Muhanga: Urukiko rwanze ubusabe bwa Urayeneza Gérard bwo kurekurwa akajya kwivuza

Yanditswe na Prudence Kwizera
Kuya 25 Kanama 2020 saa 07:49
Yasuwe :
0 0

Urukiko rwisumbuye rwa Muhanga rwategetseko ko Urayeneza Gérard n’abo bareganwa bakomeza gufungwa by’agateganyo bakazaburana mu mizi bafunze ku cyaha bakurikiranyweho cyo kuzimiza cyangwa gutesha agaciro ibimenyetso cyangwa amakuru yerekeye Jenoside.

Kuri uyu wa Kabiri, tariki ya 25 Kanama 2020 nibwo Urayeneza Gérard Uhagarariye Ibitaro bya Gitwe mu buryo bw’amategeko yaburanye ku ifungwa n’ifungurwa ry’agateganyo ku cyaha akurikiranyweho.

Urayeneza yatawe muri yombi we na bagenzi be barindwi ku wa 14 Kamena 2020 afatiwe mu Mujyi wa Kigali.

Ubwo baburanaga muri Kamena 2020, Urukiko rw’Ibanze rwa Ruhango rwategetseko bafungwa ariko uwitwa Rutaganda Dominic na Ruganizi Benjamin bo bakarekurwa bakaburana bari hanze.

Ubushinjacyaha bwahise bujuririra icyo yemezo mu Rukiko Rwisumbuye rwa Muhanga. Ku rundi ruhande abakomeje gufungwa nabo bajurira muri urwo rukiko basaba kurekurwa.

Ku wa 2 Kanama 2020, Urukiko Rwisumbuye rwa Muhanga rwafashe umwanzuro ko bose bakomeza kuburana bafunze ariko Ruganizi Benjamin aburirwa irengero afatwa nk’uwatorotse ubutabera.

Nyuma yaho Urayeneza yari yandikiye urukiko agaragaza ko arwaye indwara y’umuvuduko w’amaraso kandi atabasha kuvurirwa muri gereza cyangwa ngo yoroherezwe kujya kwivuza.

Bagenzi be nabo banditse basaba ko barekurwa kuko batazigera batoroka ubutabera cyangwa ngo basibanganye ibimenyetso.

Mu iburanisha Ubushinjacyaba bwasabye ko abaregwa bakomeza kuburana bafunze kuko bashobora gucika ubutabera ndetse bugaragaza ko hari na bamwe mu batangabuhamya batangiye gutotezwa n’imiryango y’abafunze.

Bwagaragaje kandi ko abaregwa iyo bakeneye serivisi z’ubuvuzi bazihabwa aho bafungiye, busaba ko bakomeza gufungwa.

Kuri uyu wa Kabiri Urukiko Rwisumbuye rwa Muhanga rwanzuye ko ibyo abaregwa bavuga nta shingiro bifite rutegeke ko bakomeza gufungwa bakazaburana mu mizi tariki ya 13 Ukwakira 2020.

Ubwo umwanzuro w’urukiko wasomwaga, abaregwa ntibari mu rukiko ariko hari abantu benshi bitabiriye isomwa ryawo.

Abafunze ni Urayeneza Gérard, Nyakayiro Samuel, Rutaganda Dominique, Munyampundu Leon bakunze kwita Kinihira na Nsengiyaremye Elisée naho Ruganizi Benjamin yatorotse ubutabera.

Ibyo baregwa

Ibyaha bakurikiranyweho bifitanye isano n’ingengabitekerezo ya Jenoside kuko Urayeneza akekwaho icyaha cyo kuzimiza cyangwa gutesha agaciro ibimenyetso cyangwa amakuru byerekeye Jenoside.

We n’abo bareganwa batawe muri yombi nyuma y’iminsi ine mu Bitaro bya Gitwe ayoboye hatangiye igikorwa byo gushakisha imibiri y’Abatutsi bishwe muri Jenoside yakorewe Abatutsi bajugunywa mu cyobo gihari.

Hari amakuru IGIHE yamenye yavugaga ko Urayeneza akekwaho no kuba yaragiye atanga ruswa kuri bamwe mu barokotse Jenoside yakorewe Abatutsi kugira ngo badatanga amakuru ko ahubatswe Ibitaro bya Gitwe hari imibiri y’Abatutsi yahajugunywe.

Iperereza rirakomeje kuko bikekwa ko hashobora kuba hari indi mibiri mu byobo biri mu Bitaro bya Gitwe no muri ESAPAG.

-  Inkuru wasoma: Urayeneza Gérard uhagarariye ibitaro bya Gitwe n’abandi bantu barindwi batawe muri yombi

Urukiko rwisumbuye rwa Muhanga rwategetse ko Urayeneza Gérard n’abo bareganwa bakomeza gufungwa by’agateganyo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .