Mwenedata washakaga kuyobora u Rwanda akomeje umugambi wo guhakana Jenoside no gusiga icyasha ubuyobozi

Yanditswe na Musangwa Arthur
Kuya 26 Kanama 2020 saa 01:32
Yasuwe :
0 0

Gilbert Mwenedata wagerageje kwiyamamariza kuyobora u Rwanda mu 2017, ubu akaba ari muri Leta zunze Ubumwe za Amerika, ku wa Gatanu w’icyumweru gishize yahamagariye abarokotse Jenoside yakorewe Abatutsi kwitandukanya na FPR, ku mpamvu avuga ko ‘FPR ari abicanyi bagurisha imibiri y’abazize Jenoside’.

Ibi Mwenedata yabivuze mu kiganiro yagiranye na Jean Nepomuscene Mporamusanga kuri Biza Tubireba Tugaceceka, iyi akaba ari shene ya YouTube y’abarwanya u Rwanda.

Mu 2018, Mwenedata yashinzwe ishyaka yise ‘People’s Initiative for Democratic Alliance (PIDA), yavugaga ko agamije ‘gufatanya n’abandi banyarwanda mu kubaka igihugu’.

Binyuze muri iri shyaka, yatangije ihuriro ryitwa ‘Rwanda Bridge Builders’, afatanyije n’andi matsinda y’abantu bashyize imbere kurwanya u Rwanda nka Daphrose Nkundwa, wahoze ari Perezida wa Réseau international des femmes pour la Démocratie et la Paix (RIFDP) mu Bubiligi.

Hari kandi ushinzwe dipolomasi mu mutwe w’iterabwoba wa RNC, Charlotte Mukankusi, na Jean-Marie Vianney Ndagijimana, wabaye Minisitiri w’Ububanyi n’Amahanga wa mbere muri guverinoma y’inzibacyuho wibye ibihumbi 200 by’amadolari yahawe ngo ajye gufungura za ambasade hanze.

Mwenedata wiyita ‘umunyapolitiki’, muri icyo kiganiro yabajijwe ku ibaruwa aherutse gusinyaho n’abandi bagize imitwe y’iterabwoba irwanya u Rwanda, yavugaga ko ‘ihamagarira umuryango mpuzamahanga kumenya akarengane abarokotse Jenoside bakorerwa n’ubutegetsi bw’u Rwanda’.

Ishyaka FPR n’ingabo zayo zahagaritse Jenoside yakorewe Abatutsi zikabohora u Rwanda. Iri niryo Mwenedata yita ‘abicanyi’ ndetse akifuza kubona abarokotse Jenoside bitandukanya nayo.

Umwe mu barebye iyi video y’ikiganiro cya Mwenedata, yanenze ibyo Mwenedata yavuze, yandika ko “Ibi ni ibitekerezo by’abahakana jenoside n’abandi nkabo bafite umugambi wo gutera icyuhagiro abicanyi nyabo”.

Undi yunzemo ati “Mwenedata ubwe azi buri kimwe Guverinoma yakoreye abacitse ku icumu binyuze mu nzego nka FARG. Biragaragara ko ibyo arimo gukora byose ari ugushakira amaronko mu guhindanya isura y’u Rwanda”.

“Ntushobora kumubona asabira ubutabera abanyarwanda bakorerwa iyicarubozo na RNC cyangwa indi mitwe y’iterabwoba irwanya u Rwanda akorana nayo”.

Mu 2017, Mwenedata yagerageje kwiyamamariza kuyobora u Rwanda ariko Komisiyo y’amatora ntiyamwemerera kubera kubura ibyangombwa, aho byatangajwe ko mu bamusinyiye ko bashyigikiye kandidatire ye, harimo amazina y’abapfuye.

NEC yagize iti “Mu kugenzura ilisiti yatanze y’abamusinyiye, habonetsemo uwitwa Nyombayire Enock wo mu Karere ka Gatsibo […] avuga ko yamusinyiye kandi yarapfuye.”

Umwe mu bakora muri NEC, avuga ko Mwenedata ari umuntu watakarijwe icyizere na buri wese umuzi. Nyuma yo gutangazwa ko yahimbye imikono agakoresha n’iy’abantu bapfuye, yahunze igihugu atinya ko yakurikiranwa n’ubutabera. Ubu rero arimo gushaka kugurisha ibidafite ishingiro n’ibinyoma ku buyobozi bw’u Rwanda kugira ngo abone uko abaho”.

Uwitwa Mary Goretti Kantege, mu butumwa yanditse kuri iki kiganiro yanenze Mwenedata. Hari aho yagize ati “Murashyira ku rwego rumwe FPR n’Interahamwe. None ndababaza, ababyeyi, abana n’abavandimwe ba FPR bahasize ubuzima kugira ngo babohore ababoshywe, si ukubica bwa kabiri? Iyo abasirikare ba FPR badasesekara mu Rwanda, ntibajyaga kubamara?”.

Nta Diane Rwigara, nta Mwenedata

Umwaka ushize, Shima Diane Rwigara, usangiye na Mwenedata kuba barasinyishije abapfuye ubwo bashakaga kwiyamamariza kuyobora u Rwanda mu 2017, yumvikanye atabariza abacitse ku icumu rya Jenoside yakorewe Abatutsi, yavugaga ko bakomeje kurenganywa no kwicwa ntibyitabweho.

Mu ibaruwa ifunguye Diane Rwigara yavugaga ko yandikiye Perezida Kagame ku wa 15 Nyakanga 2019, yagarutse ku kuba abacitse ku icumu rya Jenoside batavugirwa kuko CNLG na Ibuka bikunze kugaragaza ubwoba. Yagarutse kandi ku mazina y’abacitse ku icumu bagiye bapfa mu bihe bitandukanye, akavuga ko bishwe.

Mu kiganiro IGIHE yagiranye n’Umunyamabanga Nshingwabikorwa wa CNLG, Dr Bizimana Jean Damascène, icyo gihe, yagarutse ku cyo Diane Rwigara yise ko abacitse ku icumu batavugirwa, avuga ko niba abafitiye impuhwe yagombye kureka ibikorwa bye bibi birimo n’ibihungabanya umutekano w’igihugu no gukorana n’abanzi b’u Rwanda.

Ati “Niba Diane Rwigara afitiye impuhwe abacitse ku icumu rya Jenoside yakorewe Abatutsi kuki ajya gukora ibikorwa by’ubugizi bwa nabi bihungabanya umutekano w’igihugu ndetse agakorana n’abakora ibyo bikorwa, aba yumva ko abo bizica bizaza bikarobanura abacitse ku icumu bikabasiga?”

Umwe mu basesenguzi, asanga amagambo ya Mwenedata ari kimwe n’aya Diane Rwigara, akibaza ukuntu aba bombi bigira abavugizi b’Abanyarwanda mu gihe bajya gukora no gushyigikira ibikorwa bibi by’ubugambanyi kandi bishaka guhungabanya umutekano w’igihugu.

Abarokotse Jenoside ntibakeneye ubuvugizi bwa Mwenedata

Kuva Ingabo zari iza FPR Inkotanyi zahagarika Jenoside, abayirokotse bakomeje kwitabwaho na Leta y’u Rwanda, ibakorera ibikorwa bikomeye kandi byabubatse mu nzego zinyuranye z’ubuzima bwabo.

Hari ku birebana n’ubuzima nko kuvuza abari bakeneye kuvuzwa, kurihira amashuri abana kugira ngo bashobore kwiga babashe kwibeshaho kandi byatanze umusaruro kuko ubu ni abagabo n’abagore bubatse ingo, bakorera igihugu n’imiryango mpuzamahanga.

Mu myaka 20 ishize hubatswe inzu zirenga 28,558 z’abacitse ku icumu batishoboye zatwaye amafaranga y’u Rwanda miliyari zirenga 28. Habayeho n’ibikorwa byo gusana inzu zari zarangiritse kandi ba nyirazo badafite ubushobozi bwo kuzisana.

Mu buvuzi, kuva mu 1998 kugeza mu 2018, muri iyo myaka 20, abavuriwe mu Rwanda bavuwe uburwayi butandukanye bugera ku 40.896, batangwaho amafaranga y’u Rwanda miliyari 17 na miliyoni zirenga 141.

Uburwayi bunyuranye bugera kuri 428 ni bwo bwavurijwe mu mahanga, hishyurwa amafaranga angana na miliyari 2 na miliyoni zisaga 310. Amafaranga yatanzwe yose, haba mu Rwanda ndetse no mu mahanga angana na miliyari 19 na miliyoni zisaga 452.

Hari ibikorwa bidasanzwe Umuryango Unity Club uyobowe na Madamu Jeannette Kagame ukora byo kubakira incike z’abasaza n’abakecuru bageze mu zabukuru no kubaha uburyo bwo kubaho no kubasazisha neza. Hari izubatswe mu Karere ka Huye, Rulindo, Kayonza, Bugesera na Rusizi.

Amafaranga y’ingoboka yatanzwe harimo n’ayahawe incike ni miliyari 2 na miliyoni zirenga 261 Frw. Abasaza n’abakecuru b’incike 166 batujwe mu ngo zubatswe kijyambere, bagenerwa ibyangombwa byose bakenera mu buzima ndetse banahabwa n’umuganga ukurikirana ubuzima bwabo bwa buri munsi. Abahabwa ubufasha muri gahunda ya One Dollar Campaign bagera ku 143.

Umwe mu basesenguzi agendeye kuri ibi bikorwa, avuga ko abacitse ku icumu badakeneye ubuvugizi bwa Mwenedata kuko ibyo bikorwa bakorewe n’ubuyobozi babizi, babyemera, leta bayibonamo yose, bazi akamaro Leta y’u Rwanda ibafitiye, bazi akamaro ubuyobozi bukuru bw’igihugu bubafitiye, akamaro Perezida wa Repubulika n’Umuryango FPR Inkotanyi bafitiye igihugu.

Mwenedata yahunze igihugu nyuma yo guhimba imikono ashaka kwiyamamariza kuyobora u Rwanda mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .