni 100 Frw, aho wasize Akarere ka Nyabihu kageze kuri 86% mu gusaranganya amazi mu baturage.

Mu byo abaturage bahawe harimo n'ubwogero bw’intoki bugezweho bune
Abaturage bo mu Karere ka Nyabihu bamwenyuye nyuma yo guhabwa amazi meza
Abaturage basabwe gufata neza amavomero bahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .