00:00:00 IGIHE NETWORK KN KINYARWANDA EN ENGLISH FR FRANCAIS

Ni gute urubyiruko rufite amateka atandukanye, rwashyira hamwe mu kubaka u Rwanda?

Yanditswe na Ndahayo Emmanuel
Kuya 9 June 2022 saa 05:17
Yasuwe :

Jenoside yakorewe Abatutsi mu 1994 yasize ibikomere byageze kuri benshi. Abayibayemo bazi ubwenge bafite ubuhamya bw’ibyababayeho, ariko n’urubyiruko rwari ruto muri icyo gihe cyangwa se rwavutse nyuma yayo, ruracyahura n’ingaruka zayikomotseho.

Ibi byagarutsweho nama Ngarukamwaka yateguwe n’umuryango Never Again Rwanda y’Urubyiruko kuri Politiki n’Ingamba zo kwibuka Jenoside yakorewe Abatutsi mu 1994. Iyi Nama yabaye ku nshuro ya 11 kuri uyu wa 9 Kamena, yahuje urubyiruko 150 rwaturutse mu mpande zose z’igihugu, ruganira ku mateka ya Jenoside yakorewe Abatutsi.

Ni inama igamije gufasha urubyiruko kwibuka Jenoside yakorewe Abatutsi mu 1994 ndetse no kuganira ku mateka ya Jenoside ndetse n’uruhare rw’urubyiruko mu kubaka igihugu.

Nk’uko byagaragajwe na bamwe batanze ubuhamya, hari urubyiruko rwabuze ababyeyi n’abavandimwe, rubana n’igikomere cyo kutagira umuryango. Hari kandi urubyiruko rwakomotse ku bagize uruhare muri Jenoside yakorewe Abatutsi, na bo usanga bafite ipfunwe, cyangwa se batari kumwe n’ababyeyi babo bashobora kuba bari gukora ibihano by’ibyaha bagizemo uruhare.

Ibi biganiro byaranzwe n’ubuhamya bw’urubyiruko rwagarutse ku mateka yarwo. Mu batanze ibiganiro, harimo uwarokotse Jenoside yakorewe Abatutsi ariko utazi inkomoko ye, wasobanuye ubuzima bukomeye yanyuzemo kubera icyo gikomere.

Harimo kandi ufite ababyeyi bagize uruhare muri Jenoside ndetse n’ukomoka ku mubyeyi wafashwe ku ngufu mu bihe bya Jenoside yakorewe Abatutsi.

Hakinwe kandi imikino itandukanye igaragaza ingorane z’urubyiruko mu ngeri zitandukanye, havugwa imivugo na yo yaganishaga muri uwo mujyo.

Uko byagenda kose ingaruka za Jenoside yakorewe Abatutsi zigera kuri benshi, ndetse zikagera no ku rubyiruko yaba mu buzima busanzwe ndetse no mu buryo bw’imitekerereze.

Ubushakashatsi bwakozwe n’Umuryango Never Again Rwanda ku bufatanye n’Umuryango mpuzamahanga wa Inter-peace, bugamije kureba ingaruka z’ibikomere bya Jenoside nyuma y’uko ihagaritswe, bwagaragaje ko 42.1% mu babajijwe babuze umubyeyi cyangwa undi muntu wa hafi, 19.9% bahohoterwa kubera umwimerere wabo mu gihe 19.5% bafashwe nabi (discrimination) kubera umwimerere wabo.

Ku rundi ruhande, ubushakashatsi bwakozwe n’Umuryango Unit Club Intwararumuri mu 2021, bwagaragaje ko hari ibyiciro bitandatu by’urubyiruko rwagizweho ingaruka na Jenoside yakorewe Abatutsi, birimo urubyiruko rutazi inkomoko yarwo, aho 99% byabo bafite ihungabana.

Urubyiruko rwarokotse Jenoside yakorewe Abatutsi rugaragaza ihungabana ku kigero cya 87%, naho ku rubyiruko rwavutse ku babyeyi bafashwe ku ngufu mu gihe cya Jenoside yakorewe Abatutsi bakagira ihungabana ku kigero cya 69%.

Abana bavutse ku bashakanye cyangwa ku babyeyi badahuje icyiswe ubwoko (Abahutu n’Abatutsi) bafite ihungabana ku kigero cya 43%, mu gihe abana bavutse ku babyeyi bakoze Jenoside yakorewe Abatutsi cyangwa bafite abagize iyo muryango bafite ihungabana ku kigero cya 35%.

Ubu bushakashatsi kandi bwerekana ko abana bavutse nyuma ya Jenoside yakorewe Abatutsi na bo bafite ihungabana ku kigero cya 14%, ibyumvikanisha ko ikibazo cy’ihungabana mu rubyiruko kiri mu byiciro byinshi.

Nubwo bimeze gutyo ariko, uru rubyiruko ni rwo Rwanda rw’ejo, kandi rugomba kubana mu gihugu kimwe, rukagira uruhare mu kugisana no kugiteza imbere. None ni gute ruzabigeraho?

Umwihariko wo kuganira ku mateka y’ukuri

Nk’uko twabibonye, ibyiciro hafi ya byose by’urubyiruko byagizweho ingaruka na Jenoside yakorewe Abatutsi, aho buri wese afite amateka y’ibyamubayeho kandi bimuremereye, ari nayo mpamvu kuyaganiraho ari kimwe mu bizatuma uru rubyiruko rushyira hamwe.

Urubyiruko rwaturutse mu byiciro bitandukanye birimo ukomoka ku mubyeyi wafashwe ku ngufu, utazi inkomoko ye n’ukomoka ku babyeyi bagize uruhare muri Jenoside yakorewe Abatutsi, bose bagarutse ku buhamya bwabo ndetse n’uburyo bongeye kwiyubaka.

Mu ijambo rifungura iyi nama, umuyobozi wa Never Again Rwanda Dr. Joseph Ryarasa Nkurunziza yashimangiye ko hari inyungu nyinshi iyo urubyiruko ruhawe urubuga rwo kuganira ku mateka yabo ndetse rugashyigikirwa, Yagize ati “Urubyiruko rukwiye kwigira ku mateka igihugu cyanyuzemo ndetse rugakoresha amahirwe ahari rukaganira ku mateka yabo kugirango rubashe kubaka ejo hazaza heza. Hamwe n’imbaraga ndetse n’umuhate rugaragaza nta kabuza ko byose bizakorwa”.

Ibi kandi bishimangirwa n’umuyobozi w’Ishami ryo kubaka Amahoro no gukumira Jenoside mu Muryango Never Again Rwanda, Gatabazi Claver wavuze ko iyo baje bagahura, bakaganira ku mateka yabo ubwabo, babona ko ari Umuryango Nyarwanda uri kumwe ati “Bibafasha kwiyumvanamo, bikabafasha gukira ibyo bikomere byatewe n’ingaruka za Jenoside. “

Umunyamabanga Nshingwabikorwa w’Inama y’Igihugu y’Urubyiruko, Mwesigwa Robert, akaba yitabiriye iyi nama ahagarariye Minisiteri y’Urubyiruko, yavuze ko ibiganiro nk’ibi ari ingenzi mu gukumira ingengabitekerezo ya Jenoside.

Ati “Igikomeye gihari ni uko abenshi muri uru rubyiruko ni bo bakoresha imbuga nkoranyambaga, [umwanya nk’uyu ukoreshwa] kugira ngo [urubyiruko] rukomeze kugaragaza amateka yabo, bakomeze kugaragaza ibyabaye…uwashaka kubivuga uko bitari, ni uruhare rw’urubyiruko [mu kubarwanya no] kubaka igihugu cyabo.”

Ubuyobozi bwa Never Again Rwanda buvuga ko bufite gahunda yo gukomeza kwagura ibi biganiro mu rwego rwo kubigeza ku rubyiruko rwinshi mu rwego rwo kubaka amahoro arambye no gufasha urubyiruko kugira ubumenyi n’imitekerereze yo kubaka ejo hazaza heza.

Urubyiruko rwatanze ikiganiro cyagarutse ku mateka akomeye rwanyuzemo
Urubyiruko rutandukanye rwari rwitabiriye iyi Nama ngarukamwaka
Urubyiruko ruhagarariye urundi rwari rwitabiriye iyi nama ngarukamwaka
Ni ibiganiro byitabiriwe n'abakuze basangije urubyiruko uko rwashyira hamwe mu kubaka u Rwanda
Bazongere Rosine umenyerewe mu gukina filime ni umwe mu batanze igitekerezo
Urubyiruko rwakinnye umukino ugamije kwerekana amateka akomeye rwanyuzemo
Urubyiruko rwagize uruhare mu gukina umukino ugamije gutanga ubutumwa bwo kwiga amateka ya Jenoside yakorewe Abatutsi
Dr. Joseph Ryarasa Nkurunziza, umuyobozi wa Never Again Rwanda agira inama urubyiruko
Amatsinda atandatu yakoze ibiganiro mu matsinda byagarutse ku ngingo zitandukanye n'uburyo urubyiruko rukwiriye kwitwara
Umunyamabanga Nshingwabikorwa w’Inama y’Igihugu y’Urubyiruko, witabiriye ibi biganiro ahagarariye Minisiteri y'Urubyiruko, Mwesigwa Robert, yavuze ko ibiganiro nk'ibi bigira uruhare mu kurwanya ingengabitekerezo ya Jenoside
Umukozi mu Muryango Never Again Rwanda, ushinzwe kubaka Amahoro no gukumira Jenoside, Gatabazi Claver, yavuze ko iyi nama igamije gufasha urubyiruko kwibuka Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .