Musanze: Yaketsweho kugerageza kwiba uruhinja nyuma yo kubeshya ko agiye kubyara adatwite

Yanditswe na Evariste Nsengimana, N.Kubwimana Janvière
Kuya 19 Ukwakira 2019 saa 11:26
Yasuwe :
0 0

Umugore wo mu Murenge wa Cyuve mu Karere ka Musanze witwa Umuhire Clarisse, yacyetsweho kugerageza kwiba uruhinja mu Bitaro bya Ruhengeri, nyuma yo kubeshya abo mu muryango we ko agiye kubyara kandi adatwite.

Amakuru agera ku IGIHE avuga ko uyu mubyeyi ngo wari amaze igihe kinini abeshya abo mu muryango we ko atwite, mu ijoro ryakeye yababwiye ko inda imufashe bahita bihutira kumujyana kwa muganga kubyarirayo.

Uyu mugore bivugwa ko umugabo we aba muri Leta Zunze Ubumwe za Amerika, bahise bamujyana ku Ivuriro ryigenga ryitwa Mpore riherereye mu Mujyi wa Musanze, abaganga baryo bamukoreye ibizamini bigaragaza ko adatwite.

Abo baganga bakomeje kumwitaho, bamubajije uko yumva amerewe, ababwira ko mu nda harimo kumurya, bamuha imiti imworoheza uburibwe baramusezera.

Umuyobozi w’Ibitaro bya Ruhengeri, Dr Muhire Philbert, yabwiye IGIHE ko uwo mugore mu gitondo yahazindukiye yinjira aho ababyeyi babyarira afite ivarisi irimo imyenda, atangira kwinginga ababyeyi babyaye ngo bamuhe umwana aterure ndetse nyuma atangira kubasaba ko yakwifotozanya n’abana baramwemerera.

Nyuma yo kumwemerera yahise atangira guhamagara umugabo we uba muri Amerika amubwira ko yabyaye ndetse amwoherereza n’amafoto ateruye uruhinja rumwe mu zo yifotozanyije nazo.

Umugabo we ngo yahise ahamagara abo mu muryango we bamukurira inzira ku murima ko umugore we atabyaye, ndetse bamubwira n’uko byaraye bigenze.

Abo babyeyi babyariye ku Bitaro bya Ruhengeri ariko ngo bakomeje kugira impungenge z’ibyo uwo mugore arimo gukora bahita batanga amakuru ko ashobora kuba ashaka kwiba uruhinja, ahita afatwa ajyanwa kuri Isange One Stop Center yo mu Karere ka Musanze.

Kugeza ubu uwo mugore ntiyemera ko yari afite umugambi wo kwiba uruhinja.

Abakozi ba Isange One Stop Center bavuze ko bakurikiranye amakuru bakamenya ko yaraye abeshye ko agiye kubyara kandi adatwite. Bavuze ko bagiye kumushyikiriza Urwego rw’Ubugenzacyaha kugira ngo rutangire gukora iperereza.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza