00:00:00 IGIHE NETWORK KN KINYARWANDA EN ENGLISH FR FRANCAIS

Musanze: RIB yagaragarije urubyiruko ububi bw’ibyaha ku hazaza habo

Yanditswe na Claude Bazatsinda
Kuya 18 May 2022 saa 01:49
Yasuwe :

Urwego rw’Igihugu rushinzwe Ubugenzacyaha (RIB) yashishikarije urubyiruko kwirinda ibyaha, nka bumwe mu buryo bwo gufasha igihugu gutera imbere no kugera ku nzozi zabo.

Byatangajwe kuri uyu wa Kabiri ubwo RIB yahakomerezaga ubukangurambaga buri gukorerwa mu mashuri yisumbuye, mu rwego rwo gukangurira urubyiruko kwirinda ibyaha.

RIB yagaragaje ko kuva muri 2018- 2021 hakiriwe amadosiye asaga 12 000 y’ibyaha byo gusambanya abana, bituma iki cyaha kiza ku isonga mu bikorerwa urubyiruko.

Ubu bukangurambaga bugamije gukumira ibyaha, bufite insanganyamatsiko igira iti “Uruhare rwanjye mu kurwanya ibyaha byo gusambanya abana, ibiyobyabwenge n’ibindi byaha byibasiye urubyiruko”.

RIB, yerekanye ko icyaha cyo gufata ku ngufu no gusambanya abana kiza ku isonga muri ibyo byaha byibasiye urubyiruko.

Mu byaha urwo rubyiruko rweretswe ko bibugarije mu kubikorerwa no kubikora, birimo ibifitanye isano no gufatwa ku ngufu, gukoresha ibiyobyabwenge, iby’icuruzwa ry’abantu, ingengabitekerezo y’ubuhezanguni ishingiye ku myemerere n’ibindi.

Umunyamabanga Mukuru w’Urwego rw’Igihugu rw’Ubugenzacyaha, RIB, Col Jeannot K. Ruhunga, yasabye abanyeshuri bitabiriye ibi biganiro kuba maso kandi bakagira amakenga ku bintu byose byabakururira kwishora mu byaha.

Yagize ati “Turi mu bukangurambaga bugamije gukumira ibyaha mu rubyiruko kuko umubare munini w’ibyaha tubona nibo babikora abandi bakabikorerwa, uko dukangurira abantu niko bagenda babimenya bakabivuga kugeza aho abantu babisobanukirwa bakabyirinda. Icyo tubasaba ni ukubivuga bakabitangaho amakuru n’ababikora bakabitinya.”

Col Ruhunga yavuze ko kwishora mu byaha k’urubyiruko, bigira ingaruka mbi ku iterambere ry’igihugu.

Ati “Turasaba abanyeshuri kwirinda ibyaha kuko bibadindiza mu iterambere ababyeyi babo baba barabateguriye, ahubwo babitangeho amakuru aho babibonye n’aho babiketse."

Bamwe mu banyeshuri bo muri Sonrise School bibumbiye mu Ihuriro Rishinzwe kurwanya ibyaha (Anti Corruption Club) bagaragaje ko ibi biganiro byabahaye impamba nini bagiye kwifashisha mu gufasha urubyiruko bagenzi babo mu kurushaho kumenya ububi bw’ibyaha no kubyirinda.

Gasana Levis, yagize ati “Icyo nkuye muri ibi biganiro ni ukumenya ibyaha bitwugarije n’amayeri akoreshwa mu kubidushoramo. Ngiye gushishikariza bagenzi banjye kwirinda ibyaha. Ubu twongerewe ubumenyi natwe tugiye kwegera abanyeshuri bagenzi bacu tubafashe kumenya ibyaha babyirinde, birinde ababizeza akazi, ababashora mu busambanyi no gukoresha ibiyobyabwenge babyirinde kuko byangiza ubuzima bwabo kandi ari twe imbaraga z’igihugu.”

Aser Grace na we yagize ati “Ibi biganiro binsigiye isomo kuko nabonye ko hari urubyiruko rukora ibyaha n’ababikorerwa. Icyo tugiye gukora ni ugutanga amakuru kare aho tubiketse ndetse n’urundi rubyiruko tukarushishikariza kujya runyurwa n’ibyo ababyeyi babo babageneye, ntibajye gushakisha ibindi ahandi.”

Umuyobozi wa Sonrise School, Rev Gakwerere Cyprien, yavuze ko bagiye gukomerezaho ubu bukangurambaga bwo gukumira ibyaha mu rubyiruko mu banyeshuri barera kuko kurwanya ibyaha ari urugamba rwa bose.

Yagize ati “RIB itubereye urumuri natwe tubonye aho gukomereza. Turashyira imbaraga mu gukora dukangura aba bana, nabo nibabimenya babikangurire n’abandi. Ibi byaha birahangayikishije kuko byibasiye urubyiruko. Tugomba kubirwanya kuko byangiza inzozi z’umuntu.”

Umuyobozi w’Intara y’Amajyaruguru, Nyirarugero Dancille, yasabye urubyiruko kumva neza ububi bw’ibyaha n’ingaruka bibagiraho.

Yagize ati “Turabasaba gutangira amakuru ku gihe ahantu hose bakeka abashaka kubibashoramo. Dufite ingamba zo gukomeza ubu bukangurambaga ku buryo buri wese abigira ibye ahagaragaye ikibazo kikajya kivugwa kigafatirwa ingamba hakiri kare."

Urwego rw’Igihugu rushinzwe Ubugenzacyaha, RIB, ruvuga ko kuva muri 2018- 2021 rwakiriye ibirego bigera ku 12 840 by’amadosiye y’ibirego byo gusambanya abana bagera ku 13 646 mu gihe abagera ku 13 485 babikurikiranyweho. Intara y’Amajyaruguru ifitemo dosiye zigera ku 1570.

Abanyeshuri banyuzwe n'ibiganiro, biyemeza kubigeza no ku bandi ngo birinde ibyaha
Abakozi ba RIB n'abandi bayobozi mu nzego zitandukanye bakurikiranye ibiganiro
Abayobozi batandukanye bagaragaje ko kwishora mu byaha ku rubyiruko bigira ingaruka zikomeye ku hazaza habo
Urubyiruko rwo mu mashuri yisumbuye rukurikiye ibiganiro rwahawe n'ubuyobozi bwa RIB
Umuvugizi wa RIB Dr Murangira B. Thierry agaragaza ishusho y'uko ibyo byaha bihagaze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .