00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Babujijwe kugendana imihoro n’inkoni, ababyinjirana mu tubari bazajya bacibwa 10 000Frw

Yanditswe na Claude Bazatsinda
Kuya 12 June 2022 saa 07:48
Yasuwe :

Ubuyobozi bw’Umurenge wa Musanze mu Karere ka Musanze, bwihanangirije abantu bagendana inkoni n’imihoro ku babijyana mu tubari ho hashyirwaho amande ashobora no kugera ku bihumbi 10Frw.

Aya mabwiriza yasohotse mu itangazo ryasinyweho n’Umunyamabanga Nshingwabikorwa w’uyu Murenge, Tuyisenge Vedaste, aho rivuga ko nta muntu wemerewe kugendana inkoni cyangwa umuhoro by’umwihariko mu tubari kuko ngo byakunze kugaragara ko byifashishwa mu gihe habaye urugomo hagakomereka benshi.

Aya mabwiriza kandi ateganya ko mu gihe hari umukiliya basanze mu Kabari afite inkoni ku mpamvu zitateganyijwe, akabari kamwakiriye kazajya gacibwa amande ya 5000Frw naho ufite umuhoro gacibwe 10000Frw.

Umunyamabanga Nshingwabikorwa w’Umurenge wa Musanze, Tuyisenge Vedaste yavuze ko iri tangazo ryasohotse nyuma y’uko hakunze kugaragara ibibazo byo gukubita no gukomeretsa mu tubari hakoreshejwe ibi bikoresho ababa baje mu tubari bitwaje, akemeza ko ibi bihano bizaca intege iyo ngeso yari imaze kugera ku yindi ntera.

Yagize ati "Nibyo twagiye twakira ibirego by’urugomo rukorerwa mu tubari, aho usanga umukiliya yinjiranye umuhoro, inkoni, yamara gufata ku gacupa wenda hari ibyo yapfaga n’uwo basangiraga akaba aramutemye, cyangwa akamukubita ya nkoni akamukomeretsa, sinavuga ngo mu mibare urwo rugomo rwakorewe abangana gutya ariko bari bamaze kuba benshi."

" Ntawe uruhabwa ibi bihano kuva byashyirwaho, ariko aho tuzabisanga amabwiriza azubahirizwa, kugira ngo urugomo rukorwa muri ubu buryo rugabanuke, usibye no muri iri tangazo no mu nama duhuriramo n’abaturage turabibibutsa."

Iyi ngingo yazamuye amarangamutima ya benshi bayivugaho nyuma y’uko iri tangazo ricicikanye cyane ku mbuga nkoranyambaga kuko usanga ahari utubari ritarahagezwa n’ubwo bigaragara ko rimaze igihe rishyizweho umukono.

Uwineza Emelyne ufite akabari muri uyu Murenge, avuga ko n’ubwo nawe yaribonye kuri WhatsApp, ashyigikiye ko rishyirwa mu bikorwa kandi bose bakajya bahanwa aho guhana nyiri akabari gusa.

Ati "Mu by’ukuri natwe tuba dufite ubwoba n’impungenge iyo umuntu aje mu kabari yitwaje inkoni cyangwa umuhoro kandi ubona ko ari umusore, ibaze noneho iyo ari itsinda rinini, tubura uko tubigenza kuko aba ari abakiliya kandi ubona ari bazima batarasinda ugahitamo kubakira. Iyo barwanye rero intambara ntiwapfa kuyinjiramo.”

"Ibyo byambayeho kenshi kuko ibi birahure maze kubishyirishamo nka gatatu kubera baharwaniye, ubushize bararwanye turahunga kuko bari bari gukoresha inkoni n’imihoro dutabarwa na Polisi hari bari bamaze gukomeretsanya.”

Kaneza Augustin, usanzwe ari umukiliya mu tubari two mu Kagari ka Cyabagarura muri uwo Murenge, avuga ko adashobora guhangara ngo yinjire mu kabari abonamo ibyo bikoresho kuko mu gihe habaye urugomo usanga byifashishwa bigakomeretsa benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .