Niyomurinzi yagiriye inama abifuza kwiga n’abiga mu mahanga ku mbogamizi n’amahirwe bagirirayo

Yanditswe na Evariste Nsengimana
Kuya 22 Nyakanga 2019 saa 09:56
Yasuwe :
0 0

Inzobere mu mibereho ya muntu zigaragaza ko igihe cyose winjiye mu mushinga cyangwa igikorwa gishya ugomba gushaka inama zagufasha kukitwaramo neza, zitangwa n’abagifiteho ubumenyi n’ubunararibonye.

Benshi mu batarajya i mahanga batekereza ko ari muri paradizo ariko abahageze bakubwira ko ntaho ibyiza n’ibibazo bitaba, bikaba ingorabahizi iyo ubigiriye aho utazatakira umubyeyi cyangwa umuvandimwe ngo agutabare byihuse.

Inshuro nyinshi abantu bajya mu mahanga bajyanywe no guhaha ibintu bitandukanye birimo ubumenyi, amafaranga, gutembera, gutura n’ibindi ariko ibi byose iyo ubitangiye wabanje kumenya uko bikorwa nibwo biguhira.

Iyi nkuru ntabwo yibanda kuri izo mpamvu zose, iragaruka ku bajyayo bagamije gushaka cyangwa kwagura ubumenyi, dore ko iyo buvomwe mu bihugu byateye imbere burushaho kugira ireme.

Mu kiganiro IGIHE yagiranye na Niyomurinzi Ismael, ufite ubunararibonye mu gufasha abifuza kwiga mu mahanga cyangwa abasanzwe bigayo, yavuze ko harimo ibyiza byinshi ariko atari muri paradizo.

Niyomurinzi usanzwe ari umuyobozi mu kigo United Scholars Center, kimeze imyaka isaga ine gifasha abantu kujya kwiga mu mahanga, yagarutse ku nama zafasha ugiye kwigayo kwigirira akamaro akazanakagirira igihugu.

Yavuze ko umuntu wifuza kujya kwiga hanze bimusaba ibintu by’ingenzi birimo amanota meza yifuzwa n’igihugu ashaka kwigamo n’ubushobozi bujyanye n’amafaranga.

Niyomurinzi avuga ko kujya kwiga mu mahanga bitavuze ko ibihugu umuntu aturukamo nta burezi bufite ireme bitanga ahubwo hari amahirwe yihariye abayo.

Ati “Ibyo uwiga muri Amerika nibyo n’uwiga i Kigali ashobora gukoresha yaba gusoma ibitabo kuri internet, ibyo bigisha mu ishuri. Amahawe yo kwigisha ni amwe ku Isi.”

Inyugu zihariye

Gusa Niyomurinzi yavuze ko harimo itandukaniro rito kuko iyo umuntu yiga mu bihugu biteye imbere abasha kubona ibikoresho byose bikenewe, bimufasha kubona uburezi bufite ireme, nk’uwiga kuvura akabona aho yimenyerereza cyangwa ashyirira mu bikorwa ibyo yasomye cyangwa yabwiwe n’umwarimu.

Ati “Iyo wigana n’abafite imico, ubuhanga, ubushobozi butandukanye, batekereza bitandukanye. Ibyo nabyo ni inyungu ku munyeshuri, akagira imyumvire yagutse. Hari n’inyungu zimufasha gukura mu bwenge n’amahirwe rimwe na rimwe yo kuba yabona aho akora yiga.”

Si ibyo gusa kandi kuko n’igihugu umunyeshuri yaturutsemo cyunguka byinshi kuko iyo barangije kwiga bagira uruhare mu kugiteza imbere.

Imbogamizi zikunze kwigaragaza

Niyomurinzi yasobanuye ko hari ibintu bamwe mu bifuza cyangwa abajya kwiga mu mahanga bafata uko bitari.

Ati “Hari abatekereza ko mu mahanga hashobora kuba ari muri Paradizo, ari igihugu bitemba amata n’ubuki ariko mu by’ukuri ntabwo ariko bimeze. Imbogamizi cyangwa ibibazo ntaho bitaba.”

Yakomeje agira ati “Ibyo bituma bamwe batekereza kujya kwiga hanze mu by’ukuri ataricyo kibajyanye, bashaka gutoroka. Ni imyumvire bakunda kugira ariko idakwiye kuranga umunyarwanda cyangwa umunyafurika muri rusange uba ukwiye gutekereza ko agiye kwiga.”

Inshuro nyinshi usanga iyi ngingo n’ibihugu bitanga mahirwe yo kubyigamo ku banyafurika bireba niba umuntu ugiye azasubira iwabo, agateza imbere aho yaturutse. Iyo atorotse bituma igihugu kigaragara nabi ku ruhando mpuzamahanga, bikanagira ingaruka kuri bagenzi be bifuza kujyayo.

Ati “Ntekereza ko aho kugira ngo bagende batekereza kugumayo ahubwo batekereza uko bubaka Afurika twifuza, tukayigira nk’irenze u Burayi.”

Niyomurinzi yavuzemo kandi n’ubumenyi bucye abantu bagira ku bihugu bifuza kujya kwigamo cyangwa amashami bashaka kwigayo. Aha yatanze urugero nk’abifuza kwiga ubwubatsi, ugasanga birukiye muri Amerika nyamara hari ibihugu nka Turikiya byateye imbere mu bwubatsi.

Ati “Iyo ugiye ufite imitekerereze yo kuvuga ngo aho uvuye ni habi, aho ugiye ni heza ugahura n’ikikugora, ubwa mbere ni wowe bigiraho ingaruka kuko ntuba wagiye witeguye ko ushobora kubigira.”

Hari kandi no kutisanzura vuba mu mico n’indimi by’abandi umuntu aba ahasanze.

Ati “Ikindi ni ikijyanye n’ubushobozi, ugasanga yagiye yishyizemo ko ashobora guhita abona akazi yiga, agatinda kukabona. Ugasanga bimugizeho ingaruka no ku muryango we akaba n’ishuri yarireka.”

Niyomurinzi yavuzemo ko rimwe na rimwe hari ababyeyi bibwira ko nibohereza umwana kwiga mu mahanga bazagorwa no kubona ahagurutse agiye ubundi ibisigaye akirwanoho.

Ati “Bakwiye gutekereza kwiga k’umwana wabo nk’ishoramari, bakamwohereza bamuhaye ibizamutunga n’ibizatuma yiga noneho ibijyanye no kubona akazi bikaza byuzuza za nshingano z’umubyeyi.”

Niyomurinzi kandi yanagiriye inama abifuza kujya kwiga mu mahanga cyane cyane ababisabira kuri internet kubanza gushishoza ndetse bagashaka n’amakuru kuri za ambasade z’ibyo bihugu, ku bigo bya Leta bishinzwe uburezi cyangwa ku bigo byigenga byabigize umwuga nka United Scholars Center.

United Scholars Center imaze imyaka itatu itangiye ibikorwa byo gufasha abantu kujya kwiga mu mahanga, aho imaze gufasha abarenga 500 barimo 150 bafashijwe kwiga baganyirijwe amafaranga y’ishuri.

Ikorana n’amashuri ya Leta n’ayigenga asaba amafaranga macye cyane. Urugero nka Czech Technical University ni ishuri rya Leta ya Repubulika ya Tchèque, ryishyuza amafaranga y’ishuri angana na 2000 by’amayero mu gihe hari andi yo mu bindi bihugu byigisha amasomo amwe, yishyuza arenga ibihumbi 13.

Iki kigo gikorera Kimihurura mu Mujyi wa Kigali, munsi ya Lemigo Hoteli n’Inteko Ishinga Amategeko, ku muhanda ujya Sonatube cyangwa ugahamagara kuri 0788307538.

Niyomurinzi Ismael yagiriye inama abifuza kwiga mu mahanga
Abifuza kwiga mu mahanga bagomba gusobanukirwa n'imbogamizi n'inyungu bibamo
Niyomurinzi ubwo yahaga impanuro abanyeshuri bifuza kwiga mu mahanga mu gihe gishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza