Musanze: Ubucuruzi bw’imyenda n’inkweto bishaje byatunzwe agatoki mu bitiza umurindi ubujura mu ngo

Yanditswe na N.Kubwimana Janvière
Kuya 14 Nyakanga 2020 saa 08:38
Yasuwe :
0 0

Abaturage bo mu mirenge itandukanye yo mu Karere ka Musanze barinubira abagura bakanacuruza imyenda n’inkweto bishaje babikuye mu baturage, kuko aho basanze badahari hari ubwo biba cyangwa bagakoresha abakozi bakora akazi ko mu rugo.

Ni ikibazo abaturage bavuga ko cyongeye kugaragara nko mu mezi ane ashize, kuko n’ubwo cyari gihari cyasaga nk’aho cyagabanyije ubukana, ariko ubu cyongeye gukara.

Bamwe muri aba baturage bavuga ko kuba hari abirirwa mu ngo bagura imyenda n’inkweto bishaje ndetse n’ibindi bikoresho, usibye no kuba bibateza ubujura binatuma bahangayikishwa n’ibyo iyo myenda ikoreshwa.

Mu mpungenge zabo berekanye ko muri ibi bihe ibyo bikoresho bishobora no kuba inzira yo gukwirakwiza icyorezo cya COVID-19.

Mukangamije Vestine wibwe imyenda ye yagize ati ‘‘Nigeze mbura ibitenge byanjye bibiri (amaribaya) n’inkweto nabyambaranaga, mbura n’umupira nagiraga wo kwifubika narawuguze ibihumbi umunani, nibwo naje kumenya kohari abaje bashuka umukozi wajye wo mu rugo abibagurisha ku mafaranga ibihumbi bitanu, kandi byakaguze nibura ibihumbi 40 Frw.’’

Ntakirutimana Godelive nawe avuga ko yigeze abura imyenda ye n’iy’abana ubwo yayimesaga agasiga ayanitse.

Yagize ati “Abantu bagura imyenda n’inkweto bishaje, babakurikirane babadukize, birirwa bazerera mu ngo bashaka aho babigura, basanga udahari bakiba ibyanitse. Mperutse kubura imyenda yari yanitse nayimeshe, bajya kubigurishiriza iyo za Byangabo n’ahandi. Biduteye impungenge kuko ntiwanamenya ibyo bayikoresha bazaduhumanya cyangwa batwanduze COVID-19.’’

Umuyobozi w’Akarere ka Musanze, Nuwumuremyi Jeannine, avuga ko abakora bene ibyo bafatwa nk’abajura ndetse uzabifatirwamo azahanwa nk’abandi.

Yakebuye ababigura n’ababigurisha ko bitemewe kuko baba bakoze ikosa ryo kugendagenda mu ngo kandi bitemewe mu bihe byo kwirinda COVID-19.

Yaguze ati “Abo bantu birirwa bazerera mu ngo z’abantu babaririza ibyo bagura bishaje, cyangwa bashuka abakozi bahasanze bakabibagurisha, rwose ubu ni ubujura nk’ubundi, ni uburiganya, uzafatwa azabihanirwa. Ni byiza kwirinda kwirirwa bagendagenda mu ngo muri ibi bihe bya COVID-19 nabyo sibyo kuko bashobora no kwanduza abandi n’ibyo bagura ntibazi ba nyira byo uko bahagaze kuri iki cyorezo, turabikurikirana kandi ababikora bazahanwa.’’

Abagura imyenda, inkweto n’ibindi bikoresho byakoreshejweho, bakunze kubijyana mu masoko atandukanye nko mu Byangabo, mu duce tumwe two mu Mujyi wa Musanze n’ahandi. Abaturage basaba ubuyobozi gukurikirana iki kibazo kuko giteza ubujura mu ngo.

Abaturage bo mu mirenge itandukanye yo mu Karere ka Musanze barinubira abagura bakanacuruza imyenda n'inkweto bishaje babikuye mu baturage kuko aho basanze badahari hari ubwo biba cyangwa bagakoresha abakozi bakora akazi ko mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .