Ngororero: Hagaragajwe uburyo isuku ari rwo rukingo rwa mbere rw’indwara ziterwa n’umwanda

Yanditswe na Bukuru JC
Kuya 15 Ukwakira 2020 saa 10:00
Yasuwe :
0 0

Abatuye Akarere ka Ngororero basabwe kwitwararika isuku nk’imwe mu ngamba zo guhangana n’indwara zituruka ku mwanda zikunze kwibasira benshi.

Byatangajwe kuri uyu wa Kane, tariki 15 Ukwakira 2020, mu Murenge wa Ndaro, ubwo hizihizwaga Umunsi Mpuzamahanga wahariwe umugore wo mu cyaro, ari nako hatangwa ibikoresho ku batishoboye byo kubafasha kunoza isuku barwanya COVID-19 n’izindi ndwara zituruka ku mwanda.

Ni ibikoresho byatanzwe n’Umuryango Care International ku bufatanye n’Umuryango Nyafurika w’Ivugabutumwa (AEE Rwanda).

Ubushakashatsi bw’Ishami ry’Umuryango w’Abibumbye ryita ku Buzima, OMS, bwo mu 2017 kimwe n’ubw’Ikigo cy’Igihugu cy’Ibarurishamibare ku Mibereho y’Abaturage (DHS) bwa 2014/15 bwerekana ko mu Rwanda ingo 12% arizo zifite aho gukarabira naho 4.4% by’ingo zose mu gihugu nizo zari zifite ibikoresho byose n’isabune byifashishwa mu gukaraba intoki.

Ni mu gihe kandi isuku ari imwe mu ngamba za mbere zo kwirinda icyorezo cya Coronavirus gikomeje guhitana imbaga hirya no hino ku Isi.

Ibikoresho byatanzwe kuri uyu wa Kane bigizwe n’amasabuni yo kumesa, isabuni y’ifu, n’isabuni y’amazi yifashishwa mu gukaraba intoki.

Imiryango yagejejweho iyo nkunga ni mirongo itanu. Ni mu rwego rw’umushinga wo gushishikariza abaturage kurushaho kunoza isuku (Hygiene and Behavior Change Coalition –HBCC).

Umukozi wa AEE Rwanda ushinzwe gukurikirana Ibikorwa by’uyu mushinga mu Turere twa Nyabihu, Ngororero, Gakenke na Rulindo, Pasteur Niyindengera Faustin, yasabye abahawe ibikoresho kubikoresha neza birinda indwara, kuko ari bwo buryo bwa mbere bwo guhangana n’indwara zituruka ku mwanda.

Yavuze ko kubera ingorane abaturage batishoboye bakunze guhura nazo mu kubona ibikoresho byo kwita ku isuku, bateganyije gukomeza gutanga ubufasha nk’ubwo mu Karere ka Ngororero, aho biteze kugera ku miryango isaga 4000.

Umuyobozi ushinzwe Imiyoborere Myiza mu Karere ka Ngororero, Rutagisha Aimable, yashimiye CARE International na AEE Rwanda ku bwo gufasha imiryango kunoza isuku kandi abizeza ubufatanye mu bikorwa byose bigamije iterambere n’imibereho myiza by’abaturage.

Yasabye abaturage kubyaza umusasuro ibyo bikoresho baharanira ko umwanda uba amateka muri Ngororero.

Minisiteri y’Ubuzima muri Gashyantare uyu mwaka yatangaje ko igiye gukoresha miliyari eshanu na miliyoni 400 z’amafaranga y’u Rwanda muri gahunda zo kurwanya indwara ziterwa n’umwanda yitezweho ko gahunda yo gukaraba intoki izaba yagezweho 100% mu 2024 ivuye kuri 4.4% yariho mu 2015.

Abahawe ibikoresho by'isuku basabwe kugendera kure umwanda nk'imwe mu ngamba zo kwirinda indwara ziwukomokaho
Abahawe ibikoresho biyemeje kugira isuku umuco mu kwirinda indwara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .