00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Icyiciro cya cumi cy’abofisiye bakuru ba Polisi cyasoje amasomo

Yanditswe na Claude Bazatsinda
Kuya 15 July 2022 saa 08:44
Yasuwe :

Abapolisi bakuru 34 bagize icyiciro cya cumi bo mu bihugu umunani, basoje amasomo bari bamazemo umwaka mu Ishuri Rikuru rya Polisi riri i Musanze, basabwa kurushaho gukora kinyamwuga, kwihugura no kubyaza umusaruro ibyo bize barushaho kubaka Umugabane wa Afurika.

Amasomo bize arimo ajyanye n’umwuga atangirwa impamyabumenyi ya ‘Passed Staff College (PSC)’, icyiciro cya gatatu cya Kaminuza mu bijyanye no kwimakaza amahoro no gukemura amakimbirane ndetse n’atangirwa impamyabumenyi mu miyoborere.

Umuyoboyi w’Ishuri Rikuru rya Polisi rya Musanze, CP Rafiki Mujiji, yashimiye umuhate, umurava n’imyitwarire y’abarangije amasomo yabo abasaba kuzahora bihugura kandi bongera ubumenyi bafite.

Yagize ati “Byari bikomeye kandi bisaba urwego rw’imyitwarire myiza ruri hejuru kugira ngo bagere ku ntego. Turishimira ko aba banyeshuri babishoboye, ni yo mpamvu tubashimiye ku mugaragaro. Turizera ko akazi mugiyemo muzagakora neza kandi muzahore muharanira kwihugura no kongera ubumenyi."

Bamwe mu bapolisi bakuru basoje amasomo yabo, bemeza ko ubumenyi bahawe bagiye kubukoresha mu kazi kabo no kubusangiza abatarabashije kwitabira ayo masomo bagamije guteza imbere imiyoborere myiza no kubungabunga umutekano.

SSP Fhadi Ali wo muri Kenya, yavuze ko yishimiye kuba mu Rwanda bikamufasha gutsinda neza amasomo ye kandi yiteguye gutanga umusanzu we.

Yagize ati “Ntabwo byari byoroshye ariko nashyize umutima ku masomo yanjye ndiga ndasoma, ndabaza kugeza ubwo mbisoje neza. Nakiriwe neza nkigera mu Rwanda, ndahishimira bituma niga ntuje. Ubumenyi nahawe ngiye kubukoresha haba muri Kenya n’ahandi hose nakoherezwa gukorera kandi bizatanga umusanzu ku mahoro n’umutekano muri rusange."

SP Faustin Munyabarenzi wo mu Rwanda na we yagize ati" Uyu munsi nasoje amasomo y’imiyoborere myiza. Ngiye guteza imbere imiyoborere myiza mu polisi n’u Rwanda muri rusange. Afurika ifite ibibazo by’umutekano kandi twiteguye kuwubungabunga dufatanyije n’abaturage.”

Minisitiri w’Umutekano mu Gihugu, Gasana Alfred yavuze ko kuba iri shuri ryakira abaturuka mu bihugu bitandukanye bigaragaza ubufatanye bukwiye kuba buranga Afurika.

Yagize ati “Abarangije turabasaba kujya gushyira mu bikorwa ibyo bahawe kandi kuba iri shuri ryakira abantu baturuka mu bihugu bitandukanye, bigenda bigaragaza ubumwe bw’Abanyafurika bituma twumva ko Afurika tugomba gukorera hamwe. Afurika ifite urugendo rumwe, tugomba kugendera hamwe rero kugira ngo tubashe kurusoza.”

Aba 34 basoje amasomo yabo muri iki cyiciro cya cumi barimo 22 b’Abanyarwanda n’abanyamahanga 12.

Muri bo, 30 barangije icyiciro cya gatatu cya kaminuza mu masomo bahawe na Kaminuza Nkuru y’u Rwanda na Kaminuza Nyafurika y’imiyoborere, African Leadership University.

Mu bapolisi bakuru basoje amasomo harimo n'abarangije icyiciro cya gatatu cya kaminuza
Imiryango y'abapolisi bari bamaze umwaka mu masomo yari yaje kwifatanya nabo mu byishimo
Minisitiri Gasana yasabye abarangije amasomo gukora kinyamwuga
Abapolisi b'u Rwanda mu karasisi ubwo hasozwaga icyiciro cya cumi cy'amasomo y'abofisiye bakuru
Abasoje amasomo basabwe gukomeza gukora kinyamwuga bateza imbere amahoro n'umutekano muri Afurika
Abitwaye neza mu masomo bahawe ishimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .