Nsabimana Callixte ‘Sankara’ wigambye ibitero byo muri Nyungwe yeretswe itangazamakuru (Amafoto na Video)

Yanditswe na Ishimwe Israel
Kuya 17 Gicurasi 2019 saa 09:23
Yasuwe :
0 0

Nsabimana Callixte wiyita ‘Sankara’ wumvikanye yigamba guhungabanya umutekano w’u Rwanda, yeretswe itangazamakuru mu gitondo cyo kuri uyu wa Gatanu, tariki ya 17 Gicurasi 2019 ku Cyicaro Gikuru cy’Urwego rw’Igihugu rw’Ubugenzacyaha (RIB) ku Kimihurura.

Abanyamakuru benshi bari babukereye kuri RIB, bahageze babwirwa ko Nsabimana atari buze kuvugana n’itangazamakuru ahubwo ko umwunganizi we mu mategeko ari bumuvugire.

Nsabimana yageze imbere y’abanyamakuru benshi bari bitabiriye iki gikorwa saa 9:18, nyuma y’iminota itatu ahita asohorwa. Uyu mugabo wanyuzagamo akamwenyura gato, yari arinzwe n’abapolisi babiri.

Yagaragaye yambaye ishati y’amaboko maremare irimo ibara ry’ubururu bwerurutse, ipantalo ya kaki n’amataratara y’umukara.

Umwunganizi wa Nsabimana Callixte mu Mategeko, Nkundabarashi Moïse, yavuze ko ibyaha umukiliya we aregwa biri muri dosiye iri mu bugenzacyaha bifitanye isano n’iterabwoba.

Yavuze ko “Dosiye kuko ikiri mu bugenzacyaha itaragezwa mu bushinjacyaha, ibyaha aregwa biracyari mu ibanga. Muzabimenya mu buryo burambuye urubanza rwe nirutangira kuburanishwa.’’

Nkundabarashi wunganiye Nsabimana mu mabazwa yabaye mu bugenzacyaha, yavuze ko ibyo amategeko ateganya k’ukekwaho ibyaha byubahirijwe.

Yakomeje avuga ko “Uwo nunganira ni we wampisemo. Abavoka dufite amategeko aturengera mu mwuga wacu ku buryo nta bundi bwirinzi nkeneye usibye amategeko atugenga aduha uburenganzira bwo kunganira ukekwaho ibyaha. Kuvuga ko hari abavoka basabwe kumwunganira ntibabikore bafite ubwigenge mu kazi kabo.”

Ingingo ya 29 y’Itegeko Nshinga rya Repubulika y’u Rwanda iteganya ko umuntu wese wafashwe n’Ubugenzacyaha, hari ibyaha akurikiranwaho afite uburenganzira bwo kunganirwa n’umwavoka yihitiyemo.

Umunyamategeko Nkundabarashi yavuze ko “Twaraganiriye (Nsabimana) kandi ibyo twagombaga kuvugana twarabikoze. Afite ubuzima bwiza kandi ibyo yemerewe n’amategeko arabibona. Nta kibazo afite mu buryo dosiye iri gukurikiranwa. Afunze bikurikije amategeko.’’

Nsabimana Callixte yavugaga ko ari Umuvugizi w’Umutwe wa Politiki, MRCD, udahwema kwigamba ibikorwa by’ubugizi bwa nabi nk’igitero cyagabwe i Nyabimata mu Karere ka Nyaruguru mu 2018 n’icya Kitabi.

Uyu mugabo yari amaze iminsi ashakishwa n’ubutabera kubera ibyaha bitandukanye aregwa byakorewe ku butaka bw’u Rwanda birimo kurema umutwe witwara gisirikare utemewe, gushishikariza no gutanga amabwiriza yo gukora ibikorwa by’iterabwoba, ubwicanyi, gushimuta no gufata bugwate abantu, ubujura bwitwaje intwaro no gusahura.

Umuvugizi w’Urwego rw’Ubugenzacyaha, RIB, Mbabazi Modeste, yavuze ko “itegeko riteganya ko umugenzacyaha akora inyandiko y’ukekwaho ibyaha imara iminsi 15 ishobora kongerwa n’umushinjacyaha uyobora urwego rwisumbuye hatanzwe impamvu z’aho iperereza rigeze ariko ntiryarenga iminsi 90. Ibyo byarakozwe.’’

Nsabimana yatawe muri yombi ku wa 13 Mata 2019, u Rwanda rwemeza ko rumufite ku wa 30 Mata 2019.

Mbabazi yavuze ko “Aho yafatiwe n’ibibyerekeye bikiri mu bugenzacyaha, bigifatwaho icyemezo. Muzabimenyeshwa mu rubanza.’’

Dosiye ya Nsabimana yamaze gushyikirizwa Ubushinjacyaha.

Ibyo wamenya kuri ‘Nsabimana Callixte Sankara’

Nsabimana akomoka mu Karere ka Nyanza mu Ntara y’Amajyepfo, ababyeyi be bishwe muri Jenoside akiri muto. We na mushiki we barezwe na Rangira Adrien wabaye umwe mu badepite ba mbere u Rwanda rwagize nyuma ya Jenoside yakorewe Abatutsi.

Se wa Rangira na Se wa Sankara baravukanaga. Rangira avuga ko yafashije Sankara akajya kwiga mu Rwunge rw’Amashuri rwa Butare, gusa ngo kubera uburyo yari afite imyitwarire igoye biza kurangira yirukanywe ajya gukomereza amasomo i Rwamagana.

Sankara yarangije amashuri yisumbuye ajya kwiga mu yari Kaminuza Nkuru y’u Rwanda (NUR), mu 2008 yirukanywe akekwaho ingengabitekerezo ya Jenoside n’amacakubiri ashingiye ku moko. Icyo gihe yigaga mu mwaka wa Kane mu ishami ry’amategeko.

Nyuma yo kwitabaza inzego zitandukanye Sankara yarangirije amasomo muri ULK.

Buri wese yashakaga uko ahagaragara ahantu hari bumubashishe gutara inkuru ye neza
Abanyamakuru bakorera itangazamakuru ryo mu Rwanda no mu mahanga bari bakoraniye kuri RIB ari benshi
Nsabimana ubwo yinjizwaga mu cyumba cyarimo abanyamakuru
Yahagaze imbere y'abanyamakuru acunzwe n'abapolisi babiri mu gihe cy'iminota itatu
Nyuma y'iminota itatu, abapolisi bamukuye imbere y'abanyamakuru
Umwunganizi wa Nsabimana Callixte mu Mategeko, Nkundabarashi Moïse, yavuze ko ibyaha umukiliya we aregwa biri muri dosiye iri mu bugenzacyaha bifitanye isano n’iterabwoba

Amafoto: Muhizi Serge
Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza