‘Ntabwo wakwibwira ko uzahohotera ubukungu bw’u Rwanda ngo wowe bigusige amahoro’

Yanditswe na Evariste Nsengimana
Kuya 23 Werurwe 2019 saa 06:24
Yasuwe :
0 0

Umunyamabanga wa Leta muri Minisiteri y’Ububanyi n’Amahanga, Ubutwererane n’Ibikorwa by’Umuryango wa Afurika y’Iburasirazuba, Amb. Olivier Nduhungirehe, yavuze ko Uganda itazahirwa no guha ubufasha imitwe irurwanya, kubangamira umutekano w’abanyarwanda n’ubukungu bwarwo.

Yabitangarije mu kiganiro cyatambutse ku Isango Star kuri uyu wa Gatandatu kivuga ‘Impamo ku mubano w’u Rwanda na Uganda’ aho yashimangiye ko uwakwiha ibyo guhohotera u Rwanda n’abanyarwanda ingaruka nawe zamugeraho.

Umubano w’ibihugu byombi umaze iminsi utifashe neza aho u Rwanda rushinja Uganda gushyigikira abashaka kuruhungabanyiriza umutekano bari mu mitwe irurwanya nka RNC, FDLR no kugirirana nabi abanyarwanda babayo n’ibindi.

Ibi bigaragazwa n’ubuhamya bw’abarenga 800 bamaze iminsi birukanwa muri Uganda, bagaragaza ihohoterwa n’iyicarubozo bakorewe, byanatumye Guverinoma y’u Rwanda igira inama abaturage bayo yo guhagarika kujyayo kubera impungenge z’umutekano wabo.

Amb. Nduhungirehe yagaragaje ko Uganda yanagiye ibangamira ubukungu bw’u Rwanda kuva cyera harimo aho yanze ko rucisha ku butaka bwayo amashanyarazi rwari gukura muri Ethiopia, kwanga ko umuhanda wa gariyamishi uva Mombasa ugera mu Rwanda uhanyuze kandi byaremejwe ku rwego rwa EAC.

Hari kandi kontineri z’amabuye y’agaciro z’u Rwanda, zafatiweyo zikamara amezi atandatu, amata yagiye afatirwa na Uganda akarinda kwangirika, indege ya RwandAir yangiwe kunyura ku kibuga cy’indege cya Entebbe igiye mu Bwongereza byose nta mpamvu ifatika.

Amb. Nduhungirehe yavuze ko u Rwanda rwagerageje kandi ruzakomeza gushaka uko rukemura ikibazo rufitanye na Uganda mu buryo bwa dipolomasi, bitarinze kugera ku rwego mpuzamahanga.

Ati “Turizera ko mu kuvugana na benewacu b’Abagande tuzagera aho tugafata umwanzuro kuri iki kibazo.”

Amb Nduhungirehe yasobanuye ko ibihugu byombi bituranye kandi bizakomeza kubana kandi ko nubwo Uganda ibangamira ibikorwa by’ubukungu by’u Rwanda, nayo bitazayisiga amahoro.

Ati “Nta gihugu na kimwe kibifitemo inyungu. Ntabwo wakwibwira ko uzabangamira u Rwanda, uzabangamira abanyarwada, uzahohotera abanyarwanda, ngo uzahohotera ubukungu bw’u Rwanda ngo wowe bigusige amahoro. Nta nyungu n’imwe babifitemo, niyo mpamvu tuzagera igihe tukabona igisubizo.”

Nta bibazo u Rwanda rufitanye n’ibihugu bituranye

Amb. Nduhugnirehe yavuze ko nta bibazo u Rwanda rufitanye n’ibihugu byo mu Karere ruherereyemo ahubwo ko rubifitanye n’abayobozi babyo bagiye bagaragaza gushyigikira imitwe irurwanya.

Aha yagaragaje nkabaturage b’u Rwanda na Uganda kuva cyera bahoze bagenderanirana ndetse n’ubu nta kibazo bafitanye uretse abayobozi babyo bafasha imitwe ishaka guhirika ubutegetsi bwarwo.

Ati “Abanyarwanda n’Abagande barabanye kuva cyera nta kibazo bafitanye. Abagande baba mu Rwanda nta kibazo bafite. Ntabwo ari ikibazo cya Uganda nk’igihugu cyangwa se cy’abagande nk’abaturage. Ni ikibazo cy’abategetsi ba Uganda basa nk’abashyigikira abaturwanya kandi urabizi igihugu kiba gifite ukiyobora.”

Amb. Nduhungirehe yatanze urugero ku aho u Rwanda rwigeze kubana nabi na Tanzania kubera Perezida wahoze arushishikariza gushyikirana n’abagize uruhare muri Jenoside kubera ubucuti bari bafitanye, ariko aho abuviriyeho ibihugu byombi bikaba biri mu mubano utagira uko usa.

Minisitiri w’Imari n’Igenamigambi, Dr Uzziel Ndagijimana, aheruka kuvuga ko mu gihe umubano hagati y’u Rwanda na Uganda utifashe neza, abaturage badakwiye guhangayika kuko hagize igihugu kibangamirwa mu bukungu, Uganda yo yohereza mu Rwanda ibicuruzwa byinshi ari yo yahura n’igihombo kinini.

Umwaka ushize, ibyo u Rwanda rwavanaga muri Uganda bikubye inshuro nyinshi ibyo rwoherejeyo. Ibyo rwakuragayo byari bifite agaciro ka miliyoni $242 naho ibyo rwoherejeyo byari miliyoni $27.

Amb.Nduhungirehe avuga ko ntawabangamira ubukungu bw'u Rwanda ngo we bimugwe amahoro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza